[1] Damu gugu guguna matahai yangna besingna mése Yesus Énini fimiri bahana yoho bake damu kutumu worumusuméri bunané!
[2] Damu u nogoki fifimiri enané: Ahu kefo deri guguna afahang atungkumaki, gugu fani modinan deyoho. Anggo posuyahaki ahu yahamuto ahu kefo kiri dakenani, yoho ahu kefo yohoki fani nafamahana deyohote, yoho bake wayamu emakena. Emohote, yoho malaikat yohoki ahu hayangne ememere fimiri yoho bake hanikéri mése wayamu emakena kéré.
[3] Damu ahu Yesus Énini fimiri bahanani, mése bui oguri bahana yohoki gugusé fani gagabumenan deyoho. Gugu yoho kumu kotoféri bui kumu bahana gahakumu yohoki mahamu emenan niye fani gagabumenan deyoho. Damu ahu tuhuremu Yesus Énini fimiri bahanani, ifiyo-tifiyomahanani kugutoméri bahana yohoki fani gagabumenan deyoho. Maha guku guguna aduwosoho égéki ifiyo-tifiyomahanani, kugutoméri bahana gahakumu fimiri fani gagabuméri undomenan deyoho.
[4] Damu ahu emu-hori-daha yoho hu yahana damu yang yahana égéki esumu wayamu égé ememere fimiri etori bunané. Damu gugunahamo damu gugunuhu yohoki fani modinan de kamu yoho remu etori bunané. Emohote, besing fe rahamo yang fe rahamo hahafemahana damu hukum anggenekigina égéki nahangkuni yangna besingna kutumu hahafemahana ememere égena nogoki Ala awe esumu poréyahamu emoné.
[5] Damu gugu fani aneséyangni butumu fimiri worumenan deyoho. Gugu katugo yeri égena égéki hanikéri bunané. Ala Égé mése u ememere yaki, "Nu modini gu awe fani pumise bohon deyoho. Nu awe gu kumu kotoféri ahayané."
[6] Nugunabo Ala nugu bake ememere yakini, nugu fani mokiyan de habigiyoméri ememere yohowané: "Nugunabo Ahuyaha nuki mahamu emesumohoni, nu fani mokéré deyoho. Damu ahu kufe yoho nu bake u fe fani emenan deyoho."
[7] Damu anggo feki ahu asuféri gugu bake Ala Éné u yokukubumakena yohoki fani gagabumenan deyoho, meneféyané. Damu yoho Ala Éné u dari emesuméri Énini fimiri bakenaka, kuwangkena égéki etori gugu fifimiri hamemere enané.
[8] Damu Yesus Égé fani degemu baha deyoho. Égé anggo posuyaha baki égéki Uku damu hamemere baki, katugo nogo arohori embahae Uku damu hamemere bohoné posu-posukiné.
[9] Emoho nemohoni, ahu yoho gugu bake ukukuwoho deregemu yori yokukubumahana égéki Ala Éné u yohoto fani hamu hanéri égé deyoho, emohoni fani kotoféyonan deyoho, meneféyané. Damu Ala nugu bake Éné modu kuyomu woruméri emohoni, nuguna modu habigiyoméri Ala Énini fimiri beriya nogoki manggohokigi. Emohote, Yahudi nahu nuguna yahae u yakena hamu hanéri ohoru énggamsumériyani, fani nuguna modu habigiyoméri Ala Énini fimiri beriya deyoho. Emohoni, ohoru énggamusumériya égéki fani nugu bake wayamu emohoni fani Nugunabo kirimu fimiri beriya deyoho.
[10] Damu Yesus Égéki debahae-abufiya ékému kungguka, damu Éné aduwosoho aguto harahai manggohomu égé gahakumu Ala bake kuroho. Égé ahu Énini fimiri beriya nuguki wayamu emon niye aguto harahai nogoki kuroho. Emohote, katugo nogo ahu yohona dosa tobunsumon niye ahu-imam esumu asuféri baha égé ohoru uri aguto duri Ala bake kuroho égéki ahu yoho damu kotoféyahana yoho fani Yesus Énini fimiri bahana deyoho. Ahu énéyuhuwoho ememere bahana yohote Yesus Égé ukukuwoho harahai nugu niye kurohon niye wayamu emoho égéki fani afénan deyoho.
[11] Damu Yahudi nahu yohona ahu-imam yohona ahuhabang esumu asuféri bahana yoho Ala dosa tobunsumon niye ohoru haungguni éné gong égéki yeri Ala niye abugemahanato esumu manggohokigi ékému osugu. Emohote, yoho ohoru mése kunggu éné aduwosoho égéki busu pama ékému yeri hori duremahana.
[12] Hamemere Yesus Yerusalem busu fikoyaha éné afite fikoyaha pama kumu kugutoméri kunggu. Emohoni, Égé Uku Éné gong féri Énahu nuguna dosa tobunsumoho.
