[1] Willjtanipansti, jilïr sacerdotenakampi, jilïr jaqinakampi, kamachi yatichirinakampi, jach'a Jilïr Tantachasïwimppachaw niya parlthapipxäna. Ukatsti Jesusar ñach'antat irpapxäna, Pilatoruw katuyapxäna.
[2] Pilatosti Jesusarux jiskt'änwa: —¿Chiqat jumax judionakan reyipätaxa? —sasa. Jesusasti ukxarux sänwa: —Jïsa, ukhamapunïskiwa, jumaw sasktaxa —sasa.
[3] Jilïr sacerdotenakasti kunayman tuqit juparux juchañchapxäna.
[4] Pilatosti wasitat Jesusarux jiskt'äna: —Taqi kunat juchañchapxtamxa. ¿Janit kuns arskäta? —sasa.
[5] Jesusasti ukham siskatpachas janiw kuns arskänti; ukatsti Pilatox wali mayjt'ataw qhiparäna.
[6] Pilatox sapa Pascua urun carcelar jist'antat mä jaqir antutirïna, uksti jaqinakan mayitaparuw phuqhirïna.
[7] Mä jaqiw utjäna, Barrabás sutini, jupasti masinakapamp chikaw carcelan jist'antataskäna. Jupanakasti mä kutix jilïrinakatak sayt'asisaw jaqinak jiwarayapxäna.
[8] Jaqinakasti Pilaton ukar jutasinxa, kunjämtix jupax antutjirïkän ukham lurañapatakiw mayipxäna.
[9] Pilatosti jaqinakarux sänwa: —¿Judionakan Reyipar antutañaxti munapxta? —sasa.
[10] Jupax yatïnwa jilïr sacerdotenakan Jesusar uñisiñat katuyapxatapa.
[11] Jilïr sacerdotenakasti jaqinakaruw amtayapxäna Barrabasar antutjayañapataki.
[12] Pilatosti wasitat jaqinakarux jiskt'äna: —Ukhamax ¿kuna lurañaxsa munapxta, judionakan Reyipaw sapkta juparuxa? —sasa.
[13] Jupanakasti jach'at art'apxäna: —¡Ch'akkatam! —sasa.
[14] Pilatosti jupanakarux sänwa: —¿Kuna jan walinakarak luristi? —sasa. Jupanakasti wali jach'at art'apxäna: —¡Ch'akkatam! —sasa.
[15] Pilatosti jaqinakamp sumankañ munasinxa, Barrabasaruw antutxäna; Jesusarusti jawq'jayänwa, ukatsti cruzar ch'akkatatäñapatakiw katuyxarakïna.
[16] Ukatsti romano soldadonakax reyin utapan uta anqaparuw Jesusarux irpapxäna, ukarusti tampach soldadonakaruw jawsthapipxäna.
[17] Mä ch'iyär wila isimpiw Jesusarux isintayapxäna, p'iqiparusti ch'aphit lurat pillumpiw asxatapxäna.
[18] Ukatsti larusisaw aruntapxäna. —¡Judionakan Reyipax jach'achatäpan! —sasa.
[19] Mä lawampiw p'iqit jawq'japxäna, thuskatapxarakïna, ukatsti killt'asisin larusiñampiw yupaychapxäna.
[20] Ukham larusipxatap qhipatsti, ch'iyär wila isi apsusin jupan isipampiw isthapiyapxäna, ukatsti cruzar ch'akkatañatakiw irpsuwayxapxäna.
[21] Ukapachaw Cirenenkir Simonax yaput jutaskäna, jupax Alejandrompin Rufompin awkipänwa. Uka chiq saraskipan juparux Jesusan cruzap q'ipiyapxäna.
[22] Jesusarux Gólgota sutini chiqaruw puriyapxäna, ukasti “Calavera” sañ muni;
[23] ukatsti mirra qullamp kittat vino churapxäna, ukampis Jesusax janiw uk umt'añ munkänti,
[24] ukat Jesusarux cruzar ch'akkatapxäna. Soldadonakasti Jesusan isip lakinuqasiñatakiw suertet jaqtapxäna.
[25] Ch'akkatapkän ukkhax niya llätunka pachaw uka urut saraqxäna.
