[1] Jesusasti jupanakarux sarakïnwa: —Qhanak sapxsma, jumanakat yaqhipanakax janïraw jiwapkaniti, Diosan qhapaq markap jach'a ch'amapampi purinir uñjañkamaxa —sasa.
[2] Ukat suxtür saraqatarusti, Jesusax Pedrompiru, Santiagompiru, Juanampirukiw mä jach'a qullu patar irpäna. Ukansti Jesusan uñnaqapax muspharkañaw jupanakan nayraqatapan mayjt'awayäna.
[3] Isinakapas k'ajkir khunjam suma janq'uruw tuküna, janipuniw khitis qawqha t'axsusas ukham janq'u tukuykaspati.
[4] Ukatsti Eliasampiru, Moisesampiruw Jesusampi parlasipkir uñjapxäna.
[5] Ukat Pedrox Jesusar säna: —Yatichiri, ¡wali sumaw akankatasaxa! Nanakax kimsa chhujlla lurapxä: mayax jumataki, mayax Moisesataki, mayasti Eliasataki —sasa.
[6] Jupanakasti wali mulljatäpxänwa, ukat Pedrox kuna arsutapsa jan amuyaskänti.
[7] Ukapachaw mä qinayax jupanakar ch'iwxattäna. Uka qinay taypitsti mä aruw ist'asïna: “Akaw nayan munat Wawaxaxa. Jupar ist'apxam” sasa.
[8] Uñatatasiñkamasti mayninakax chhaqhatäxänwa, Jesús saparukiw uñkatxapxäna.
[9] Qullut saraqankasasti, Jesusax jupanakaruw iwxt'äna: Kuntix uñjapkta ukxa janipuniw khitirus arsupxätati, jan ukasti kunapachatix Jaqin Yuqapax jiwatat jaktxani ukkhakiw arsupxäta, sasa.
[10] Jupanakasti amukiw chuyma manqhapar kuntix uñjapkän uk imxäsipxäna, ukampis jupanakkamaw jiskt'asipxäna: ¿Kun sañarak munpacha “Jaqin Yuqapax jiwatat jaktxani, sasasti?” sasa.
[11] Ukat Jesusarux jiskt'apxäna: —¿Kunatarak kamachi yatichirinakasti “Eliasaw nayraqat jutañapa” sapxisti? —sasa.
[12] Jupasti ukxarux sänwa: —Ukax chiqapunïskiwa, Eliasapuniw nayraqat jutaski, taqi kunsa juparakiw askichani. Ukatsti, ¿kunatarak Qillqatanakansti Jaqin Yuqapax t'aqhisiniwa, jisk'achatarakïniwa sisti?
[13] Ukampis nayax sapxsmawa, Eliasax purinxiwa, juparusti kuntix lurañ munapkäna uk lurapxäna, kunjämatix Qillqatanakax siskän ukhamar phuqhasa —sasa.
[14] Ukatsti mayni yatiqirinakapan ukar kutt'anxasin jupanakar walja jaqinakamp muyuntat uñjapxäna, kamachi yatichirinakasti jupanakampiw ch'axwasipkäna.
[15] Jesusar uñjasinsti taqiniw muspharapxäna, jalanisinsti juparuw aruntapxäna.
[16] Ukatsti Jesusax jupanakaruw jiskt'äna: —¿Kunxatsa jumanakax jupanakampi ch'axwasipkta? —sasa.
[17] Jaqinak taypit mayniw arsüna: —Yatichiri, wawaxaruw juman ukar irpanta, ñanqha ajayuw mantasin amutur tukuyi.
[18] Kawkhansa uka ñanqha ajayux uraqir liwnuqaskakiwa; lakapat jupuquw juti, laka ch'akhapsa aliqapuniw t'urusi, ukatsti jan unxtkir tukuyi. Yatiqirinakamaruw uka ajayu alisnukuñapatak achikt'asta, jupanakasti janiw alisnukurjamäpkiti —sasa.
[19] Jesusasti jupanakarux sänwa: —¡Jan iyawsañan jaqinaka! ¿Kunapachkamas jumanakampikïskäxa? ¿Kunapachkamas jumanakax ch'am tukuyapxitäta? Irptanipxam uka waynaru —sasa.
[20] Ukat uka waynarux Jesusan ukar irptanipxäna. Kunapachatix uka ñanqha ajayux Jesusar uñjkän ukkhaxa, uka waynarux wal thalayäna, jupasti uraqir liwnuqtasaw sunt'isïna, lakapatsti jupuquw jutarakïna.
[21] Jesusasti uka waynan awkiparuw jiskt'äna: —¿Kunapachatsa ukham lurasi? —sasa. Awkipasti sänwa: —Wawatpachaw ukhama.
[22] Walja kutirakiw ñanqha ajayux ninarus umarus jupar jiwayañatak jaqunti. Qullt'arapitasma ukax walïspawa, nanakat khuyapt'ayasipxita, yanapt'apxarakitaya —sasa.
[23] Jesusasti sänwa: —Jumatix iyawsasmaxa, lurasispawa. Iyawsir jaqitakix taqi kunas wakisikiwa —sasa.
