[1] رب موسایا دانیشیب ددی:
[2] «دَرئسئنده جوزام اولان آدامین تمئزلَنه‌جیی گون حاقّیندا قانون بودور؛ بو آدام کاهئنئن یانینا گتئرئلدئکده
[3] کاهئن دوشَرگه‌دن قیراغا چیخیب، جوزاما توتولان ناخوشا باخسین؛ اگر جوزام علامتی صاغالیب،
[4] اوندا کاهئن تمئزلَنَن آدام اوچون امر اتسئن کی، ائکی تمئز دئری قوش، سئدر آغاجینین بوداغی، قیرمیزی ائپ و مَرجانکؤشک اوتو گتئرسئن.
[5] کاهئنئن امرئنه گؤره قوشلارین بئری ساخسی قابدا آخار سو اوستونده کَسئلسئن.
[6] سونرا کاهئن صاغ قالان قوشو، سئدر آغاجینین بوداغینی، قیرمیزی ائپی و مرجانکؤشک اوتونو گؤتوروب، اونلاری آخار سویون اوستونده کَسئلن قوشون قانینا باتیرسین.
[7] سونرا جوزامدان تمئزلَنَن آدامین اوستونه یدّی دفه قانی سَپئب، اونو تمئز اعلان اتسئن. صاغ قالان قوشو دا چؤله بوراخسین.
[8] تمئزلَنَن آدام پالتارلارینی یوسون، بوتون توکلرئنی قیرخسین، سو ائله یویونسون و تمئز اولسون. بوندان سونرا دوشَرگه‌یه گئره‌بئلر. لاکئن او، یدّی گون اؤز چادیریندان اِشئکده یاشاسین.
[9] یدّئنجی گون او آدام بوتون توکلرئنی قیرخسین: باشینی، ساقّالینی، قاشلارینی، حتّا بدنئنده‌کی بوتون توکلرئنی قیرخسین. سونرا پالتارینی یوسون، بدنئنی سو ائله یوسون و تمئز اولسون.
[10] سکّئزئنجی گون او آدام عیبسئز ائکی اِرکَک قوزو، بئر-ائلّئک عیبسئز دئشی قوزو، تاخیل تقدئمی اولاراق بئر اِفانین اوندا اوچ حئصّه‌سی قدر یاغلا قاتیلمیش نارین اون و بئر لوق یاغ گتئرسئن.
[11] تمئزلَنمه مراسئمی ائله مشغول اولان کاهئن، تمئزلَنَن آدامی و گتئردئیی تقدئملری حوضور چادیرینین گئرئشئنده ربّئن حوضورونا گتئرسئن.
[12] سونرا کاهئن اِرکَک قوزولارین بئرئنی گؤتوروب یاغ لوقو ائله تقصئر قوربانی اولاراق گتئرسئن. اونلاری ربّئن حوضوروندا یِللَتمه تقدئمی اولاراق تقدئم اتسئن.
[13] سونراسی اِرکَک قوزونو، گوناه قوربانی و یاندیرما قوربانی کَسئلن یرده، موقدّس ساییلان یرده کسسئن؛ چونکی گوناه قوربانی کئمی، تقصئر قوربانی دا کاهئنه عاییددیر. او قوربان لاپ موقدّسدئر.
[14] سونرا کاهئن تقصئر قوربانینین قانیندان بئر آز گؤتوروب، تمئزلَنَن آدامین صاغ قولاغینین مَرجه‌یئنه، صاغ الئنئن و صاغ آیاغینین باش بارماغینا چکسئن.
[15] کاهئن بئر آز یاغ لوقوندان گؤتوروب، سول اووجونا تؤکسون
[16] و صاغ الئنئن بئر بارماغینی سول اووجونداکی یاغا باتیریب، بارماغی ائله یاغدان بئر آزینی ربّئن حوضوروندا یدّی دفه سَپسئن.
