[1] Emohoni, Ala nugu bake nugu nuguna furubo feyahafumowanéka, damu Éné busu tahangkutomané mériyato ékému osuri bohowané ememere u yahamaki. Damu u yahamaki égéki fani hamu hanéri feyahafumoho de, damu de égé. Emohoni, gugu bahana égéki gugu emu-hori-daha busu tahangkutomenané mahanato ékému osuri bohonan niye mokéri kutumu etotoméri bunané, emohoni ahu fe fani damu bohon deyoho.
[2] Nugu busu tahangkutomowané mériya éné u manggoho yofiyoho daha égéki mése dariya hamemere anggo posuyahaki nuguna yahae yoho soho tahangkutomenané mahana éné u manggoho yofiyoho daha égéki dakena. Emohote, nuguna yahae yoho u yofiyoho daha égéki dagenate, ahu aburoho u égéki haiyangne fani ememere fimakena deyoho. Damu nuguna yahae énéyuhuwoho ahu yahamuto u égéki haiyangne ememere fimahana yoho kumu fani kotoféyori hamemahana deyoho. Emohoni, u yofiyoho daha égéki yoho niye fani wayamu égé deyoho.
[3] Emohote, nugu u égéki dari haiyangne ememere fimiriyani, nugu awe nuguna furubo feyahafumowanéka, damu busu tahangkutomowané mériya ékému awe osuri bohowané embahae posu-posukiné. Emohote, ahu tuhuremu fani Ala u égéki haiyangne ememere fimahana de yohona u égéki Ala ememere yaki: "Emohoni, Nu mése yoho bake hakereméri u nogoki guni yahaméré: 'Yoho furubo feyahafumenanéka, fani soho tahangkutomenané mahanato Nu fengféyoré ékému fani atunan deyoho.'" Ala mumangge soho damu kukuwoho éné fenegene emu-hori-daha nogoki u yori emaki égéki, Éné furubo emu-hori-daha feyahafumakika, damu mumangge tahangkutomenané mahanato égéki eméri fengféyaki.
[4] Sawa birikuma-berahafi-ukumamu (7) égé égéki nugu nafamériyani Ala Éné Buku womu fe kumu ememere kara uwangki égé: "Sawa birikuma-berahafi-woro (6) égéki Ala furubo yeri eméri feyahafungguka, damu sawa birikuma-berahafi-ukumamu (7) égé égéki gemu baha."
[5] Damu hate nugu etori nafamériyani Ala Éné Buku kara fe ékému ememere kara uwangki égé, "Yoho yohona furubo feyahafumenanéka, damu busu tahangkutomenané mahanato Nu fengféyoré ékému fani atunan deyoho."
[6] U ememere yoho égéki etori nafamériyani ahu yoho yohona furubo feyahafumenanéka, awe busu tahangkutomenané mahanato ékému atunané mahana éné afite damu abuwoméri égé. Emohote, ahu fe yoho mumangge u manggoho yofiyoho daha égéki dakenate, haiyangne fani ememere fimakena deyoho, emohoni yoho fani osuwakena deyoho.
[7] Ememere égéni, Nugunabo Ala sawa feki nugu bake kuroho. Emohoni, nugute sawa tahangkutomowané mériya ékému atuwan kiyoho. Sawa fe nugu bake kuroho égéki "Sawa nogo kéré" ememere iri yoho. U nogoki haiyangne! Nu mése siyaha hosumu yoré yaki hamemere Israel nahu yoho siyanto soho kumu musuri dakenaka, embahae sawa kebemu hohoka, Ala nuguna yahae ahuhabang-raja Daud bake u nogoki ememere ayoméri yoho: "Sawa nogoki Ala u yoho dagena égéki, gugu fani guguna modu botokéri bohonan deyoho, meneféyané."
[8] Anggo posuyahaki Ala u yahamaki égéki hamemere nuguna yahae Yosua égé nuguna yahae yoho hafuyeri hori soho tahangkutomenané mahanato, éné fi Kanaan soho ékému osuwakena. Emohote, soho tahangkutomenané mahanato égéki kamu soho nokumu égé kéré. Damu soho égéki yoho furubo feyahafumenanéka, busu tahangkutomenané mahanato ékému osuri Ala kumu bohonané embahae posu-posukiné hamu hanéri éyongkumaka, Ala fani sawa fe de éyoné, nugu busu tahangkutomané mériyato ékému osuri bohowané embahae posu-posukiné fani ememere tafe yohon de kiyoho.
