[1] Anggo posuyahaki Ala Musa bake u yori Yahudi nahu yoho bake u mumangge yahamaki. U mumangge yahamaki ékému ahu yoho Ala Éné saka tenda féri soho nokumu sigina éné u égéki de égé. Damu Yahudi nahu yoho Ala bake sembayang afénan niye kukuwoho aguto kiri Ala bake kurosumenané mahana éné u égéki kukubumaki.
[2] Damu Ala Éné saka tenda féri sigina ékému womu ukuma abugemahanani égena. Abugemahanato mumangge afite takenamu égé égéki Ala niye abugemahanato yahamutomu manggohomu égé ememere iri yohona. Damu womu kumu kukuwoho-lilin kufiyosumahanato égé de égé, damu abuge-meja égé de égé, damu abuge-meja teyo ékému du-roti duri Ala bake kuroho égéki kufiyahana baha.
[3] Damu Ala niye abugemahanato womu fe kumu tahano piriyaha ketanggi égé. Damu tahano piriyaha ketanggi égé éné mo kumu abugemahanato fe de égé. Abugemahanato égéki "Ala niye abugemahanato esumu manggohomu égé" ememere iri yohona.
[4] Damu abugemahanato nokumu abuge-iyobégé-emas gogofuméri debahae éné anggong gobona dugamsumahanato égéki de égé, damu peti iyobégé-emas féri emoho égéki de égé. Peti éné fiki "Ala u yahamaki éné peti" ememere iri yohona. Damu Ala u yahamaki éné peti womu kumu kukuwoho-kemukumona iyobégé-emas féri emahana ékému du-manna kokunggunani baha. Damu Harun éné yangge bago sifo unggumaki égéki kotoféri de égé. Damu iyobégé ware ukuma Ala u yahaméri hukum kara uwangki égena égéki kokunggunani égena.
[5] Damu Ala u yahamaki éné peti éné afite afifiye ékému malaikat ukuma yohona kusi eméri kufiyohonani méséri égena. Malaikat yohona fi kerub ememere iri yohona, damu yoho Ala Éné kakani hori égé égéki kubumoho. Damu yoho yohona tefiyo ahahaféri peti éné afite égéki ahukuni ketani égena. Damu peti éné afite égéki "Afite Dosa tobunsumoho éné afite" ememere iri yohona. Emohote, u ememere égena nogoki katugo nogoki fani ayoméri yohowan deyoho.
[6] Damu kukuwoho emu-hori-daha ememere fengféyohonaka, Yahudi nahu yohona ahu-imam yoho asu-sawa Ala niye abugemahanato yahamutomu manggohomu égé ékému osuri yohona furubo éyahana.
[7] Emohote, kamu Yahudi nahu yohona ahu-imam yohona ahuhabang esumu asuféri baha égéte Ala niye abugemahanato esumu manggohomu mo égé ékému kamu sufébégé hamu kamisigemu osugu. Damu abugemahanato ékému osugu égéki, égé ohoru gong yeri Ala bake kurohoné, emohoni Ala ahu-imam éné dosa damu Yahudi nahu emu-hori-daha yoho fani ukuni "Nogoki dosa kéré" ememere nafamahana de homereyaha dosa yahana égéki Alasé tobunsumoné.
[8] Yahudi nahu yohona ahu-imam ememere emesumahana égéki Ala Éné Ubana Hayo Égésé nugu bake ememere kubumoho: Ala niye abugemahanato mumangge égé égéki damu de éyongkumaka, ahu hayang kiri beriya nugu Ala niye abugemahanato esumu manggohomu égé ékému osuri Ala bake takenamu ahayané mériya égéki damu ketani égé.
[9] Damu u emu-hori-daha égena nogoki anggo posuyahaki emesumahana égéki damu katugo nugu emesuméri beriya égéki fani hamu hanéri égé deyoho ememere nugu bake aseméri yokukubumoho: Anggo posuyahaki ahu yoho kukuwoho fenegene damu ohoru yeri deri ahu-imam yoho bake kurakenani, ahu-imam yohote kukuwoho éné fenegene aguto kiri Ala bake kurakena, damu ohoru uri aguto duri Ala bake kurakenate, ahu kukuwoho éné fenegene damu ohoru yeri kurohona yohona modu kumu damu gagitoméri ememere fifimakena, "Nugu keiyongmu emesumériya égéki Alasé fani tobunsumoho deyoho," ememere yohona modu damu fifimakena.
[10] Damu hate Musa éné hukum yohoto hamu hanéri emesumakena emu-hori-daha égéki kamu yohona aduwosoho remu tobunsumenané mahana égé kéré: Ukusi égena égéki ohoru anggenekigina égéki fani énggena deyoho, damu oho anggenekigina égéki fani migina deyoho, damu yoho yoku deregemu oho féri tobunsumahana ememere emakena. Damu yoho ememere emesumahana embahae Ala u harahai yahamoné. Emohoni, u mumangge emesumakena égéki fani tafe emowan deyohote, u harahaimu yahamoho égéki emesumowané.
