[1] T'ant'am umar jaquntam; ukat mä qawqha pachat jikxatäta.
[2] Qawqhatix utjktam ukanak mayninakamp jaljasim, ukampis jumax janiw yatktati, markarux kuna jan walitix jutkani uka.
[3] Qinayanakatix uman qinayächi ukaxa, jallux uraqxaruw purxatani. Mä quqax amstarusa, jan ukax aynacharus liwisiskpan, kawkharutix liwnuqtki ukkhankapuniniwa.
[4] Yapuchañ munasax jan thayak uñch'ukkamti, achunak apthapiñ munasas jan qinayanakak uñch'ukkamti.
[5] Janiw jumax thayan kawksar saratapsa yatktati, janiw kunjämsa wawax taykapan purakapan jilki uksa yatktati, janirakiw Diosan kunjäm luratanakapsa yatktati.
[6] Jumax willjtasa, jan ukax jayp'us yapuchaskam, ukampis janiw jumax kawkïr yapun sumäñapsa, jan ukax paypach yapun sumäñapsa yatktati.
[7] Lupi qhana uñjañax wali askiwa;
[8] ukampis maynix walja maranak jakkasax taqi kunampisay kusisiskpan, janiw armasiñapäkiti utjkani uka jan walt'añ walja urunakata, ukatsti taqi kunatix jutañampïski ukax inamayakiwa.
[9] Waynäkas k'uchirtasim; kunatix askïki ukat kusisim. Chuymamax kunjämarutix munki, nayramas kuntix uñjki ukhamar luram; ukampis taqi ukanakat Diosaw taripätam.
[10] Chuymaman llakisiñanakapa, jan walt'añanaksa apanukum, waynanakan suma urunakapax inamayakïtap layku.