[1] Emohoni, Ala Énamu esumu asuféri baha ememere yori yokukubumoho égéki mése dariya nogoki anggo feki yahamutomu etotoméri berekangte, katugo nogoki esumu etotoméri kirimu haiyangne ememere fimiri bohowa. Emohoni, nugu Énamu Éné sisi yoho égéki haiyangne ememere fimiri beriya égéki fani hafumu womu fe kumu ukuni modiyan deyoho.
[2] Anggo posuyahaki Ala Éné hukum malaikat yoho bake yohoni malaikat yohote hori nuguna yahae yoho bake yosumahana. Ala Éné hukum égéki esumu haiyangmu habigiyoméri égé. Emohoni, ahu Ala Éné hukum égéki nahangkungguna yoho damu ahu fani Ala Éné hukum dari u yohoto hamemere emenan dekumaka, yoho bake hamu hanéri degemu poréyahamu emaki.
[3] Emohoni, Ala nuguna dosa tobunsuméri umburomoné ememere u yoho égéki nugu ureyafure bohowangkumaka, Ala nugu bake hakereméri poréyahamu emoné moho ékému awe umburomone? Karawoho. Ala nuguna dosa tobunsuméri umburomoné moho éné sisi nogoki mumangge Nugunabo Ahuyaha Yesus Uku pumise yaki. Damu ahu mése Égé yohoni femu dakena yoho nugu bake yohona. Emohoni, nugu u égéki dari haiyangne ememere nafamériya.
[4] Damu Ala hate ahu énéyuhuwoho nuguna dosa tobunsuméri umburomoné moho éné u harahaimu égé égéki yosumahana égéki haiyangne ememere kubumoho: Ala Égé ahu énéyuhuwoho mahamu emohoni, ahu yohote Ala Éné habigiyo féri ukukuwoho-mujizat éné kibi hoso-hoso emu-hori-daha ahu fani emesumahana de égéki emesumahana. Damu hate Ala Éné sifing fimoho hamu hanéri Ala Éné Ubana Hayo ahu yoho bake habigiyo deregemu égena égéki burahae kemeroho. Ememere eméri Ala nuguna dosa tobunsuméri umburomoné moho éné u harahaimu égé égéki haiyangne ememere kubumoho.
[5] Damu embahae sawa akimamaga soho harahai defené moho nugu katugo éyoriya égéki, Ala fani malaikat bake Éné na habigiyo kurohoni, yohote hafuféri etori bohonan deyoho.
[6] Emohote, Ala Éné Buku womu ékému ahu fe ememere Ala bake emiyoho, "Eeng! Ahu hayang fe fani habigiyoméri baha deyohote, Nabo Gusé fani gagabumoho deyoho. Eeng! Ahu énamu amiféri bahate, Nabo Gusé égéki etori baha.
[7] Ahu égéki Ala Gusé emakini égéte fani kebekin de yahamutomu amiféri bahate, malaikat yoho asuféri bahana. Emohote, Ala Gu égé bake éné na esumu fikokigi égéki kuraki, damu Gusé emakini égé asuféri baha ememere yori énaukungguna.
[8] Kukuwoho haharemu égena damu kukuwoho fani haharemu égena de emu-hori-daha emaki égéki Ala Gusé ahu hayang fe égé bake kubumu yohoni, égéte yeri hafuféri etori baha." Ememere Ala Éné na kurohoni ahu hayang fe égé awe kukuwoho haharemu égena damu kukuwoho fani haharemu égena de emu-hori-daha yeri hafuféri etori bohoné. Damu Ala emiyoho, "Fe fani modini gané u fani dari bohon deyoho." Ala ememere yohote, embahae niyaki nugu etori nafamériyani kukuwoho haharemu égena damu kukuwoho fani haharemu égena de emu-hori-daha égena yoho fani éné u dari bahana deyoho.
[9] Emohote, katugo nogo nugu etori nafamériya égéki Yesus Égé kéré. Ala mése Yesus Égéki emohoni, Égéte Ahu hayang kiri fani kebemu égé de égéki yahamutomu amiféri bahate, malaikat yoho asuféri bahana. Ememere amiféri beri Yesus Égé ahu emu-hori-daha nugu niye kugutoméri kunggu. Emohote, katugo nogoki Ala Égé bake Éné na esumu fikokigi égéki kuroho, damu ahu yoho Égé asuféri baha ememere yori Énaukungguna. Haiyangne, Ala nuguki kuyomu worumohoni, Yesus Égésé ahu emu-hori-daha nugu niye kugutoméri kunggu ememere emoho kéré.