[11] Emohote, katugo nogoki Kristus, éné u feki Ala Énamu kubumu yohoni Ahuhabang kiri baha, Égé Ahu-Imam esumu asuféri baha Nahu kiri mése daha. Damu Égé Éné aduwosoho aguto kiri Ala bake kuroho. Damu Égé Ala bake Éné aduwosoho kurohoni, Ala nuguna dosa tobunsuméri nuguki umburomoné moho ememere ukukuwoho wayamu égena égéki katugo fengféyoho. Damu Kristus Égé fani anggo posuyaha Musa soho nokumu Ala Éné saka tenda féri siyaki ékému fani osugu deyoho. Emohote, Égé Ala Éné busu mene Ala Éné saka tenda féri sigi ékému osugu; u feki Égé Afahang esumu haiyangmu égé ékému osugu. Damu Égé Ala Éné saka ékému osugu égéki ahu yoho fani sigina deyoho.
[12] Damu Égé Ala niye abugemahanato esumu manggohomu égé ékému osuri Ala bake hoho. Damu Égé fani wi-kambing amuke uri éné gong rahamo wi-sapi amuke uri éné gong rahamo fani ememere yeri osugu deyoho, mite Égé Éné gong égéki yeri osugu. Égé osugu égéki kamu kamisigemu yeri osugu, damu Égé Éné gong yeri osugu égéki nuguna dosa tobunsuméri feyahafumohoni embahae posu-posukiné, emohoni fani tafe yeri atun deyoho.
[13] Damu Ala Musa bake Éné hukum yaki égéki baméri emesumahana égéki, ahu yohona yahae hukum yohona égéki nahangkumenangkumaka, Lewi éné go ahu-imam yoho esumu wi-kambing besing rahamo wi-sapi besing rahamo uri éné gong yeri ahu yohona aduwosoho ékému feméri uguna. Damu wi-sapi amuke yogi égéki duguna yaki suwe kiri baha égéki yeri oho kotoféri sesebuméri inggukunggunaka, damu yeri ahu énéyuhuwoho bake feméri uguna. Emohoni, yoho fimahanani gong damu oho sesebumahana égéki ahu énéyuhuwoho yohona aduwosoho tobunsumoné. Emohoni, yoho Ala Éné sama kumu dakumu haiyangne ememere bohonané, damu dakamu yohona matahai kotoféri Ala bake sembayang yeri Énaukuméri bohonané.
[14] Ememere égéte, Kristus Éné gong féri emoho esumu wayamu égé égéki finané: Ala Éné Ubana Hayo damu bohoné embahae posu-posukiné moho Égésé Kristus Égéki mahamu emohoni, Kristus Égéte Éné aduwosoho ohoru fe fani poréyahakigi de égéki uri aguto dugu gahakumu Ala bake kuroho. Damu Éné gong égéki nuguna modu uguni, nugu dosa yariya ememere fimiriya égéki esumu tobunsumoho. Emohoni, nugu Ala damu bohoné embahae posu-posukiné moho Égé bake deri sembayang yeri Énaukumériya.
[15] Emohoni, anggo posuyahaki Musa éné hukum, u feki Ala u mumangge yahamaki égéki damu de égé égéki, ahu yohote hukum nahangkuwangkena. Emohoni, Kristus Égé Éné aduwosoho ahu hukum nahangkungguna yohona dosa tohon niye kurori kungguni, Éné gong féri yohona dosa égéki tobunsumoho. Emohoni, Kristus Égé Ala damu ahu hayang yohona womu kumu méséri Ala u harahai yahamoho égéki yeri daha Égé séré: U feki Ala ahu hayang yoho kutumu arari éyonané mahana égéki yeri daha. Égé ememere emohoni, Ala ahu yohona fi iri kubumu yoho emu-hori-daha yohote ukukuwoho wayamu éyonané embahae posu-posukiné moho égéki awe afénané. Ukukuwoho égéki Ala yoho bake kurohoné ememere u yahamaki égé kéré.
[16] Ememere Kristus Égé kungguni, Ala u harahai yahamoho égéki mése age hamu hanéri emoné moho. U égéki u akimamaga yahaméri kara unggu baha gahakumu égé: Ahu fe énabo akumongkumaki, éné toto égéki agiyoméri énamkesiyo yoho bake kemerohoné awe afénané. Ememere u akimamaga yahaméri kara unggu baha égéki énabo damu bohongkumaki, fani kara égéki hamu hanéri emon deyoho. Emohote, énabo égé akumongkumaki, énabo u akimamaga u yahaméri kara unggu baha hamu hanéri emenané, haiyangmu éyoné. Emohoni, ahu égé mése kunggu ememere esumu yobuwoméri kubumohoni nafamahana égéki, u akimamaga yahaméri kara unggu baha égéki awe habigiyoméri hamu hanéri emenané.
