[1] اؤزونوزه بوتلر دوزَلتمه‌یئن؛ اویما بوت، و یا موقدّس سوتون دا اؤزونوز اوچون قویمایین، اؤلکه‌نئزده یونولموش داش قویوب قاباغیندا سجده اتمه‌یئن؛ چونکی تارینیز رب، منم.
[2] سَبّت گونلرئمی ساخلایین، موقدّس مکانیما دا حؤرمت ادئن. رب منم.
[3] اگر قانونلاریملا یاشایاسینیز و امرلرئمی ائطاعت اده‌سئنئز کی، اونلاری یرئنه یتئره‌سئنئز،
[4] سئزه مؤوسومونده یاغیش گؤندَ‌ره‌جیم کی، تورپاق اؤز محصولونو، زَمئده‌کی آغاجلار دا میوه‌لرئنی ورسئن.
[5] سئزئن خرمنئنئز اوزوم ییغیمینا قدر داوام اده‌جک، اوزومونوز او قدر بول اولاجاق کی، اونون ییغیلماسی اَکئن واختینا قدر داوام اده‌جک. چؤره‌یئنئزی دویونجا یِیئب، اؤلکه‌نئزده آرخایین یاشایاجاقسینیز.
[6] اؤلکه‌نئزه صولح وره‌جیم؛ یاتاندا سئزی واهئمه‌یه سالان اولمایاجاق. ییرتیجی حیوانلاری اؤلکه‌دن قوواجاغام و موحارئبه اوزو گؤرمه‌یه‌جکسئنئز.
[7] دوشمنلرئنئزی قوواجاقسینیز و اونلار قیلینج ضربه‌لری ائله قاباغینیزدا یره ییخیلاجاقلار.
[8] بِشئنئز یوز آدامی، یوزونوز اون مئن آدامی قوواجاق. دوشمنلرئنئز قیلینج ضربه‌لری ائله قاباغینیزدا یره ییخیلاجاقلار.
[9] من اوزومو سئزه چوئره‌جیم، سئزی آرتیریب چوخالداجاغام، سئزئنله باغلادیغیم اؤز عهدئمی یرئنه یتئره‌جیم.
[10] ساخلادیغینیز محصولو یئیه‌جکسئنئز و تزه محصول اوچون کؤهنه‌نی بوشالداجاقسینیز.
[11] اوسته‌لئک، من آرانیزدا ساکئن اولاجاغام و جانیم سئزدن ائکراه اتمَیه‌جکدئر.
[12] من ده آرانیزدا یاشاییب سئزئن تارینیز اولاجاغام، سئز ده منئم خالقیم اولاجاقسینیز.
[13] سئزی مئصئر تورپاغیندان چیخاردان و اونلارین نؤکرچئلئیئندن آزاد ادن، یوغونوزون گئره‌لرئنی قیریب باشینیزی اوجالدان تارینیز رب، منم.
[14] آمّا اگر مندن ائطاعت اتمه‌یئب بوتون بو امرلرئمه عمل اتمیه‌سئنئز،
[15] اگر قانونلاریما خور باخیب حؤکملرئمی قَلبئنئزدن ردّ اده‌سئنئز، اله کی، منئم بوتون امرلرئمه عمل اتمه‌یئب، عهدئمی پوزاسینیز،
[16] من ده سئزه بونو اده‌جیم: اوستونوزه دهشت سالاجاغام. سل و قیزدیرما گؤزلرئنئزئن نورونو سؤندوره‌جک، جانینیزی گَمئره‌جک. توخوملارینیزی هدر یره اَکه‌جکسئنئز؛ اونلاردان عمله گلن محصولو دوشمنلرئنئز یئیه‌جک.
[17] اوزومو سئزدن دؤندَره‌جیم اله کی، دوشمنلرئنئزئن موقابئلئنده وورولوب یره ییخیلاسینیز. سئزدن نئفرت ادنلر، اوستونوزده حؤکم سوره‌جکلر؛ سئزی قووان اولماسا دا، قاچاجاقسینیز.
[18] اگر بونلارا باخماییب گئنه مندن ائطاعت اتمَیه‌سئنئز، او واخت گوناهلارینیزا گؤره سئزی یدّی قات آرتیق جزالاندیراجاغام.
[19] گوجلو تکبّورونوزو قیراجاغام. باشینیز اوستونده اولان گؤیلری دمئر و آیاغینیز آلتینداکی یری بورونج کئمی اده‌جیم.
[20] قووّتئنئز هدر یره تؤکَنه‌جک، چونکی نه تورپاغینیز محصول وره‌جک، نه ده اؤلکه‌ده‌کی آغاجلارینیز میوه وره‌جک.
[21] اگر منئمله عداوت ادئب، سؤزلرئمدن حله ده ائطاعت اتمک ائستمیه‌سئنئز، من ده سئزه گوناهلارینیزا گؤره یدّی قات آرتیق بلا گؤندَ‌ره‌رم.
[22] اوستونوزه وحشی حیوانلار گؤندَ‌ره‌رم کی، اؤولادلارینیزی اؤلدوروب مال-حیوانلارینیزی پارچالایالار و سایینیزی آزالدالار و یوللارینیز ترک اولونموش قالار.
[23] اگر بونلاردان عئبرت درسی آلماییب منه دؤنمه‌یه‌سئنئز و حله ده منئمله عداوت اده‌سئنئز،
[24] من ده سئزئنله عداوت اده‌جیم و گوناهلارینیزا گؤره سئزی یدّی قات آرتیق جزالاندیراجاغام.
