[1] Jesusax Cafarnaúm markat mistusinxa, Judea uksa tuqinakaruw saräna, ukhamarak Jordán jawir khurkata tuqinakaru. Ukansti wasitat jaqinakax Jesusan ukar jutapxäna, jupasti yatichirïkän ukham wasitat jupanakar yatichäna.
[2] Fariseonakasti Jesusar jak'achasisin jupar pantjayañatakiw jiskt'apxäna: —¿Wakisiti mä chachax warmipampi jaljtañapaxa? —sasa.
[3] Jesusasti jupanakarux sänwa: —¿Kun lurapxäta sapxtamsa Moisesaxa? —sasa.
[4] Jupanakasti sapxänwa: —Moisesax: ‘Jaljtañ qillqat churasin warmir apanukuñax wakisiskiwa’ sapxituwa —sasa.
[5] Jesusasti ukxarux sänwa: —Moisesax qala chuymanïpxatam laykuw uka kamachi arunak jaytawayapxtam.
[6] Ukampis taqi kunan qalltapanxa, ‘Diosax chacha warmi luräna.
[7] Ukatpï chachax awkipsa, taykapsa jaytxanixa, warmipampi mayachasxañataki,
[8] panpachanisti mä sapa janchïpkaspas ukhamäniwa’. Ukhamasti janiw panïkxiti, jan ukasti mä janchikïxapxiwa.
[9] Ukhamasti, kuntix Diosax mayar tukuyki ukarux janiw jaqix jaljtayañapäkiti —sasa.
[10] Utankxapxän ukkhasti, yatiqirinakapax wasitat Jesusarux ukxat jiskt'apxäna.
[11] Jesusasti jupanakarux sänwa: —Khititix warmipampi jaljtasin yaqhampi jaqichaschi ukaxa, nayrïr warmiparuw wachuq jucha luratapampix ñanqhachi;
[12] ukampis warmitix chachapar apanukusin yaqhampi jaqichaschi ukaxa, wachuq jucha luraraki —sasa.
[13] Ukxarusti wawanak Jesusan ukar irpanipxäna, amparapampi luqxatayañataki; ukampis yatiqirinakapax wawanak irpanirinakaruw tuqinuqapxäna.
[14] Jesusasti uk uñjasax phiñasïnwa, ukat sarakïna: —Wawanakax nayan ukar jutasipkpan sama, jan jark'apxamti, Diosan qhapaq markapax jupanakjamankiwa.
[15] Qhanak sapxsma, khititix Diosan qhapaq markap mä wawar uñtat jan katuqkan ukaxa, janiw kunapachas ukar mantkaniti —sasa.
[16] Wawanakar qhumantasinsti, amparapampi luqxatasaw jupanakarux aski waxt'äwip churäna.
[17] Kunapachatix Jesusax ukawjat sartawayañampïxän ukkhaxa, mä jaqiw jalakamak ukawjar purinïna, Jesusan nayraqatapar killt'asisin juparux jiskt'äna: —Suma yatichiri, ¿kuna lurañaxas wakisi wiñay jakañ katuqañatakixa? —sasa.
[18] Jesusasti juparux sänwa: —¿Kunatsa “Suma” sistasti? Janiw khitis sumäkiti, Dios sapakiw sumaxa.
[19] Kamachi arunak yattawa: ‘Janiw jiwayätati, janiw wachuq jucha lurätati, janiw lunthatasïtati, janiw khitirus k'arintätati, janirakiw k'arimpi kunsa apaqätati; awkimar taykamar jach'añcham’ —sasa.
[20] Uka jaqisti ukxarux sänwa: —Yatichiri, nayax jisk'atpach taqi uka kamachi arunak phuqhaskta —sasa.
[21] Jesusasti juparux munasiñampiw uñkatäna, ukatsti sarakïnwa: —May jan phuqktati: Saram, taqi utjirinakam aljaram, ukatsti jan kunaninakar churam. Ukhamat alaxpachan juman imasitamax waljäni. Ukatsti jutam, ukat nayar arkita —sasa.
[22] Jaqisti uk ist'asinxa wal llakthapisïna; ukham llakt'atarakiw sarawayxäna, wali qamirïtap layku.
[23] Jesusasti taqi tuqi uñatatasinxa, yatiqirinakaparuw säna: —¡Kunja ch'amas qamirinakatakix Diosan qhapaq markapar mantañapaxa! —sasa.
[24] Yatiqirinakapasti uk ist'asax muspharapxänwa, ukampis Jesusax jupanakarux saskakïnwa: —Wawanaka, ¡kunja ch'amas qullqi chuymäkis ukanakan Diosan qhapaq markapar mantañapaxa!
[25] Juk'amp jasakiwa mä aguja nayra chiqa mä camellon mistuñapaxa, Diosan qhapaq markapar mä qamirin mantañapat sipana —sasa.
[26] Uk ist'asinsti yatiqirinakapax juk'ampiw muspharapxäna, jupanakkamaw jiskt'asipxarakïna: —¿Ukhamasti khitikirak qhispiyatäspasti? —sasa.
[27] Jesusasti jupanakar uñkatasinxa, sänwa: —Jaqinakatakix ukax janiw luraskaspati, ukampis Diosatakix lurasikiwa, jupatakisti janiw kunas ch'amäkiti —sasa.
[28] Pedrosti ukxarux sarakïnwa: —Tatay, nanakax taqi kun jaytanukusin arkanipxsma —sasa.
