[1] Aka uraqin jaqinak taypin mä jan walt'añ uñjta:
[2] Diosax yaqhipanakarux jilarkir suma yänak churi, kuntix munapki ukanakax janiw jupanakatak pist'kiti; ukampis janiw taqi ukanakat kusisipkiti, jan ukasti yaqhanakakiw kusisipxi. ¡Akasti chiqpachan inamayawa, llakkañarakiwa!
[3] Mä chachax patak wawanakanïskaspawa, ukat walja maranakas jakaskarakispawa; ukampis ukham jakkasax janitix yänakapampi kusiskani, janirak amayapas imt'atäkan ukaxa, nayatakix uka jaqit sipansa mä sullsut wawaw askixa.
[4] Ukampis uka wawax ina ch'usarus ch'amakan chhaqkchini, sutipas armatäniwa,
[5] ukatsti intsa janisay uñjkchini, janisay kunsa yatkchini, ukampis uka chachat sipansa juk'amp samarañanïniwa.
[6] Jupax pä waranqa maras jakchisapän ukas janiw yänakapat kusiskasapänti. Chiqpachansa, ¡taqiniw uka pachpar sarapxi!
[7] Jaqix manq'añatakix jan inakt'asaw irnaqi, ukampis janiw sisthapkiti.
[8] ¿Kuna tuqinsa mä yatiñan jaqix pisi amuyt'an jaqit sipan jilanki? ¿Kunsa mä pisi amuyt'an jaqix askin sarnaqasax jikxati?
[9] Aliq amuyañat sipansa uñjañaw askixa. Ukampis ukax inamayawa, thayarus katthapiñ munksna ukhamakiwa.
[10] Kunatix jichhax utjki ukax sutiniwa, ukasti yatisirakiwa, janiw khitis jupat sipan juk'amp ch'amanimpix nuwaskaspati.
[11] Mayakiw chiqaxa: walja arunak parlañanxa, axtañ arunakaw utji; ukampix janiw kuna asksa jikxatksnati.
[12] Niy yatitawa, janiw khitis yatkiti kunatix jaqitakix aka jakht'at inamay urunakapan askïki ukxa. Urunakapax ch'iwir uñtataw sarakipani, ¿khitirak jupar yatiyaspa kunatix akapachan jiwatap qhipat luraskani uksti?