[1] Kunapachatix Diosan utapar sarkät ukkhaxa, sarnaqäwim uñakipasim, ñanqha lurir jaqinakan wilañchap luqtañat sipansa, ist'añatak jupar jak'achasim.
[2] Diosatak mä kun lurañatakis jan mäki arsumti, Diosax alaxpachankiwa, jumasti akapachankaraktawa. Ukat juk'ak parlañamax wakisi,
[3] sinti lup'isax samktatapxiwa, sinti parlasasti jan wali arunak arsupxi.
[4] Kunapachatix kun lurañatakis Diosar arsüta ukkhaxa, jank'ak uk phuqham, jupax janiw pisi amuyt'anirux munkiti. Kuntix lurañatak arskta uk phuqham,
[5] arsutar jan phuqhañat sipansa, jan kuns arsuñaw askixa.
[6] Arsutamampix jan juchachasimti, janirak Diosan khithataparus “Pantjastwa” samti. ¿Kunatsa parlatamampix Diosar phiñasiyäta, ukat luratanakam t'unjañapatakisti?
[7] Uka layku, walja lup'iñanak taypina, kunayman arunak taypina, jan amuyt'asin lurañanak taypinsa, jumax Diosar axsartañamawa.
[8] Mä markantix jan kunanir t'aqhisiyiri, chiqa aski lurañar mayjt'ayir uñjsta ukaxa, jan muspharamti, mä jilïrin yaqha jilïripaw utji, ukat juk'amp jilïriw jupanak paninxarux utjaraki.
[9] ¡Ukarux markax nayraqataruw sarti satawa, reyis mayninakar luqtiritaki satarakiwa!
[10] Khititix qullqi munki ukax juk'amp muni; khititix qamirïki ukax, jan utjirinjamakiwa amuyasi. Ukasti inamayarakikiwa,
[11] ukampis, yänakax juk'ampi utjki ukkhaxa, mäkiw tukusxi. ¿Kuna askirak apsusti nayra mayamp uñxatasasti?
[12] Irnaqir jaqix juk'sa, jan ukax waljsa manq'askpan, sumpun ikt'asi; ukampis qamirirux yänakapax janiw ikthapiykiti.
[13] Akapachan sinti llakiskay uñjta: qamir yänak juk'uchañax uywiriparuw jan walt'aykiti;
[14] ukampis jan suma alakip lurasax uka yänakax q'alaw tukusispa, ukatsti jupatix mä wawanïspa ukaxa, janiw ukat qhiparux kuna jaytañapas utjkaspati.
[15] Kunjämatix taykapan purakapat q'alalak yuri, ukhamakiw sarxani, irnaqatapatsti janiw kuns apaskaniti.
[16] Akaw sinti llakiskayaxa: kunjämatix aka uraqir jutki ukhamakiw sarxani. ¿Kuna askirak apsusti jan inakt'as irnaqatapatsti?
[17] Ukhamarus taqi jakäwipansti ch'amakanjam sarnaqawayi, jan walt'añana, t'aqhisiñana, chuyma usuyasiñanakana.
[18] Nayax akhamak amuyta: jakäwin askipax manqt'asiña, umt'asiña, aka uraqin mä juk'a urunak Diosax churkistu ukan jan inakt'as irnaqatasat kusist'aña ukakiwa, ukampis ukaw jiwasanakar wakt'istu.
[19] Mä tuqitsti, Diosax khitirutix wali qamir yänak churki ukarux ukanakat manqt'asiña, ukanakat kusist'añ churaraki, ukampis jan inakt'as irnaqatasat kusist'añax Diosat juti.
[20] Diosax kusisiñampi chuymar phuqht'asaxa, janiw jakañapat sinti llakiskiti.