[17] اووجوندا قالان یاغدان کاهئن تمئزلَنَن آدامین صاغ قولاق مَرجه‌یئنه، صاغ ال و صاغ آیاغینین باش بارماغینا، یعنی تقصئر قوربانینین قانیندان چکدئیی یِرلره سورتسون.
[18] کاهئن اووجونداکی یاغین قالان حئصّه‌سئنی بو تمئزلَنَن آدامین باشینا چکئب، بونونلا اونون اوچون ربّئن حوضوروندا کفّاره اتسئن.
[19] بوندان سونرا کاهئن گوناه قوربانینی کسسئن. بونونلا تمئزلَنَن آدام اوچون نجئسلئیئنی کفّاره اتسئن و سونرا یاندیرما قوربانینی کسسئن.
[20] کاهئن یاندیرما قوربانی و تاخیل تقدئمئنی قوربانگاهدا تقدئم اتسئن. بله‌جه کاهئن او آدام اوچون کفّاره ادر و او، تمئز ساییلار.
[21] اگر او آدام یوخسولدور و بو تقدئملره گوجو چاتمیر، اؤزونون کفّاره‌سی اوچون یِللَدئلن تقصئر قوربانی اولاراق بئر اِرکَک قوزو، تاخیل تقدئمی اولاراق یاغلا قاتیلمیش بئر اِفا نارین اونون اوندا بئرئنی، بئر لوق یاغلا،
[22] بئری گوناه قوربانی، او بئری یاندیرما قوربانی اولاراق ائکی قومرو قوشو، و یا ائکی گؤیرچئن گؤتورسون. بونلارا گوجو چاتار.
[23] سونرا سکّئزئنجی گون بونلاری کاهئنئن یانینا تمئزلَنمه‌سی اوچون، حوضور چادیرینین گئرئشئنده ربّئن حوضورونا گتئرسئن.
[24] کاهئن تقصئر قوربانی اولان قوزونو و بئر لوق یاغی گؤتوروب، یِللَتمه تقدئمی اولاراق ربّئن حوضورونا گتئرسئن.
[25] تقصئر قوربانی اولان قوزونو کسسئن. سونرا کاهئن تقصئر قوربانینین قانیندان بئر آز گؤتوروب، تمئزلَنَن آدامین صاغ قولاق مَرجه‌یئنه و صاغ اَلی ائله صاغ آیاغینین باش بارماغینا چکسئن.
[26] کاهئن یاغدان بئر آز سول اووجونا تؤکسون
[27] و صاغ الئنئن بئر بارماغی ائله سول اووجونداکی یاغدان ربّئن حوضوروندا یدّی دفه چئله‌سئن.
[28] اووجونداکی یاغدان، تمئزلَنَن آدامین صاغ قولاق مَرجه‌یئنه، صاغ الئنئن و صاغ آیاغینین باش بارماغینا، یعنی تقصئر قوربانینین قانینی چکدئیی یره چکسئن.
[29] کاهئن اووجونداکی یاغین قالان حئصّه‌سئنی تمئزلَنَن آدامین باشینا چکسئن. بونونلا اونون اوچون ربّئن حوضوروندا کفّاره اتسئن.
[30] سونرا بو آدام قووّتئنده اولان قومرو قوشلاریندان، یا دا گؤیرچئنلردن بئرئنی
[31] گوناه قوربانی، قووّتئنده اولان او بئرئسئنی ده تاخیل تقدئمی ائله بئرلئکده یاندیرما قوربانی اولاراق تقدئم اتسئن. بله‌جه کاهئن تمئزلَنَن آدام اوچون ربّئن حوضوروندا کفّاره اتسئن.
[32] بو، جوزام ناخوشلوغو اولان و تمئزلَنمه‌سئنه گوجو چاتمایان آدام اوچون قانوندور.»
