[1] عئسا بو سؤزلری بئتئرندن سونرا، جلئلدن چیخیب اوردونون او بئری تایینا، یهودئیه دئیارینا گلدی.
[2] بؤیوک بئر جاماعات اونون دالینجا گتدی و عئسا اورادا اونلارا شفا وردی.
[3] فرئسئلر اونو ائمتاحان اتمک اوچون اونون یانینا گلئب ددئلر: «آیا کئشئیه جائزدئر کی، آروادینی هر سببه گؤره بوشاسین؟»
[4] عئسا جاواب ورئب ددی: «مگر اوخوماییبسینیز کی، ”باشلانیشدا خالئق اونلاری کئشی و آرواد یاراتدی.“
[5] و ددی: ”بونا گؤره کئشی آتا-آناسیندان آیریلیب، آروادینا یاپیشاجاق و ائکئسی بئر بدن اولاجاقلار.“
[6] اله کی، اونلار آرتیق ائکی یوخ، بئر بدندئرلر. بله‌جه، تارینین بئرلشدئردئیئنی، ائنسان آییرمامالی‌دیر.»
[7] اونلار عئسایا ددئلر: «اگر بله‌دئر، بس نه اوچون موسا دیئب کی، اَر، آروادینا بئر بوشانما کاغیذی ورئب، اونو بوشایا بئلر؟»
[8] عئسا اونلارا ددی: «اورَکلرئنئزئن برکلئیئنه گؤره موسا ائجازه وردی کی، آروادلارینیزی بوشایا بئله‌سئنئز. لاکئن باشلانیشدان بله دیئلدی.
[9] سئزه دیئرم: کئم آروادینی زئنادان باشقا اؤزگه بئر سببه گؤره بوشاییب، آیری بئر آروادلا اِولنسه، زئنا ادئر.»
[10] شاگئردلر عئسایا ددئلر: «اگر اَرله آروادی آراسینداکی موناسئبت بله‌دئر، دمه‌لی اِولنمه‌مک داها یاخشی‌دیر.»
[11] آمّا عئسا اونلارا ددی: «هرکس بو سؤزو قبول اده بئلمز، مگر او آداملار کی، بو قابئلئیّت اونلارا ورئلئب.
[12] چونکی اله خاجه‌لر وار کی، آنا قارنیندان اله دوغولوبلار؛ و اله خاجه‌لر ده وار کی، ائنسانلار طرفئندن اله ادئلئبلر. گؤیون پادشاهلیغی اوچون اؤزلرئنی خاجه سایانلار دا واردیر. بونو قبول اده بئلن قبول اتسئن.»
[13] او واخت اوشاقلار عئسانین یانینا گتئرئلدی کی، اونلارا ال قویوب برکت ورسئن، آمّا شاگئردلری اونلارا آجیقلاندیلار.
[14] عئسا ددی: «قویون اوشاقلار منئم یانیما گلسئنلر! اونلارا مانع اولمایین، چونکی گؤیون پادشاهلیغی بله‌لرئنکئدئر.»
[15] و اونلارین اوستونه ال قویوب، اورادان گتدی.
[16] بئر آدام عئسانین یانینا گلئب ددی: «اوستاد! ابدی حیاتا مالئک اولماق اوچون نه یاخشی عمل اتمه‌لی‌یَم؟»
[17] عئسا اونا ددی: «نه اوچون نه‌یئن یاخشی اولدوغو باره‌ده مندن سوروشورسان؟ فقط واحئد اولاندیر کی، یاخشی‌دیر. لاکئن اگر ابدی حیاتا گئرمک ائسته‌یئرسن، احکامی یرئنه یتئر.»
[18] آدام عئسایا ددی: «هانسی احکامی؟» عئسا دا ددی: «آدام اؤلدورمه؛ زئنا اتمه؛ اوغورلوق اتمه؛ یالان شهادت ورمه؛
[19] آتا و آنانا حؤرمت ات؛ و قونشونو اؤزون کئمی سو.»
[20] جاوان اوغلان عئسایا ددی: «بوتون بونلاری یرئنه یتئرمئشم، داها نه‌یئم اسکئکدئر؟»
[21] عئسا اونا ددی: «اگر کامئل اولماق ائسته‌یئرسن، گت نه‌یئن وارسا سات، یوخسوللارا پایلا. گؤیده خزئنَن اولاجاق. سونرا گل، منه پِیرَو اول.»
[22] آمّا جاوان اوغلان بو سؤزو اشئدن واخت، پرت اولوب گتدی، چونکی چوخ مال-دؤولتی وار ائدی.
[23] عئسا شاگئردلرئنه ددی: «دوغروسونو سئزه دیئرم: وارلی آدام گؤیون پادشاهلیغینا چتئنلئکله گئره‌جک.
[24] گئنه سئزه دیئرم: دَوه‌نئن ائینه دِشئیئندن کچمه‌سی، وارلی بئر آدامین تارینین پادشاهلیغینا گئرمه‌سئندن داها آساندیر.»
[25] شاگئردلری بونو اشئدنده چوخ تعجّوب ادئب ددئلر: «بس کئم نئجات تاپا بئلر؟!»
[26] عئسا اونلارا باخیب ددی: «ائنسانلار اوچون بو، قِیری‌مومکوندور، لاکئن تاری اوچون هر شی مومکوندور.»
[27] او واخت پطروس اونا جاواب ورئب ددی: «باخ، بئز هر شیی آتیب سنئن دالینجا گلمئشئک، اگر بله‌دئر، بس بئزئم نه‌یئمئز اولاجاق؟»
[28] عئسا دا اونلارا ددی: «دوغروسونو سئزه دیئرم: او زامان کی، ائنسان اوغلو هر شیئن تزه‌لنمه‌سئنده شؤوکتلی تختئنه اوتورور، منئم دالیمجا گلن سئزلر ده اونائکی تختئن اوستونده اوتوروب، ائسرایئلئن اونائکی قبئله‌سئنه حؤکم اده‌جکسئنئز.
[29] و هر کئم منئم آدیم اوزوندن اِوئنی، قارداشلارینی، باجیلارینی، آتاسینی، آناسینی، اوشاقلارینی و یا زمئلرئنی بوراخمیش اولسا، یوز دفه آرتیق آلاجاق، هم ده ابدی حیاتا وارئث اولاجاق.
[30] لاکئن چوخ بئرئنجی‌لر آخیرکی و چوخ آخیرکی‌لار بئرئنجی اولاجاقلار.»