[1] سونرا رب موسایا دانیشیب ددی:
[2] «ائسرایئل اؤولادلارینا امر ات کی، سنه ائشیق اوچون خالئص سیخما زیتون یاغی گتئرسئنلر. بو یاغدان همئشه بئر چیراق
[3] حوضور چادیریندا، شهادت پرده‌سئنئن باییر طرفئنده یانسین. هارون اونو هر آخشام ربّئن حوضوروندا یاندیریب سحره قدر نظارت اتسئن. بو نسئلدن-نسئله سئزئن اوچون ابدی قایدا اولسون.
[4] ربّئن حوضوروندا خالئص قیزیلدان دوزَ‌لمئش چیراقدانداکی چیراقلارا همئشه نظارت اتسئن.
[5] نارین اون گؤتوروب، اون ائکی فطئر پئشئر؛ هر فطئرده بئر اِفانین اوندا ائکئسی قدر اون اولسون.
[6] اونلاری ربّئن حوضوروندا خالئص قیزیلدان دوزَ‌لمئش مئزه، ائکی سیرایا آلتی-آلتی قوی.
[7] هر سیرانین اوستونه خالئص کوندور قوی. چؤرکلرئن اوستونده‌کی کوندور ربّه اود تقدئمی اولان خاطئره تقدئمی اولسون.
[8] او گرک بو چؤرکلری هر سَبّت گونو دائم ربّئن حوضوروندا دوزسون؛ بو، ائسرایئل اؤولادلاری اوچون ابدی عهددئر.
[9] بو چؤرکلر هارونلا اؤولادلارینین پایی‌دیر. اونلار بو چؤرکلری موقدّس بئر یرده یسئنلر. چونکی بونلار ربّئن اود تقدئملرئندن لاپ موقدّس، هارون اوچون ابدی پای‌دیر.»
[10] بئر گون آناسی ائسرایئل‌لی، آتاسی مئصئرلی اولان بئر آدام، ائسرایئل اؤولادلارینین آراسینا چیخدی. او، دوشَرگه‌ده بئر ائسرایئل‌لی ائله ساواشدی.
[11] آناسی ائسرایئل‌لی اولان آدام تارینین آدینا کوفر و لعنت اتدی. او آدامی موسانین یانینا گتئردئلر. اونون آناسینین آدی شِلومئت، دئبری قیزی دان قبئله‌سئندن ائدی.
[12] او آدامی حبس ادئب گؤزله‌دئلر کی، ربّئن قراری اونلارا آیدین اولسون.
[13] رب موسایا دانیشیب، ددی:
[14] «لعنت اده‌نی دوشَرگه‌دن قیراغا چیخارت؛ قوی بو لعنتی اشئدنلرئن هامیسی، اللرئنی او آدامین باشینا قویسونلار. سونرا بوتون جاماعات اونو داشا باسسینلار.
[15] ائسرایئل اؤولادلارینا دانیشیب اونلارا دِه: ”تاریسینا لعنت ادن هر کس، اؤز گوناهینین آلتیندا قالاجاق؛
[16] بوندان علاوه، ربّئن آدینا کوفر دئین هر کس گرک اؤلومه ورئلسئن؛ بوتون جاماعات گرک اونو داشلاسین. ائستر قرئب اولسون، ائستر یرلی، تارینین آدینا کوفر ددئیئنده اؤلومه ورئلسئن.
[17] آیری بئر آدامین جانینی آلان هر کس گرک اؤلدورولسون.
[18] حیوانی اؤلدورن آدام، جان عوضئنه جان اولاراق، ضررئن عوضئنی ورسئن.
[19] بئر آدام آیری آدامی یارالاسا، او نه جور ادئب، اونا دا بله ادئلسئن:
[20] سینیق عوضئنه سینیق، گؤز عوضئنه گؤز، دئش عوضئنه دئش؛ او آداما نه جور یارا ووروبسا، اونا دا بله وورولسون.
[21] حیوان اؤلدورن، ضررئن عوضئنی ورسئن، آمّا آدام اؤلدورن آدام، اؤزو ده اؤلدورولسون.
[22] ائستر قرئب، ائستر یرلی سئزئن آرانیزدا بئر حؤکم اولاجاق؛ چونکی تارینیز رب، منم.“»
[23] موسا ائسرایئل اؤولادلارینا بونو ددی. لعنت اده‌نی دوشَرگه‌دن قیراغا چیخاردیب، داشا باسدیلار. ائسرایئل اؤولادلاری، ربّئن موسایا امر اتدئیی کئمی، بونا عمل اتدئلر.