[29] Jesusasti ukxarux sänwa: —Qhanak sapxsma, khititix nayar arkañ layku, ukhamarak Diosan arunakap qhanañchañ layku utap jaytanukuxa, jan ukax jilapsa, kullakapsa, awkipsa, taykapsa, wawanakapsa, uraqinakapsa,
[30] uka jaqix patakatsa juk'amp jila akapachan katuqxani: utanaka, jilanaka, kullakanaka, tayka, wawanaka, uraqinaka, ukanak katuqkasas uñisitaw sarnaqani; ukampis khä pachan wiñay jakañ katuqxani.
[31] Khitinakatix jichhürun nayrankki jupanakatxa, waljaniw qhipankxapxani; qhipankirinakatsti, waljanirakiw nayrankxapxani —sasa.
[32] Jerusalén markaruw sarasipkäna, Jesusasti yatiqirinakapat nayra saräna. Jupanakasti muspharapxänwa, axsarasarakiw qhipapat arkapxäna. Jesusasti wasitat tunka payanir jawsasaw jupan t'aqhisiñapat yatiyäna:
[33] “Kunjämtix jumanakax uñjapkta, jichhasti Jerusalenaruw makhatasktan, ukan Jaqin Yuqapax jilïr sacerdotenakar katuyatäni, ukhamarak kamachi yatichirinakampiru, jupanakasti jiwayañatakiw juchañchapxani, ukatsti Roma markankir jilïr jaqinakaruw katuyapxarakini.
[34] Jupatxa larusipxaniwa; thuskatapxaniwa, jawq'japxaniwa, ukatsti jiwayapxaniwa; ukampis kimsa urut jiwatat jaktxani” sasa.
[35] Ukxarusti Santiagompi Juanampiw Jesusar makhatapxäna, jupanakasti Zebedeon yuqanakapänwa. Jak'achasisinsti sapxänwa: —Yatichiri, may achikt'asiñ munapxsma —sasa.
[36] Jesusasti jupanakarux sänwa: —¿Kuns jumanakax munapxta? —sasa.
[37] Jupanakasti sapxänwa: —Qhapaq markamanxa, juman jak'amaruy qunt'ayasipxita, maynirux kupïxamaru, maynirusti ch'iqäxamaru —sasa.
[38] Jesusasti jupanakarux sänwa: —Jumanakax janiw yatipktati kuntix mayipkista ukxa. ¿Jumanakax kuna t'aqhisiñatix nayatak jutki uk t'aqhisipxasmati? —sasa.
[39] Jupanakasti sapxänwa: —T'aqhisipxiristwa —sasa. Jesusasti sänwa: —Jïsa, ukhamäniwa. Jumanakax wal t'aqhisipxäta, kunjämtix nayax t'aqhiskä ukhama.
[40] Ukampis nayan kupïxaxaru ch'iqäxaxaru qunt'ayañax janiw nayan churañaxax wakiskiti, jan ukasti, ukax khitinakatakitix wakichatäki ukanakaruw churasini —sasa.
[41] Tunka yatiqiripasti, Santiagompin Juanampin mayitap yatisinxa, jupanakatakix wal thithipxäna.
[42] Ukampis Jesusax jupanakar jawsasin sänwa: —Jumanakax yatipxtawa, marka apnaqir jilïrinakax jupanakankkaspas ukham markanakarux tukuyapxi, jupanak taypinkir jilïrinakasti munañaparuw jaqinakarux apnaqapxi.
[43] Jumanakampisti janiw ukhamäñapäkiti. Ukatsipana jumanak taypin jilïrïñ munirix mayninakar luqtirïñapawa.
[44] Jumanak taypit nayrankañ munirixa, taqinir luqtañaparakiwa.
[45] Jaqin Yuqapasti janiw luqtayasir jutkiti, jan ukasti, luqtiriw juti; waljanir qhispiyañatakix jupa kipka jakañap apt'asiriw juti —sasa.
[46] Ukatsti Jericó markaruw puripxäna. Mä juk'ampjarusti Jesusax yatiqirinakapampi walja jaqinakamp chikt'ataw uka markat mistuskäna, ukansti mayjasir mä juykhu jaqiw thakxan qunt'atäskäna, jupasti Timeo chachan Bartimeo sat yuqapänwa.
[47] Uka juykhusti Nazaretankir Jesusätap ist'asinxa, jach'at art'äna: —¡Jesús, Davidan yuqapa, nayatay khuyapt'ayasita! —sasa.
[48] Uk ist'asinsti waljaniw amukt'añapatak tuqinuqapxäna. Ukampis juykhux juk'amp jach'at art'askakïnwa: —¡Davidan yuqapa, nayat khuyapt'ayasita! —sasa.
[49] Jesusasti uk ist'asin pachparuw sayt'äna, ukat sarakïna: —Irptanipxam —sasa. Irptir saririnakasti juykhurux sapxänwa: —Jan axsaramti, sayt'asim, jawsasktamwa —sasa.
[50] Juykhusti isip liwinukusin mäkiw sayt'asi, ukatsti Jesusan ukaruw jak'achasïna.
[51] Jesusasti juparux jiskt'änwa: —¿Kuna lurañaxsa munta? —sasa. Juykhusti sänwa: —Yatichiri, nayrat waliptxañ munta —sasa.
[52] Ukxarusti Jesusax sänwa: —Sarxam; iyawsatam laykuw k'umaräxtaxa —sasa. Juykhusti ukspachaw nayrat waliptasax wasitat uñjxäna, ukatsti Jesusaruw arkxaruwayxäna.