[13] Emohoni, nané matahai Yesus Énini fimiri bahana yohoniya, nugu Yahudi nahu nuguna yahae ohoru uri aguto duri Ala bake kurosumahana égéki damu nuguna yahae u yohoto kotoféyoriya égéki modiya. Damu nugu Yesus bake ahaya, emohoni Ala nuguna dosa tobunsuméri umburomoné. Damu ememere fimiri Égéki kotoféyowa, "Ahu yoho nugu bake dirimeféri yohonate, nuku damu Yesus Égéki kotoféyowané."
[14] Haiyangne, nugu Ala kumu bohowané mériya égéki fani soho nokumu égena deyoho. Emohote, nuguna modu embahae nugu awe Ala Éné busu mene ékému bohowané mériya égéki fisini fimiri kidabamériya.
[15] Nugu ememere fisini fimiri kidabamériya égéki, nuguna matahai yohoniya, Yesus mése nugu niye Éné aduwosoho kurori kungguni, nugu asu-sawa Ala bake ememere yori Énaukumowa, "Nabo Ala, degi kuroho." U feki nugu esumu ememere yobuwoméri yori Énaukukusumowa, "Ala esumu habigiyoméri baha." Ememere yosuméri beriya égéki Ala bake ohoru uri aguto kuroriya gahakumu égé kéré.
[16] Damu guku damu ahu fe yoho bake wayamu emesuméri bunané. Damu guguna kukuwoho ahu fe yoho bake kemerosuméri bunané, damu tafe kunorohoné. Nugu ememere beriya égéki aguto duri Ala bake kuroho gahakumu Égé hanikéri aféné moho égé kéré.
[17] Damu ahu asuféri gugu bake Ala Éné u yokukubuméri bahana yohona u dari bunané, damu u yohoto hamemere enané. Yoho guguna modu wayamu bohonan niye etori bahana yoho séré, emohoni yohona u dari bunané. Damu embahae Ala Éné sama kumu yoho bake abamu yohonané, "Gugu esumu wayamu etori bahana rahamo kara rahamohoe?" Ememere abamu yohonané, emohoni gugu yohona u égéki dari ureyafuri bohonan deyoho. Damu gugu yohona u dari bohonangkumaka, yohona modu hanikéri gugu bahana wokumu yohona furubo wayamu afénané. Emohote, gugu yohona u dari u yohoto égéki fani kotoféyonan dekumaka, yohona modu budiyahangféri bohonané. Damu yohona modu budiyahangféri furubo afénangkumaka, yoho fani habigiyoméri guguki mahamu emenan deyoho.
[18] Damu nané matahai yohoniya, gugu nugu niye Ala bake nouwané. Nugu nafamériyani nuguna modu ugunate, u fe karakigini esumu manggohokigi, damu nugu ukukuwoho haiyangmu égena égéki emesuméri bohowan niye pafufomériya embahae damu niyaki.
[19] Maha nu gugu bake fisini yahae nu kakumu defen niye Ala bake nouwané. Emohoni, Ala kakumu yori inggemoné nu awe gugu bake kakumu dakamu defeka, damu gugu kumu gebufuwané.
[20] Nugunabo Yesus kungguni, Éné gong emohoni Ala u harahaimu yahamoho égéki nugu kumu Ala kumu esumu habigiyoméri emohoni, embahae posu-posukiné. Ala emohoni Yesus ahu honubakiginato ékému dakamu dotoho, damu Ala ahu wi-domba etori baha nahu esumu manggohokigi gahakumu baha, damu nugu Éné wi-domba gahakumu beriya. Emohoni, Égé sawa hamu nuguki etori bahani, nuguna modu u fe karawohote, gemu wayamu bohowané.
[21] Damu nu Ala bake fisini ememere yahae, "Nabo Ala, Gusé enu, emohoni yoho awe habigiyoméri ukukuwoho emu-hori-daha Gané sifing fimiri emoné moho égéki wayamu emenan niye fengféyonané. Damu Yesus Kristus nugu mahamu emohoni, Nabo Ala Gu nuguna modu kumu emoné, nugu awe Gané modu hanikiné moho égéki emowané," ememere yoré. Damu nu ememere Énaukume, "Nugunabo Yesus Kristus Énaukumowané embahae posu-posukiné." Amin.
[22] Nané matahai yangna besingna Yesus Énini fimiri bahana yohoniya, nu kara nogoki bagomu kara uni. Emohoni, gugu bake fisini yahae nu akiya yori kara uni nogoki dari modu dongkuni etotoméri bunané.
[23] Damu nuguna matahai fe Timotius égé mése bui kumu suhungfiyahana. Égé kakumu nokumu defengkumaki, nu awe égé yeri kotoféri gugu bake deri gebufuwané.
[24] Nu ahu asuféri guguki hafuféri bahana emu-hori-daha yoho damu Ala Énahu emu-hori-daha Yesus Énini fimiri bahana yoho bake yofiye ahainé, "Gugu fake bunané." Damu guguna matahai Yesus Énini fimiri Italia soho fikoyaha ékému dahana yoho gugu bake yofiyonané ahainé, "Gugu fake bunané."
[25] Nu Ala bake gugu niye fisini yahae, "Nabo Ala, Gané modu kuyomu woruméri nané matahai emu-hori-daha yoho bake wayamu enu." Amin. U fe karawoho.