[1] او زامان فرئسئلر و دئن عالئملری اورشلئمدن عئسانین یانینا گلئب ددئلر:
[2] «نه اوچون شاگئردلرئن، آغساقّاللارین حدئثئنی پوزورلار؟ چونکی چؤرک یئین زامان اَللرئنی یومورلار؟»
[3] عئسا جاوابیندا اونلارا ددی: «بس سئز نه اوچون اؤز حدئثئنئزدن اؤتری تارینین امرئنی پوزورسونوز؟
[4] چونکی تاری بویوروب: ”آتانا و آنانا حؤرمت ات“ و ”آتاسینا یا دا آناسینا یامان دئین آدام گرک اؤلدورولسون.“
[5] لاکئن سئز دیئرسئنئز: ”کئم آتاسینا یا دا آناسینا دسه: مندن سنه یتئشن کؤمک تارییا تقدئم ادئلئب،
[6] آرتیق آتاسینا حؤرمت اتمک مجبورئیّتئنده دیئل.“ بله‌جه سئز، اؤز حدئثلرئنئزدن اؤتری تارینین امرئنی باطئل ادئرسئنئز.
[7] ای رئیاکارلار! اِشَعیا پیغمبر سئزئن اوچون نه یاخشی دیئب:
[8] ”بو خالق دوداقلاری ائله منه حؤرمت ادئر، آمّا اور‌کلری مندن اوزاقدیر.
[9] منه بوش یره عئبادت ادئرلر، چونکی ائنسان امرلرئنی، احکام آدیندا تعلئم ورئرلر.“»
[10] عئسا جاماعاتی یانینا چاغیریب، اونلارا ددی: «قولاق آسین و آنلایین!
[11] آغیزا گئرن شی، ائنسانی ناپاک اتمز؛ آغیزدان چیخان شی‌دئر کی، ائنسانی ناپاک ادر.»
[12] او واخت شاگئردلر گلئب، اونا ددئلر: «آیا بئلئرسن کی، فرئسئلر بو سؤزو اشئدن واخت حئرصلَندئلر؟»
[13] عئسا جاواب ورئب، اونلارا ددی: «گؤیده‌کی آتامین اَکمه‌دئیی هر بئتکی، کؤکوندن قوپاریلاجاق.
[14] اونلاری بوراخین. اونلار کورلارین کور بلدچئلری‌دئرلر؛ کور، کورا یول گؤرسدسه، هر ائکئسی ده قویویا دوشر.»
[15] پطروس عئسایا جاواب ورئب ددی: «بئزه بو مثلی آچیقلا.»
[16] عئسا ددی: «آیا سئز ده حله باشا دوشمه‌یئبسئنئز؟
[17] آنلامیرسینیز کی، آغیزا گئرن هر شی آدامین قارنینا گدئر و ائفراز اولونور؟
[18] آمّا آغیزدان چیخان، اورَکدن چیخار و ائنسانی ناپاک ادر.
[19] چونکی اورَکدن پئس فئکئرلر، آدام اؤلدورمک، زئناکارلیق، عئفّتسئزلئک، اوغورلوق، یالانچی شاهئدلئک و کوفر چیخار.
[20] ائنسانی ناپاک ادن شیلر بونلاردیر. یویولمامیش اللر‌له یمک، ائنسانی ناپاک اتمز.»
[21] عئسا اورادان چیخیب، صور و صئدون بؤلگه‌سئنه گتدی.
[22] کَنَعانلی بئر آرواد او طرفلردن گلئب، چیغیرا-چیغیرا ددی: «آغا، ای داوود اوغلو، منه یازیغین گلسئن. قیزیم ائبلئس اَلئنه توتولوب و پئس بئر حالدادیر.»
[23] لاکئن عئسا جاوابیندا اونا بئر سؤز بله دمه‌دی. شاگئردلری عئسانین یانینا گلئب اونا یالواردیلار: «بونو مورخّص ات، گتسئن. آرخامیزدان باغیریب گلئر.»
[24] عئسا جاواب ورئب ددی: «من آنجاق ائسرایئل اِوئنئن ائتمئش اولان قویونلارینین یانینا گؤندَ‌رئلمئشم.»
[25] آمّا آرواد یاخینلاشدی و اونا سجده ادئب ددی: «یارب، منه ائمداد ات.»
[26] عئسا جاواب ورئب ددی: «اوشاقلارین چؤره‌یئنی آلیب، ائتلره آتماق روا دیئل.»
[27] آرواد ددی: «حاقلی‌سان یارب، آمّا ائتلر ده صاحئبلرئنئن سوفره‌سئندن دوشَن تئکه‌لردن یئیرلر.»
[28] او واخت عئسا جاواب ورئب آروادا ددی: «آرواد، ائمانین بؤیوکدور. سنه ائسته‌دئیئن کئمی اولسون.» و اونون قیزی او ساعاتدا صاغالدی.
[29] عئسا اورادان چیخیب، جلئل گؤلونون یاخینلیغینا گلدی و داغین باشینا چیخیب اورادا اوتوردو.
[30] اونون یانینا بؤیوک بئر جاماعات ییغیلدی و آرالاریندا توپاللار، چولاقلار، کورلار، لاللار، و بونلاردان باشقا چوخلاری دا وار ائدی. اونلاری عئسانین آیاقلاری یانینا قویدولار و عئسا اونلارا شفا وردی.
[31] خالق لاللاری دانیشان، چولاقلاری صاغ، توپاللاری یرئین، و کورلاری گؤرن زامان تعجّوب ادئب ائسرایئلئن تاریسینا حمد اتدئلر.
[32] عئسا شاگئردلرئنی یانینا چاغیریب ددی: «خالقا اوره‌یئم یانیر، چونکی اوچ گوندور کی، یانیمدادیرلار و یمه‌یه هچ بئر شیلری یوخدور.ائسته‌مئرم اونلاری آج بوراخیم، مبادا یولدا طاقتدن دوشسونلر.»
[33] شاگئردلری اونا ددئلر: «چؤلده بو قدر جاماعاتی دویورماق اوچون چؤره‌یی هارادان تاپاق؟!»
[34] عئسا اونلارا ددی: «نچه چؤره‌‌یئنئز وار؟» ددئلر: «یدّی چؤرک و بئر نچه کئچئک بالیغیمیز وار.»
[35] او واخت عئسا خالقا امر اتدی کی، یره اوتورسونلار.
[36] یدّی چؤرکله بالیقلاری گؤتوروب شوکور اتدی و بؤلوب شاگئردلرئنه وردی. شاگئردلر ده خالقا پایلادیلار.
[37] هامی ییئب دویدو و آرتیق قالان تئکه‌لردن یدّی دولو زنبئل ییغدیلار.
[38] یئینلر آروادلار و اوشاقلاردان باشقا دؤرد مئن نفر ائدئلر.
[39] عئسا خالقی مورخّص اتدی و قاییغا مئنئب مجدل دئیارینا گلدی.