[26] Qillqata uchapkäna, ukasti sänwa: “Akax judionakan Reyipawa” sasa, ukxat jupar juchañchapxatap layku.
[27] Jesusamp chiksti pani lunthataruw ch'akkatapxäna, maynirux kupïxaparu, maynirusti ch'iqäxaparu.
[28] Ukhamaw Qillqatanakan siski ukax phuqhasïna: “Ñanqha luririnakamp chika uñjatänwa” sasa.
[29] Uka chiq saririnakasti Jesusarux tuqipxänwa, p'iqinakap khiwisaw sapxäna: —¡Jumax Tatitun utap t'unjasin kimsürut sayt'ayañakxay munchïyätaxa,
[30] jichhax jumapach qhispiyasim, cruzatsa saraqanirakim —sasa.
[31] Uka kipkarakiw jilïr sacerdotenakasa, kamachi yatichirinakas Jesusat larusipxäna. Jupanakasti sapxarakïnwa: —Mayninakarupï qhispiyi, jupapachasti janiw qhispiyasirjamäkiti.
[32] ¡Israelan Reyip Cristox cruzat saraqanpan, uk uñjasin jupar iyawsañäni! —sasa. Jupamp chik ch'akkatatäpkän ukanakas ukhamarakiw tuqipxäna.
[33] Chika ururusti akapachax niya chika jayp'ukamaw ch'amakt'äna.
[34] Ukapachaw Jesusax jach'at art'asïna: “Eloí, Eloí, ¿lemá sabactani?” sasa. (Ukax sañ muni: “Diosaxay, Diosaxay, ¿kunatsa jaytanukusta?”).
[35] Uk ist'asinsti ukankirinakat yaqhipax sapxänwa: —Ist'apxam. Elías profetaruw jawsaski —sasa.
[36] Maynisti jank'akiw mä esponja jikxatäna, vinagrer uk chilltasaw mä suqus lawar chinkatasin Jesusan umt'añapatak aykatäna, ukat säna: —Uñjañäni, kamisakiy Eliasax jupar cruzat apaqir jutchini —sasa.
[37] Jesusasti jach'at art'asisaw tukusiwayxäna.
[38] Ukapachasti Tatitun utapankkis uka jach'a cortinax payaruw ch'iyjtawayäna, amstat aynacharu.
[39] Jesusar uñch'ukiskän uka romano capitanasti jupar jiwir uñjasin sänwa: —Chiqpachapuniw aka jaqix Diosan wawapäpacha —sasa.
[40] Mä qawqha warminakarakiw jayat uñch'ukisipkäna; jupanak taypinkänwa Magdalankir María, Joseampina, Santiagompin taykap María, Salomé sutin warmimpi.
[41] Uka warminakasti Jesusax Galilean sarnaqkän ukapachaw jupar arkapxäna, yanapapxarakïna. Ukhamarus walja yaqha warminakaw Jerusalenkam Jesusar arkanipxäna.
[42] Niy jayp'untxänwa, ukürux sábado urutak wakichasiñ urünwa, ukax sañ muni, viernes jayp'ünwa.
[43] Ukxarusti Arimateankir Joseaw jutäna, jupasti Jach'a Tantachasïwi taypin mä jilïrirakïnwa, jupas Diosan qhapaq markap suyarakïna. Jupax jan axsarasaw Pilaton ukar mantäna, ukatsti Jesusan amayap mayïna.
[44] Pilatosti Jesusan jiwxatap yatisinxa, musphataw uñjasïna, ukat capitanar jawsayasin chiqat Jesusax jiwxi sas jiskt'äna.
[45] Capitanan yatiyatasti, Pilatox Jesusan amayap Josear katuyxäna.
[46] Joseasti jila alani suma isi aläna, Jesusan amayap cruzat apaqasinsti uka isimpiw llawuntäna. Ukatsti qarqar p'iysut mä sepulturaruw imxäna, ukarusti mä jach'a qalampiw punkut atkatarakïna.
[47] Magdalankir Mariampi, Josean taykapäkis uka Mariampisti, kawkharutix Jesusan amayap imapkäna uk sum uñjapxäna.