[1] Damu ahu-imam isige-isige esumu asuféri baha égéki Ala Israel nahu nugu ahu hayang kiri beriya ékému ahu fe éné fi iri kubumu yohoni, égéte ahu-imam yohona ahuhabang esumu asuféri baha nahu kiri baha. Damu Ala égé bake éné furubo éné bero teyo kumu égena égéki kurohoni, égéte éné na yeri ahu yoho niye Ala Éné sama kumu deri éné furubo yaha. Damu éné furubo éné bero teyo kumu égé égéki Ala bake aguto kurosumoho damu ahu yohona dosa tobunsumon niye ohoru haungguni aguto duri Ala bake kurosumoho.
[2] Damu ahu-imam esumu asuféri baha égé uku hate ahu hayang kiri baha, damu uku dosa aféné moho égéki wiyahakigi. Emohoni, ahu fe poréyahamu emohote, ahu égé poréyahamu emoho égéki dosa kéré fani ememere ukuni nafamoho deyoho. Ememere égéte, ahu-imam esumu asuféri baha égé awe ahu dosa yahana yoho bake éné modu kuyomu emoné.
[3] Damu ahu-imam esumu asuféri baha égé Ala Énahu yohona dosa tobunsumon niye ohoru uri aguto duri Ala bake kuroho. Hamemere uku hate dosa yahani, égé mumangge uku éné dosa égéki Alasé tobunsumon niye esumu hamemere emoho.
[4] Damu ahu fani uku égéki ahu-imam esumu asuféri baha ememere fani uku éné fi iri kubumoho deyoho. Emohote, Ala nuguna yahae Harun éné fi iri kubumu yaki hamemere ahu fe éné fi iri kubumu yoho kéré.
[5] Hamemere Kristus, éné u feki Ala kubumu yohoni Ahuhabang kiri baha, Égé Ahu-Imam esumu asuféri bohon niye fani Uku Éné fi iri kubumoho deyoho. Emohote, Alasé Kristus Éné fi iri Égéki kubumoho. Damu Ala Égé bake emiyoho, "Guki Namu kéré. Sawa nogoki Nu esumu Gabo kéré."
[6] Damu hate kara fe Ala Éné Buku ékému kara uwangki baha. Ala Kristus Égé bake emiyoho, "Nusé Guki kubuméréni, Gute Ahu-Imam yohona ahuhabang esumu asuféri baha Nahu kiri bohoné embahae posu-posukiné. Gu anggo posuyahaki Melkisedek ahu-imam yohona ahuhabang esumu asuféri baki hamemere bohoné."
[7] Damu Kristus Égé damu soho nokumu Ahu hayang kiri baki égéki, Ala bake u yosumoho, damu Égé esumu fisini fimiri Ala Kristus Égéki mahamu emon niye efe uri u fikomu yoho. Égé Alaki ememere fimoho, "Nabo Ala Égésé habigiyoméri Nu akume méré ékému umburomoné moho Égé séré," ememere fimiri Ala bake u yosumoho. Damu Kristus Égé Éné modu amiféri Ala Éné sifing fimiri emoné moho égéki hamu hanéri emoné mohoni, Ala Kristus u yoho égéki mése dagi.
[8] Damu Kristus Égé Ala Énamu kigite, Égé Ahu hayang kiri baha égéki, Uku damu esumu kugutoméri baha égéki Égé bake yokukubumohoni, Égé Ala Éné u dari u yohoto hamesumoho égéki nafamaki.
[9] Damu Kristus Égé ememere Ala Éné u dari u yohoto hamesuméri feyahafumohoni, fe fani poréyahamu égé deyoho. Emohoni, Ala fimohoni Égé Ahu-Imam esumu asuféri bohoné. U feki Égé ahu emu-hori-daha Éné u dari bahana yohoki umburomoné, emohoni ahu yohote Ala kumu bohonané embahae posu-posukiné ememere emoné moho Nahu kiri bohoné.
[10] Damu Ala Kristus Éné fi iri kubumu yohoni, Égéte Ahu-Imam, ohoru uri aguto duri Ala bake kuroho nahu yohona ahuhabang esumu asuféri baha kéré. Égé anggo posuyaha Melkisedek ahu-imam yohona ahuhabang esumu asuféri baki hamemere bohoné.
[11] Damu Kristus Égé Melkisedek baki hamemere Ahu-Imam yohona ahuhabang esumu asuféri baha éné u égéki aburohomu de égenate, gugu dari fani kakumu nafamahana deyoho. Emohoni, nu u égéki ayoméri gugu bake yokukubume méré égéki agefekigi.
[12] Gugu mése posu-posukéri Kristus Éné sisi manggoho dari Énini fimiri bahana. Emohoni, gugu kageto nogoki mése esumu bafa-guru kiri ahu fe yoho bake Yesus Éné sisi manggoho égéki yokukubuméri bohonan kiyoho. Emohote, gugu damu ofo unaware ong migite, fani ohoru hanggera énggé de gahakumu bahana. U feki anggo posuyaha gugu age Yesus Éné sisi manggoho korokigi mumangge yokukubumahanani nafamahana égéki ahu fe gugu bake tafe yokukubumenané nafamenané ememere damu fimiri bahana.
[13] Ahu menohosé damu ong remu migina yoho ofo unaware gahakumu bahana. Emohoni, ahu égé Ala Éné u yokukubumahanani, u haiyangmu égena égéki damu u keiyongmu égena égéki fani nafamahana deyoho.
[14] Damu ohoru hanggeramu égena égéki ahuyaha yoho éni bahana. Hamemere ahuyaha kiri Yesus Énini fimiri bahana yoho Ala Éné u yokukubumahana nafamahanani, yohona sifing damu modu u haiyangmu égena damu u keiyongmu égena égéki fifimiri wayamu nafaméri bahana.