[25] عهدی پوزدوغونوزا گؤره قئصاص آلماق اوچون اوستونوزه قیلینج گؤندَ‌ره‌جیم. شهرلرئنئزده سیغیناندا آرانیزا وبا سالاجاغام کی، دوشمنئن اَلئنه دوشه‌سئنئز.
[26] چؤره‌یئنئزی کسدئیئم زامان، اون آرواد بئر تندئرده چؤرک پئشئره‌جک و اونو چکی ائله پایلایاجاقلار، اله کی، ییئب دویمایاسینیز.
[27] اگر سئز بوندان سونرا دا مندن ائطاعت اتمَیه‌سئنئز و منئمله عداوت اده‌سئنئز،
[28] بو دفه من ده سئزئن حاقّینیزدا قضبله عداوت اده‌جیم و من، بلی من، سئزی گوناهلارینیزا گؤره یدّی قات آرتیق تنبه اده‌جیم.
[29] اوغوللارینیز و قیزلارینیزین اَتئنی یئیه‌جکسئنئز.
[30] سجده‌گاهلارینیزی محو ادئب، بوخور قوربانگاهلارینیزی یوخ اده‌جیم، بوتلرئنئزی دِوئره‌جیم و سئزئن مِیئتلرئنئزی بوتلرئنئزئن مِیئتلرئنئن اوستونه سَره‌جیم، چونکی جانیم سئزدن ائیره‌نه‌جکدئر.
[31] شهرلرئنئزی خارابا قویاجاغام، موقدّس مکانلارینیزی وئرانه‌لئیه دؤندَ‌رئب، خوش عطئرلرئنئزی قبول اتمیه‌جیم.
[32] اؤلکه‌نئزی اله وئرانه قویاجاغام کی، اورانی ائشغال ادن دوشمنلرئنئز، دهشته دوشسونلر.
[33] لاکئن سئزی مئلّتلر آراسینا داغیداجاغام و آرخانیزجا قیلینجلا دوشه‌جیم. تورپاغینیز وئرانه‌لئیه، شهرلرئنئز خارابالیغا دؤنه‌جک.
[34] سئز دوشمن تورپاغیندا یاشایارکَن، اؤلکه بوتون وئرانلیق گونلرئنده سَبّتلرئنی توتاجاق؛ بوتون بو واخت عرضئنده اؤلکه دئنجه‌لئب سَبّت ائللرئنی توتاجاق.
[35] اؤلکه بو وئرانلیق گونلرئنده، او راحاتلیغی گؤره‌جک کی، سئزئن اورادا یاشادیغینیز سَبّتلرئنئزده گؤرمه‌دی.
[36] دوشمن اؤلکه‌لرئنده سئزدن صاغ قانلارین اورَکلرئنه اومئدسئزلئک سالاجاغام و اونلار حتّا کولَکدن تَرپه‌نَن یارپاغین خیشیلتیسیندان قورخوب قاچاجاقلار. اونلاری قووان اولماسا دا، قیلینج قاباغیندان قاچان کئمی قاچیب ییخیلاجاقلار؛
[37] بئربئرئنئن اوستونه اله بودره‌یه‌جکلر کی، اله بئل، قیلینج قاباغیندان قاچیرلار، حال بو کی، هچ کئم اونلاری قووالامیر؛ دوشمنلرئنئز موقابئلئنده دورماغا قووّتئنئز اولمایاجاق.
[38] مئلّتلر آراسیندا هلاک اولاجاقسینیز، دوشمنلرئنئزئن تورپاغی سئزی اوداجاق.
[39] سئزدن صاغ قالانلار دا دوشمن اؤلکه‌لرئنده هم اؤز خاطالاری اوچون، هم ده آتالارینین خاطالاریندان اؤتری اونلارلا چورویه‌جکلر.
[40] اگر اؤزلرئنئن و آتالارینین خاطالارینا اعتئراف ادئب، منئم ضئدّئمه اتدئیی خَیانته، هم ده منئمله اتدئیی عداوته ائقرار اده‌لر،
[41] و بونا دا کی، من اونلارلا عداوت ادئب اونلاری دوشمنلرئنئن تورپاغینا آپارمیشام. اگر اونلارین ختنه اولونمامیش اورَکلری یومشالیب خاطالارینی قبول اده‌لر.
[42] او زامان من یعقوبلا، ائسحاقلا، ائبراهئمله باغلادیغیم عهدئمی و اؤلکه‌نی خاطیرلایاجاغام.
[43] چونکی اؤلکه‌نی ترک اده‌جکلر و تورپاق اونلارسیز وئران قالیب سَبّت دئنجلرئندن لذّت آپاراجاق. بو آرادا اونلار اؤز خاطالارینین جزاسینی چکه‌جکلر، چونکی حؤکملرئمی ردّ اتدئلر و جانلاری منئم قانونلاریمدان ائیره‌ندی.
[44] بونا باخماییب، دوشمن اؤلکه‌سئنده یاشادیقلاری زامان، اونلارا خور باخیب ردّ اتمیه‌جیم. بله‌جه من اونلاری محو ادئب باغلادیغیم عهدئمی پوزمایاجاغام، چونکی اونلارین تاریسی رب، منم.
[45] آنجاق اونلارین حاقّیندا، اَجدادلاری ائله باغلادیغیم عهدی خاطیرلایاجاغام. او اجدالارینی کی، آیری مئلّتلرئن گؤزلری قاباغیندا، اونلارین تاریسی اولماق اوچون مئصئر تورپاغیندان چیخارتدیم. رب منم.“»
[46] بونلار ربّئن اؤزو ائله ائسرایئل اؤولادلاری آراسیندا، سئنا داغیندا موسا واسئطه‌سی‌ائله وردئیی قایدالار، حؤکملر و قانونلاردیر.