[1] Jesusax Tatitun utapat mistusinkän ukkhaw maynïr yatiqiripax juparux säna: —¡Yatichiri, kunja sumas aka qalanakaxa, utanakasa! —sasa.
[2] Jesusasti juparux sänwa: —¿Aka jach'a utanak uñjtati? Mä urux aka utanakax q'ala tinkuyataw uñjasini —sasa.
[3] Ukatsti Tatitun utap uñkatasinkki uka Olivos qulluruw sarapxäna. Jesusax ukkharuw qunt'asïna, ukatsti Pedrompi, Santiagompi, Juanampi, Andresampiw jiskt'apxäna:
[4] —Tatay, sapxita, ¿kunapachas ukanakax phuqhasxani? ¿Kuna unañchas utjani taqi ukanak janïr phuqhaskipanxa? —sasa.
[5] Jesusasti jupanakarux sänwa: “Wal amuyasipxam, janiw khitimpis sallqjayasipxätati.
[6] Waljaniw nayan sutixar jutapxani: ‘Nayätwa Cristox’ sasa. Jupanakasti waljaniruw sallqjapxani.
[7] “Kunapachatix ch'axwanakat ist'apxäta, nuwasiñanakan utjañap yatipxarakïta ukkhax janiw axsarapxätati. Ukham lurasiñapaw wakisi; ukampis ukkhax janïraw aka pachan tukusiñ urupäkaniti.
[8] Mä jach'a markax yaqha jach'a markampiw ch'axwantani, mä marka apnaqiristi yaqha marka apnaqirimpiw nuwasini, uraq khathatinakaw walja chiqan utjani; jaqix janiw kuna manq'añsa jikxatkxaniti. Taqi ukanakasti jach'a t'aqhisiñan qalltapakïskaniwa.
[9] “Ukampis jumanakax amuyasipxam; markan jilïrinakaparuw jumanakarux katuyapxätam, sinagoganakansti jawq'jataw uñjasipxäta. Jumanakarusti nayar arkapxatam laykux, jupanakar nayxat qhanañchapxañamatakiw jilïrinakampina, reyinakampin nayraqatapar irpapxätam.
[10] Akapach janïr tukuskipansti, wakisiw nayan qhispiyasiñaxan taqi jaqinakar yatiyatäñapa.
[11] Kunapachatix jilïrinakar katuyapkätam ukkhaxa, janiw llakisipxätati kuntix sapxañamäki ukanakatxa. Jan ukasti kuntix Diosax sapkätam uk parlapxäta, janiw jumanakat parlapkäta, jan ukasti Qullan Ajayuw parlaskani.
[12] Mä jilax jilaparuw jiwayañatak aljantani, awkisti yuqaparuw aljantarakini; wawanakasti awkip taykapatakiw sayt'asipxani, ukatsti jiwayapxarakiniwa.
[13] Naya laykux taqinin uñisit sarnaqapxäta, ukampis khititix tukuykam sayt'kani, ukakiw qhispiyatäni.
[14] “Kunapachatix jumanakax ukham ñanqha lurañanak jan wakiskir chiqan uñjapkät ukkhaxa, (khititix ullarki ukax amuyt'pan), Judeankirinakax qullunakar jaltxapxpan;
[15] khititix uta patankaskani ukasti, jan saraqanpati, janirak kun apsuris utapar mantpati;
[16] pampankiristi janirak isip aptasiris utapar kuttanpati.
[17] ¡Ay, kunakïkan uka urunakan usur jaqi warminakatakixa, ukhamarak jisk'a wawanakanitakisa!
[18] Diosatay mayisipxam uka jan wali urunakax jan jallupachäñapataki,
[19] ukürunakax sinti t'aqhisiñ urunakäniwa, Diosax akapach lurkäna ukkhat jichhürkamax ukham t'aqhisiñax janiw utjkänti, janirakiw uka qhipatsa ukham t'aqhisiñax utjkaniti.
[20] Tatitutix uka urunak jan jisk'aptaykaspaxa, janiw khitis qhispiyaskaspati; ukampis ajllitanakapar munasin jupax ukürunak jisk'aptayani.
[21] “Maynitix jumanakar sapxätam: ‘Uñtapxam, akankiw Cristoxa, jan ukax, khayankiw jupaxa’ sasaxa, jan iyawsapxamti.
[22] K'ari cristonakampi, k'ari profetanakampiw sartani, ukatsti jaqinakar pantjayañatakix unañchanakampi, muspharkañanakamp lurapxani, Diosan ajllitanakaparus pantasiyañ munapxani.
[23] ¡Wal amuyasipxam! Ukanak janïr luraskipan taqi kun yatiyapxsma.
[24] “Khä urunakansti uka t'aqhisiñanak qhipatxa, intix ch'amakt'aniwa, phaxsisti janiw qhankxaniti,
[25] warawaranakasti alaxpachat williqtanxaniwa, taqi kunanakatix alaxpachan utjki ukanakas khathatirakiniwa.
[26] Ukapachaw Jaqin Yuqaparux qinay taypin jutaskir uñjasini, jach'a ch'amampi, k'ajkir qhapaq kankañapampi.
[27] Jupasti angelanakaruw khithanini, taqi tuqit ajllitanakapar anthapipxañapataki, akapach thiyatpacha, alaxpach thiyakama.
[28] “Higo quqat yatiqasipxam: Kunapachatix layminakapax ch'uxñatatki, laphinakapas uñstkaraki, ukapachaw jallupachan jak'ankxatap yatipxäta.
[29] Ukhamarakiw jumanakax taqi ukanak phuqhasir uñjasinxa, niya tukuy urunakan jak'ankatapa, punkunkxatap yatipxäta.
[30] Qhanak sapxsma, jichha pacha jakir jaqinakan janïr jiwarkipan taqi ukanakax phuqhasini.
[31] Alaxpachampi akapachampix tukusiniwa, arunakaxasti janiw tukuskaniti.
[32] “Ukampis uka urumpita, pachampitxa, janiw khitis yatkiti, alaxpachankir angelanakas janiw yatkiti, Diosan Yuqapas janiw yatkiti, jan ukasti, Dios Awki sapakiw yati.
[33] “Ukhamasti jumanakax amuyasipxam, suyapxarakim, janiw yatipktati kuna pachas purinin ukxa.
[34] Ukax akhamar uñtatawa: Sañäni, mä jaqix jayar sarañ amti, janïr sarkasaw uywatanakapar uta uñjapxañapatak iwxt'i. Sapa mayniruw lurañanakap jaytawayi, uta uñjirirusti sum uñjañapatakiw jaytaraki.
[35] Ukatsti jupanakax wali amuyumpiw sarnaqapxi, janiw yatipkiti utanin kunür puriniñapsa, inas arumarüchini, chika arumarüchini, wallpa art'arüchini, qhantatirüchini. Ukhamarakiw jumanakax wali amuyumpi suyapxañamaxa,
[36] ukatarak akatjamat purinisin ikiskir katjasipkirisma.
[37] Jumanakar sapksma ukxa, taqiniruw sarakta, ¡amuyasipxapunim!” sasa.