[9] Emohoni, Ala Énahu nugu nuguna furubo feyahafumowanéka, busu tahangkutomowané mériyato ékému osuri bohowané embahae posu-posukiné moho égéki fani hamu hanéri feyahafumériya de, damu de égé.
[10] Ahu menohosé busu tahangkutomenané mahanato ékému atuné moho égé ememere bohoné: Ala Égésé furubo yeri feyahafumohoka, damu tahangkutoméri gemu baha hamemere ahu égéte éné furubo feyahafumonéka, busu ékému osuri tahangkutoméri gemu bohoné embahae posukiné.
[11] Emohoni, nugu habigiyoméri busu tahangkutomowané mériya ékému kotoféri atuwan niye pafufomowa. Emohoni, nugu beriya nokumu ahu fe fani ememere bohon deyoho: Ahu fe égé fani Ala Éné u dari u yohoto fani hamemere bohon de ansakuméri bohoné, emohoni Israel nahu yoho emakena hamemere égé hate fani busu ékému atun de kiyoho.
[12] Ala u yoho égéki haiyangmu égéni, hamu hanéri emoho damu Ala u yoho égéki habigiyoméri égéni, ukukuwoho fikoyaha égena égéki emoho. Damu tahae piyaha éné yegi afifiye késéngkéri égéni, tumiri abuwoméri womu kumu égena égéki etori nafamériya. Hamemere Ala Éné u égéki tafe esumu késéngkéri égéni, ahu yohona modu kumu yohona sifing fimahana égéki tumiri abuwomoho. Damu ahu yohona modu damu yohona sifing fimahana égéki yobuwoméri kubumoho, damu yohona sifing kasuni égena égéki yobuwoméri kubumoho. Damu yohona sifing fimahana égéki damu yoho emenané mahana égéki haiyangmu égena rahamo keiyongmu égena rahamo ememere yobuwoméri kubumoho.
[13] Damu kukuwoho haharemu égena damu kukuwoho fani haharemu égena de emu-hori-daha Ala emaki égéki Ala Éné sama kumu haharemu égenani, fe fani kasuni égé deyoho. Ala ukukuwoho emu-hori-daha mése kirimu etori nafamohoni, Égé nugu sifing fimiri emesumériya égéki awe nugu bake abamuyohoné, "Gugu wayamu emahana rahamo poréyahamu emahana rahamohoe?" Ememere abamu yohoné, nugute awe Égé bake esumu utuhu haméri yohowané.
[14] Emohoni, katugo nogoki nugu nafamériyani Ahu-Imam esumu asuféri baha Égésé habigiyoméri de baha. Uku Ala Énamu Yesus. Damu Égésé soho nokumu musuri Ala Éné busu mene ékému osuri Ala Éné sama kumu oguri baha. Emoho nemohoni, nugu nuku Égéki fimiri beriya ememere yobuwoméri yoriya égéki butumu yeri bohowa.
[15] Damu Nuguna Ahu-Imam esumu asuféri baha Égésé awe habigiyoméri nuguki mahamu emoné. Égé nugu dosa aféyan niye ikuhamahanani, wiyahakéri beriya égéki nafamoho. Damu nugu dosa aféyan niye ikuhamahana hamemere Égé hate hamemere ukukuwoho emu-hori-daha égé féri Égé dosa afén niye ikuhamahana. Emohote, Égé fani dosa yaha deyoho. Emohoni, Nugu ikuhamahana égéki, Égésé habigiyoméri nuguki mahamu emoné.
[16] U ememere égenani, dohoné! Nugu esemu habigiyoméri Ala Ahuhabang Éné abuge-kursi ékému Éné modu kuyomu woruméri hafuféri baha Égé bake ahaya. Damu Égé awe Éné modu nugu bake kuyoméri damu nuguki worumoho. Emohoni, Égé awe nugu mahamu emoné ememere fisini fimiriya égéki, Égéte nugu bake mahamu emoné.