[1] David chachan Arunak Yatiyir yuqapan arsutanakapax akanakawa, jupasti Jerusalén markan reyipänwa: ¡Inamayakiwa, inamayakiwa! ¡Taqi kunas inamayakiwa!
[3] ¿Jaqisti kuna askirak jikxati, akapachan sapür irnaqasasti?
[4] Mayninakax yuripxiwa, mayninakasti jiwapxarakiwa, ukampis uraqix pachpakïskiwa.
[5] Intix jalsuniwa, intix jalantarakiwa, wasitat jalsuniñatakisti jank'akiw pachpar kutt'i.
[6] Thayax aynach tuqiruw thayt'i, ukatsti amsta tuqiruw muyti. ¡Thayax muytas muytasaw sari! ¡Muytanisax pachpar muyjtaskakiwa!
[7] Jawiranakax lamar qutarkamaw sarapxi, lamar qutasti janiw phuqhantaskiti; jawiranakax kawkhattix sarki ukkharuw kuttani, ukat wasitat jawirnam jalañataki.
[8] Taqi kunaw qarjayasi uk qhanañchirix janiw khitis utjkiti; janiw uñjkasasa, ist'kasas ukanakamp sisthapkiti, ukhamat kusisiñapataki.
[9] Kunjamäkäntix nayra pachax ukhamakïskiwa; kunatix nayrax luraskän ukax pachpakiw lurasiski. ¡Janiw kunas akapachan machaqat luraskiti!
[10] Akham sirix utjapuniniwa: “¡Akapï machaqat lurataxa!” sasa. Ukampis ukax jiwasanakat patak maranak nayrax utjapunïnwa.
[11] Kunatix mäkipawayki ukax armatawa, kunatix jutkani ukanakas jutirimp chik armatäxaniwa.
[12] Naya, Arunak Yatiyirix Jerusalén markan Israelan reyipäyätwa,
[13] ukatsti nayax yatxatañaruw uchasta, kunatix aka uraqin luraski ukanak ch'ikhi kankañamp yatxatasa. ¡Tatitux ch'ama tukuyañampiw jaqinakarux jisk'ar tukuyi!
[14] Ukat nayax amuyta, akapachan kunanakatix lurañäki ukanakax inamayakïtapa, thayarus katthapiñ munksna ukhama.
[15] ¡K'umuptatarux janiw chiqaptayksnati, jan utjki ukatsa janiw jakhthapksnati!
[16] Ukhamasti naya pachpaw chuymaxan sista: “Akax uñjapxita, wali jach'a jaqir tukt'atätwa, nayat nayra Jerusalenan apnaqapkän ukanakat sipan wali yatiñanïtwa; yatxatañampiru, yatiñ kankañampirus wali katuyatätwa, ukhamarakiw jan amuyt'asirïñaru, pisi chuymanïñarus katuyasta, ukampis taqi ukax thayarus katthapiñ munksna ukhamakïtap amuyta” sasa.
[18] Chiqpachansa juk'amp yatiñansti juk'amp jan walt'añaw utji; juk'amp yatxatirix juk'amp llakisi.