[10] Ala Égésé kukuwoho haharemu égena damu kukuwoho fani haharemu égena de emu-hori-daha égéki emaki, damu Égé Égé niye emohoni kukuwoho énéyuhuwoho damu de bahana. Emohoni, Ala Énamkesiyo yoho Éné na esumu fikokigi égéki yeri Égé kumu kotoféri asuféri bohonané mahana égéki haiyangmu égé. Damu Énamkesiyo yoho awe asuféri kotoféri bohonan niye emoho égéki, Ala Égésé emohoni Yesus Égéte kugutoméri kunggu. Ememere Yesus Égé kugutoméri kungguni, Yesus Égé Ahuhabang nuguna dosa tobunsuméri umburomoné moho Nahu kiri fe fani poréyahamu égé deyohote, esumu manggohomu baha kéré.
[11] Yesus Ala Énamu woroyaha kigi Égésé emakini, nugu nuku Ala bake kurori wayamu beriya. Yesus Égé damu nugu kotoféri Nugunabo kamisigemu beriya, Uku Ala kamisige baha Égé séré. Emoho nemohoni, Égé nuguki etori "Nané yahagisi yoho kéré" ememere yoho égéki fani hosungkigi deyoho.
[12] U nogoki Ala Éné Buku ékému Ala Énamu Yesus Ala bake ememere yoho égéki kara uwangki égé: "Nabo Gu ukukuwoho emesumoho égéki Nusé awe Nané yahagisi yoho bake yahae. Nu awe Ganahu yoho dukumahana ékému kubu iri Ganaukume."
[13] Damu Yesus Ala bake hate emiyoho, "Nu awe esemu Ala Gu bake haiyangne ememere fimiri bahae." Damu Égé hate ememere yoho, "Nu kumu Gamkesiyo Ala Gusé Nu bake kuroho yoho kumu kotoféri nokumu méséri ériya."
[14] Ala Énamkesiyo kiri beriya nuku ahu hayang kiri beriya, damu nugu gong damu haha de égenani, Yesus Uku hate nugu gahakumu Ahu hayang kiri bahani, Égé gong damu haha de égena. U feki Égé Ahu hayang kiri bahaka, damu kunggu. Emohoni, hohoi yohona ahuhabang Iblis wakigini, Iblis égé fani tafe éné habigiyo féri emoné ahu dosa yahana yoho akumenané embahae posu-posukin deyoho.
[15] Damu ahu yoho sawa hamu sifing féri bahana égéki, yoho akumenané mahana éné habigiyo égéki mokéri bahana. Yoho ememere fimiri bahana, "Nugu fani akumowan de awe bohowané embahae posu-posukin kiyoho." Ememere mokéri fimahana yohoki Yesus Égésé umburomon niye kunggu kéré.
[16] U nogoki haiyangne: Yesus Égé malaikat yohoki umburomon niye ahu hayang kiri baha deyoho, emohote Uku Abraham éné go Énini fimiri beriya nuguki umburomon niye.
[17] Emoho nemohoni, Yesus Égé Éné matahai yangna besingna nugu gahakumu Égé esumu Ahu hayang kiri baha. Ememere Ahu hayang kiri baha égéki haiyangne. Ememere eméri Égé esumu Ahu-Imam esumu asuféri baha Nahu kiri bohoné. Damu Égé Ahu-Imam esumu asuféri baha Nahu kiri damu nugu bake kuyomu woruméri emoné. Damu Égé Ahu-Imam esumu asuféri beri Ala Éné u dari Éné furubo yeri baha égéki fani munggu de wayamu emesuméri bohoné. Damu Égé Ahu-Imam esumu asuféri ememere bahani, Égé Uku awe Éné aduwosoho égéki ohoru gahakumu Ala bake kurohoné, damu nugu dosa yariyani awe akumané mériya nugu gahakumu akumoné. Emohoni, Ala nuguna dosa tobunsumoné.
[18] Damu Yesus Égéki hohoi yohona ahuhabang Iblis égésé mése Égé dosa afén niye yokuni ikuhamohoni esumu kugutomoho. Égé mése ememere emohoni, hohoi yohona ahuhabang Iblis ahu yohoki yokuni ikuhamoho égéki, Yesus Égé habigiyoméri ahu énéyuhuwoho mahamu emoné, emohoni yohote fani dosa afénan deyoho.