[1] Ukatsti aka uraqin kunjämtix t'aqhisiyapki ukanak uñjta. Ukat t'aqhisiyatanakan jachatanakap uñjarakta, ukampis janiw khiti chuymacht'iripas utjkiti; t'aqhisiyirinakapax ch'amampiw apnaqapxi, ukampis janiw jupanakar khiti chuymachirix utjkiti.
[2] Ukat nayax jiwirinakan kusisiñanïtap amuyta, jakasipki ukanakat sipansa;
[3] ukampis uka panit sipansa khitinakatix janïr yuripki ukanakaw wali kusisitäpxi, jupanakax janïraw aka uraqin jan wali luratanakap uñjapkiti.
[4] Jan inakt'as irnaqaña, nayraqatar sartañax maynit maynikam jilankañ thaqhatapak uñjarakta, ukasti inamayarakikiwa, thayarus katthapiñ munksna ukhamakiwa.
[5] Jaqix siwa: “Jan amuyt'asir jaqix janiw irnaqañ munkiti, ukat manq'atjam jiwaski” sasa.
[6] Ukampis nayax sistwa: “Mä juk'a samart'añax askiwa jan samart'as irnaqañat sipana, ukampis jan inakt'as irnaqañax inamayakiwa” sasa.
[7] Maysa tuqitsti akapachan kunatix inamayäki uk uñjarakta:
[8] mä sapa chachax jan jila masinakani, jan wawanakani, jan jilanakaniwa, ukat janiw kunapachas samart'kiti, janipuniw qamir yänakap uñjkasas kusisitäkiti, janirakiw jiskt'askarakisa: “¿Khititakis taqi akanak jikxattxa? ¿Kunatsa jakäwixan jan k'uchirtaspachätxa?” sasa. Ukampis taqi akanakax inamayakiwa, mä jathi q'ipïkaspas ukhama.
[9] Mayni sapat sipansa panïñaw juk'amp askixa, ukhamat irnaqatapas juk'amp uñstaraki.
[10] Maynitix jupanakat liwischi ukaxa, mayniw juparux wayti. ¡Ukampis kunakïkan sapak liwiski ukatakixa, janiw khiti waytiripas utjkaniti!
[11] Ukampis panitix ikipxani ukaxa, purapat junt'uchasipxani; ukampis mayni sapaxa, ¿kunjämarak junt'thapispasti?
[12] Mayni sapax atipjatäspawa, ukampis panix atipjapxaspawa, ukhamarus kimsat k'anat wiskax janiw mäki t'aqaskaspati.
[13] Mä tuqitxa, pisi amuyt'an iwxanak jan ist'asir reyit sipansa, mä jan kunan ch'ikhi waynaw askixa.
[14] Uka waynax carcelat mistunisin reyit qunt'askchi ukasa, jan ukax jan kunanïkas reyïñar purkchi ukasa, nayax akapachan jakir jaqinakarux jupar yanapt'ir uñjta.
[16] Jupax walja markarus apnaqkchini ukasa, qhiparux janiw uka jaqinakarusa, wawanakaparus kusisiykanit. Ukhamasti ukax inamayarakikiwa, thayarus katthapiñ munksna ukhamakiwa.