[33] رب موسایا و هارونا ددی:
[34] «سئزه مولک اولاراق وره‌جیئم کَنَعان تورپاغینا گئرندن سونرا، من مولکونوز اولان اؤلکه‌نئزده، بئر اِوه کوف علامتی گؤندَ‌رسم،
[35] اِو صاحئبی گدئب کاهئنه خبر ورسئن: ”منه اِوئمده کوفه بَنزه‌ر بئر شی گؤرونوب.“
[36] کاهئن گلئب کوفه باخمادان، اِوئن بوشالتماسینا امر اتسئن کی، اِوده هر بئر شی نجئس ساییلماسین؛ سونرا گدئب او اِوه باخسین.
[37] علامته باخسین: اگر اِوئن دووارلاریندا یاشیل‌تَهر و یا قیرمیزیمتیل لکه وار و دووارین سطحئندن درئن گؤرونور،
[38] اوندا کاهئن اِودن قاپی‌یا چیخسین و اِوی باغلاییب یدّی گون قرنطئنه اتسئن.
[39] یدّئنجی گون کاهئن گلئب ائمتاحان اتسئن. اگر علامت اِوئن دووارلارینا یاییلیبسا،
[40] اوندا امر اتسئن کی، اونلار کوفلو داشلاری قوپارتسینلار و شهردن قیراغا، نجئس بئر یره آتسینلار.
[41] سونرا اِوئن ائچئنئن هر طرفی قاشینیلیب تمئزله‌نسئن و قاشیدیقلارینی شهردن قیراغا، نجئس بئر یره تؤکسونلر.
[42] قوپاریلمیش داشلارین یرئنه آیری داشلاری گؤتوروب قویسونلار، سونرا تزه مالا گؤتوروب، اِوی مالالاسینلار.
[43] اگر داشلاری قوپارتدیقدان و اِوی قاشی‌ییب مالالایاندان سونرا، گئنه ده اِوده کوف علامتی عمله گلسه،
[44] کاهئن گلئب باخسین. اگر علامت اِوه یاییلیبسا، اِوده فاسئد بئر کوف وار. او نجئسدئر.
[45] بله حالدا او گرک اِوی سؤکسون و اونون داشلارینی، تاختالارینی، بوتون مالاسینی شهردن قیراغا، نجئس بئر یره آتسین.
[46] اِوئن قرنطئنه اولدوغو واخت، اِوه گئرن هر بئر آدام آخشاما قدر نجئسدئر.
[47] او اِوده یاتان و یئین آدام پالتارلارینی یوسون.
[48] لاکئن اگر اِو مالالاناندان سونرا، کاهئن گلئب اِوه باخسا و گؤرسه کی، علامت اِوه یاییلماییب، او، اِوی تمئز اعلان اتسئن، چونکی کوف کچئب گدئب.
[49] اِوی تمئز اتمک اوچون او ائکی قوش، سئدر آغاجینین بوداغی، قیرمیزی ائپ و مَرجانکؤشک اوتونو گؤتوروب،
[50] قوشلارین بئرئنی ساخسی قابدا آخار سو اوستونده کسسئن.
[51] سونرا کاهئن سئدر آغاجینین بوداغینی، مَرجانکؤشک اوتونو، قیرمیزی ائپی و صاغ قالان قوشو گؤتوروب، کَسئلن قوشون قانینا و آخار سویا باتیرسین و اِوه یدّی دفه سَپئب
[52] قوشون قانی، آخار سو، صاغ قالان قوش، سئدر آغاجینین بوداغی، مَرجانکؤشک اوتو و قیرمیزی ائپله او اِوی تمئز اتسئن.
[53] کاهئن صاغ قالان قوشو شهردن قیراغا، چؤله بوراخسین. بله‌جه او اِوی کفّاره اتسئن کی، اِو، تمئز ساییلسین.
[54] بو، هر جور جوزام علامتی، حتّا قوتور،
[55] پالتارلاردا و اِولرده عمله گلن کوف،
[56] شئش، سَپمه و لکه اوچون تعلئماتدیر
[57] کی، نه واخت نجئس، نه واخت تمئز ساییلمالاری باره‌ده اونلارا اؤیرتسئن. جوزام و کوف حاقّیندا اولان قانون بودور.»