[18] Emohoni, Ala mumangge Israel nahu yoho bake Éné u yahamaki égéki, ohoru uri éné gong féri emenangkumaka, u mumangge yahamaki égéki hamu hanéri haiyangmu éyoné ememere u yori inggemaki.
[19] Damu Musa anggo posuyaha mumangge u emu-hori-daha Ala nuguna yahae Israel nahu yoho bake yaki égéki yobuwoméri yori feyahafungguka, damu u yoho égéki haiyangne ememere kubumon niye ememere emoho: Musa égé wi-sapi amuke éné gong damu wi-kambing besing éné gong, damu oho kotoféri sesebumoho. Damu égé hate wi-domba kanggo éné yo égéki debahae fe éné fi hisop éné ide ékému yuhu arari yeri gong ékému kusumoho ogugu. Kusumoho oguguka, yeri gong égéki Ala Éné Buku Musa éné hukum kara uwangki ékému feméri ugu, damu Ala Énahu emu-hori-daha yohoki feméri ugu.
[20] Ememere feméri unugoméri Musa égé yori emiyoho, "Ohoru gong nogoki Ala u yori gugu bake yahamaki égéki Ala awe hamu hanéri emoné haiyangmu éyoné ememere kubumoho, emohoni gugu u yahamoho égéki esumu u yohoto hamemere enané."
[21] Ememere emohoka, damu Musa égé ohoru éné gong yeri Ala Éné saka tenda féri sigina ékému feméri ugu, damu kukuwoho emu-hori-daha kemukuni aguto dugamsumahana égena ékému feméri ugu.
[22] Emohoni, nugu ememere yohowané: Musa éné hukum yoho hamu hanéri kukuwoho haharemu égena damu kukuwoho fani haharemu égena de emu-hori-daha ohoru éné gong féri tobunsumoné. Damu fani gong féri Ala bake kurohon dekumaka, nugu dosa kemesumériya égéki fani tobunsumon deyoho.
[23] Ala Éné saka tenda féri sigina soho nokumu égé égéki damu kukuwoho wokumu égena égéki ukukuwoho Ala Éné busu mene égena éné kusi gahakumu égena. Damu Ala Éné saka tenda féri sigina soho nokumu égé égéki damu kukuwoho wokumu égena égéki ohoru yohona gong féri feméri uri tobunsumahana. Kukuwoho Ala Éné busu mene égena égéki wi-kambing damu wi-sapi yohona gong féri fani feméri uri tobunsumon deyoho. Emohote, Kristus Égé kukuwoho esumu manggohokigi gahakumu Éné aduwosoho kurohoni, Éné gong féri kukuwoho Ala Éné busu mene égena égéki tobunsumoho.
[24] Kristus Égé Ala Éné busu mene Ala niye abugemahanato manggohomu égé éné kibi gahakumu soho nokumu Ala niye abugemahanato esumu manggohomu égé ékému fani osugu deyoho. Emohote, Égé Ala Éné busu mene Ala niye abugemahanato esumu manggohomu égé ékému osugu. Damu Ala niye abugemahanato égéki ahu yohona bero féri sigina deyoho, mite Nugunabo Ala Uku sigi kéré. Damu Égé esumu Ala Éné busu mene ékému osuri Ala Éné sama kumu éri nuguniyoméri Ala bake u yosumoho.
[25] Sufébégé hamu Israel nahu yohona ahu-imam yohona ahuhabang esumu asuféri baha égé Ala niye abugemahanato esumu manggohomu égé ékému ohoru gong yeri kamisigemu osugu. Emohote, Kristus Égé hokumu osuri fani aburohomu éné aduwosoho kurori kunggu deyoho. Égé kamu kamisigemu eméri Éné aduwosoho kurori kunggu.
[26] Sufébégé hamu Kristus hokumu osugu gahakumu age emongkumaki, Ala soho hou damu éné fenegene emaki égé féri Égé esemu kugutomusuméri bohon kiyoho. Emohote, sawa akimamaga égena nogoki Égé soho nokumu deri kamu kamisigemu ahu yohona dosa tohoni Éné aduwosoho Ala bake kurohoni uguna kunggu. Emohoni, Ala ahu yohona dosa tobunsumoho.
[27] Damu nugu mése nafamériyani ahu emu-hori-daha yoho soho nokumu esemu kamisigemu akumenané. Damu yoho akumenanéka, damu hori Ala Éné sama kumu éyonané, damu Ala awe ahu isige-isige yohona u efefeméri yori inggemoné.
[28] Emohoni, Kristus Égé ahu aburoho yohona dosani Ukuné aduwosoho tohoni Ala bake kamisigemu kurohoni uguna kunggu. Damu Égé awe tafe dakamu soho nokumu defené. Damu Égé tafe defené moho égéki fani ahu yohona dosa éné u égé niye dakamu defen deyoho. Emohote, Égé dakumu deri ahu Énini kidabahana yohoki soho keiyongmu égena nokumu umburomoné embahae posu-posukiné.