[1] Suma q'apkir qullanakat sipansa, aski jaqit uñt'atäñaw askixa. Yuriñ urut sipansa, jiwañ uruw juk'amp askixa.
[2] Kusist'ir sarañat sipansa, jiwirin ukar sarañaw askixa. Jiwax taqi jaqinakan tukuyäwipawa, jakirinakasti uk amtañapäspawa.
[3] Larusiñat sipansa jachañaw juk'amp askixa, ajanurux janis wal lurkchini, ukampis chuymarux ask luri.
[4] Yatiñan jaqix jiwañat lup'i, ukampis pisi amuyt'an jaqix kusist'ir sarañat lup'i.
[5] Pisi amuyt'an jaqin jach'ar aptatäñat sipansa, yatiñan jaqinanakan iwxt'atapar ist'añaw askixa.
[6] Pisi amuyt'an jaqin larusitapax kunjämatix ch'aphinakax ninan t'aqarki ukhamawa, ukasti inamayakirakiwa.
[7] Jan wali lurañanakax yatiñan jaqirux janiw walt'aykiti, qullqimpi chilltañax chuymap mayjt'ayi.
[8] Mä kuna luräwi qalltañat sipansa tukuyañaw juk'amp askixa. Jach'a jach'a tukuñat sipansa, llamp'u chuymanïñaw juk'amp askixa.
[9] Thithiñampix jan atipjayasimti, thithiñax pisi amuyt'an jaqinkiwa.
[10] Janipun jiskt'asimti, “¿Kunatsa nayra maranakax ancha sumänxa?” sasa, uka jiskt'asti janiw ch'ikhin jiskt'apäkiti.
[11] Akapachan jakiritakix yatiñanïñaw askixa, ukampis yatiñanïñampi, kamirïñampiw juk'amp askixa.
[12] Yatiñasa, qullqisa jaqirux arxatiwa, ukampis yatiñ kankañax yatiñan jaqirux jakañ churi.
[13] Diosan luräwinakapat sum amuyt'am: ¿khitirak jupan k'umuptayatapar chiqachaspasti?
[14] Sumankaña jutipanxa kusisim; jan walt'añ jutipansti amuyt'asirakim, mayasa, mayasa Diosankiwa, ukatsti jaqix janipuniw yatkiti kunatï jutir urunakana jutkani ukatxa.
[15] Taqi akanak uñjawayta aka juk'a inamay jakañaxanxa: aski jaqinakax askinak lurkasaw jiwapxi, ñanqha jaqinakasti jan walinak lurkasas walja maranakaw jakapxi.
[16] Jan sinti askix tukumti, janirak sinti yatiñanis tukumti. ¿Kunatarak jumapach aynacht'añ muntasti?
[17] Jan sinti jan walinak luramti, janirak sinti pisi amuyt'anis tukumti. ¿Kunatarak janïr jiwañäkipan jiwätasti?
[18] Uk katthapiñax askiwa, amparat jan antutjasa. Khititix Tatitur axsarki ukaxa, taqi kunansa askiruw mistsuni.
[19] Mä markan tunka jilïrinakat sipansa, yatiñ kankañaw yatiñan jaqirux juk'amp ch'am churi.
[20] Ukatsipana, akapachan janiw khitis jan juch luras aski jaqix utjkiti.
[21] Kunanaktix sapki ukanakar jan yäqamti, ukhamat luqtirimar jumxat jan walinak parlatap ist'kätati.
[22] Jumas sum yatiraktaxa, walja kutiw mayninakat jan walinak parltaxa.
[23] Taqi akanak wali amuyt'ampiw uñakipta, ukhamasti yatiñ kankañanïñ munäyäta, ukampis janiw jikxatañjamäkänti.
[24] ¡Taqi kunatix utjki ukax janiw jikxatañjamäkiti! ¡Sinti ch'amawa, jan khitinsa amuyt'kayarakiwa!
[25] Nayax yatxatañanak jikxatañaruw uchasta, ukat yatxatxasin mä suma amuyt'ar puriñataki. Ukhamasti nayax amuytwa, pisi amuyt'anïñan jan walïtapa, pisi chuymäñas luqhi kankañätapa.
[26] Jiwañat sipansa kunatix juk'amp jan walïki uk jikxatta: warmix chuymampi sallqxasax amparapampiw qhumanti. Diosar munirix ukham warmit jaltxaniwa, ukampis jucharar jaqix sipitanakaparuw jalt'ani.
[27] Naya, Arunak Yatiyirix kunäkataynatix uk thaqkasax akanak jikxatta:
[28] ¡kuntix chiqpachan thaqkta uk janiw jikxatkti! Waranqa chachanakatxa maynik aski jaqi jikxatta, ukampis janiw mä aski warmsa jikxatkti.
[29] Nayax akhamak jikxatta: Diosax jaqirux chiqap luräna, ukampis pachpa jaqiw jakañap jan walt'añar puriyi.