[24] Uka waynan awkipasti ukspachaw jach'at arsüna: —Iyawstwa. ¡Juk'amp iyawsañaxatak yanapt'itaya! —sasa.
[25] Jesusasti walja jaqinak muyuntanir uñjasinxa, ñanqha ajayurux tuqinuqänwa: —Ñanqha uqar amut ajayu, nayaw sisma: Mistum jupata, janirak mayampis mantamti —sasa.
[26] Ukatsti ñanqha ajayux warart'asisaw ch'amamp thalasiyäna. Ukat uka waynat mistuwayxäna jiwatjam jaqunukuwayasa. Waljanirakiw: “Jiwatawa” sapxäna.
[27] Ukampis Jesusax amparat waytasin sayt'ayäna, waynasti sayt'xänwa.
[28] Ukxarusti Jesusax mä utaruw mantäna, sapakïskipansti, yatiqirinakapax juparuw jiskt'asipxäna: —¿Kunatarak nanakataki uka ñanqha ajayur alisnukuñatak ch'amasti jan utjapkitusti? —sasa.
[29] Jesusasti jupanakarux sänwa: —Ukham ñanqha ajayunakarux, Tatitut mayisiñampikiw alisnukusispa —sasa.
[30] Uka chiqat sarxasinsti, Galilea chiq sarakipawayapxäna. Jesusasti janiw khitin yatiñapsa munkänti,
[31] yatiqirinakapar yatichaskatap layku. Ukat säna: —Jaqin Yuqapax jaqinakan amparapar katuyatäniwa; jupanakasti jiwayapxaniwa, ukatsti kimsür jiwatat jaktxani —sasa.
[32] Yatiqirinakasti Jesusan parlatap janiw amuyt'apkänti, jupar jiskt'añsa axsarapxarakïnwa.
[33] Ukatsti Cafarnaúm markaruw puripxäna. Utankxapxän ukkhasti, Jesusax yatiqirinakaparuw jiskt'äna: —¿Kunxatarak jumanakasti thakhin ukataq parlapxtasti? —sasa.
[34] Jupanakasti janiw arsuñ munapkänti, thakhin ¿khitis jiwasanak taypin jilïrixa?, sasa parlapxatapata.
[35] Ukatsti Jesusax qunt'asisin tunka payan yatiqiriparuw jawsäna, ukatsti sarakïnwa: —Khititix jilïrïñ munki ukaxa, taqinit qhipankañapawa, ukatsti taqinir luqtañaparakiwa —sasa.
[36] Ukatsti Jesusax mä yuqall wawaruw jupanak taypir sayt'ayäna, amparapar ichxarusinsti, sänwa:
[37] —Khititix akham wawaru nayan sutixan katuqki ukaxa, nayaruw katuqitu; nayar katuqiristi, janiw nayarukit katuqki, jan ukasti khithankitu ukaruw katuqaraki —sasa.
[38] Juanasti Jesusarux sänwa: —Yatichiri, mayniruw sutim aytasis ñanqha ajayunak alissuskir uñjapxta, ukampis nanakax jan ukham luramti sapxtwa, jupan jan jiwasanakamp chik sarnaqatap layku —sasa.
[39] Jesusasti sänwa: —Jan jark'apxamti, janiw khitis nayan sutixar muspharkañanak lurasin nayxat jan wal parlkaspati.
[40] Khititix jiwasar jan uñiskistu ukaxa, jiwasampïskiwa.
[41] Khititix jumanakar Cristonkapxatam layku mä juk'a umaksa waxt'apxätamxa, chiqpachansa uka jaqix mä churäwi katuqani —sasa.
[42] “Khititix nayar iyawsir jisk'a wawanakar juchar puriyaspa ukkhaxa, uka jaqix mä jach'a molino qalampi kunkar chinuntasin quta manqhar jaquntatäñapax walïspawa.
[43] Amparamatix juchar puriyañ munstamxa, walïspaw khariqxañamaxa, ukatsti juk'amp sumäspaw wiñay jakañar ch'ulla amparani mantañamaxa, pä amparanpach manqhapachar mantañamat sipana, kawkhantix aqkir ninax jan jiwt'ki ukkharu.
[45] Kayumatix juchar puriyañ munstamxa, walïspaw khariqasxañamaxa, ukatsti juk'amp sumäspaw ch'ulla kayuni wiñay jakañar mantañamaxa, pä kayunpacha manqhapachar jaquntatäñamat sipana.
[47] Nayramatix juchar puriyañ munstamxa, apsxam, ukatsti juk'amp sumäspaw Diosan markapar ch'ulla nayrani mantañamaxa, pä nayranpacha manqhapachar jaquntatäñamat sipana,
[48] kawkhantix laq'unakas jan jiwarki, ninas janirak jiwt'ki ukkharu.
[49] “Diosax taqiniruw q'umachani, kunjämtix jayumpisa, ninampis q'umachktan ukhama.
[50] Jayux sumawa; jayutix ch'aphaqsuspaxa, ¿kunampirak suma jayu tukuyapxasmasti? Jumanakax suma jayur uñtatäpxam, ukatsti sumankañan jumanak purax jakapxarakim.