[1] Nané matahai yohoniya, Yakobus nusé Nabo Ala damu Nabo Yesus Kristus Yohona u dari furubo yeri bere. Damu nu u fe de égéni, Yahudi nahu nuguna go bibirikuma-ketahafi-ukuma (12) yoho ahahaméri soho emu-hori-daha ékému bahana gugu bake kara nogoki uni. Damu gugu bake ememere yoré, "Gugu de bahanae?"
[2] Nané matahai Yesus Énini fimiri bahana yohoniya, gugu bahana égéki, ukukuwoho agefekigi éné kibi hoso-hoso gebuuguna égéki gugu Yesus Énini fimiri bahana égéki ikuhamongkumaki, emohoni gugu nogoki manggohokigi ememere fimiri guguna modu hanikinané.
[3] Ukukuwoho agefekigi gebuuguna égéki, gugu Yesus Énini fimiri bahana rahamo kara rahamo ememere guguki ikuhamahana. Damu ikuhamahana égéki, gugu isige-isige damu Yesus nuki etori baha ememere Énini fimiri bahana. Damu tafe ikuhamahana égéki, guku damu Énini fimiri bahana. Ememere damu modu dongkuni Yesus Énini fimiri bohonangkumaka, gugu nafamahanani embahae gugu ukukuwoho agefekigi tafe gebufunangkumaka, gugu habigiyoméri Yesus nu etori baha ememere fimiri guguna modu dongkuni esemu Énini fimiri bohonané. Emoho nemohoni, guguna modu hanikinané.
[4] Damu guguna modu dongkuni Yesus nuki etori baha ememere fimiri damu Énini fimiri bunané. Damu tafe modu dongkuni Énini fimiri bunané. Ememere bohonangkumaka, gugu esumu habigiyoméri kirimu Énini fimiri bohonané, damu Ala Éné modu hanikigi égéki emesuméri bohonané, fe fani poréyakin deyoho.
[5] Emohote, ahu menohosé sifing wayamu fimiri wayamu emoné moho égéki fani nafamon dekumaki, esemu Ala bake fisini nou. Ala utuhu haméri ahu égé bake sifing wayamu fimiri wayamu emoné moho égéki kurohoné. Ala ahu u fisini yohona yoho bake fani hakereméri ufuyohon deyoho, damu Ala Éné modu kuyoméri égéni, ahu gogo emu-hori-daha u fisini yohona yoho bake kurohoné.
[6] Emohote, ahu Ala bake u égé niye fisini yohoné moho égéki, nu Ala bake u fisini yoré égéki Ala esemu nu bake kurohoné ememere fisini fimiri nouwané. Mite, Ala awe kurohon rahamo kara rahamo ememere sifing kabe ukuma fimiri fani gagitomon deyoho. Damu ahu ememere gagitomongkumaki, égé kiyohouyaha kifi tofumohoni ohonu ogu-musumoho gahakumu baha.
[7] Damu ememere gagitoméri baha égé éné sifing kabe ukuma fimiri baha. Emohoni, ahu égé ukukuwoho emu-hori-daha emoné moho égéki fani wayamu yori inggemoho deyoho. Emoho nemohoni, ahu ememere baha égé Nabo Ala nu bake ukukuwoho yoré égéki awe kurohoné fani ememere fimon deyoho, meneféyané.
[9] Ahu Yesus Énini fimiri toto karakigina damu ahu burahae amiféri bahana yohoniya, guguna modu esumu aburohomu hanikinané. Ala emohoni gugu Ala Énahu kigina, damu Ala fimohoni gugu asuféri bahana. Emoho nemohoni, guguna modu esemu hanikinané.
[10] Damu ahu Yesus Énini fimiri toto aburoho bahana yohoniya, gugu guguna modu hanikinané. Hatang éné ke bubuwoni migini, anibokigi. Hamemere guguna toto aburoho kufiyohona nogoki kamu soho nokumu fani kebemu éyonan de, awe anigiyonané mahana égéki gugu mése nafamahana. Gugu ememere ukuni nafamahanani guguna modu esemu hanikinané.
[11] Damu sawa materi bumusumoho migini esemu apohokigi égéki, hatang awe fufungkéri emohoni, éné ke bubuwoni migi damu waneri bahana égéki anibokigina. Hamemere ahu toto aburoho bahana yohona furubo égé remu yeri kiyo tini bahana yoho awe ememere arohori akumenané.
[12] Ukukuwoho agefekigi égéki ahu menohoki ikuhamongkumaki, égé damu Yesus nuki etori baha ememere fimiri modu dongkuni baha éné modu hanikinané. Égé damu Yesus Énini fimiri bahani, Yesus Énini fimiri baha égéki haiyangne ememere kubumoho. Emohoni, égé awe Ala kumu kotoféri bohonané embahae posu-posukiné. Ala kumu kotoféri bohonané embahae posu-posukiné moho égéki ahu Alaki worumahana yoho awe afénané ememere Ala u yahamoho égé kéré.
[13] Emohote, ahu isige-isige dosa afén niye ikuhamoho égéki, Alasé nuki ikuhamohoré fani ememere yohon deyoho. Ala Égé ahu yoho ukukuwoho keiyongmu emenan niye fani ikuhamusumoho deyoho. Damu hate ahu fe fani Ala Égé keiyongmu emon niye fani Égéki esumu ikuhamon deyoho. Emohoni, Alasé ikuhamohoré fani ememere yohonan deyoho.
[14] Emohote, ahu isige-isige dosa afén niye ikuhamoho égéki uku éné sifing keiyongmu fimoho égéki adibiméri emohoni, keiyongmu emoho kéré.
[15] Damu ememere ahu égé keiyongmu fimoho égéki hanikéri hamemere emongkumaki, égé mése age dosa yaha. Damu égé keiyongmu emesuméri dosa kemesumongkumaki, damu égé fani undoméri modin dekumaki, égé Ala kumu fani kotoféri bohonan de degemu bohoné embahae posu-posukiné.
[16] Nané matahai Yesus Énini fimiri bahana yohoniya, nu guguki woruméré. Gugu fani Ala keiyongmu emoho ememere yori guku guguki fani yahamu yori degemu emenan deyoho.
[17] Ala Éné busu mene baha Égésé ukukuwoho kamisige-kamisige esemu wayamu égé damu fe fani poréyahamu égé de égéki gugu bake kurosumoho. Damu kamu kumu mi kumu ememere kukuwoho emu-hori-daha hou siyaha hosumu uwaneri égena égéki Nugunabo Alasé yori emaki. Ememere kukuwoho uwaneri égena égéki wayamu bumoho, fani wayamu bumoho deyoho, ememere degemu emesumoho. Emohote, Ala degemu baha, damu hate degemu baha, fani emesuméri baha deyoho, damu Ala asu-sawa manggohomu baha.
[18] Damu Ala Yesus Éné sisi nugu bake yobuwoméri yoho. Damu nugu Éné sisi dari haiyangne ememere fimiriya. Emohoni, nugu Ala kumu kotoféri sifing harahaimu fimiri beriya. Ala ememere emoho égéki Égé Ukuné sifingmu fimiri emoné moho égé kéré. Emohoni, Ala kukuwoho emu-hori-daha emaki ékému nugu Ala Énahu kiri esumu manggohomu beriya.
[19] Nané matahai Yesus Énini fimiri bahana yohoniya, nu guguki woruméré. U nogoki femu wayamu nafanané: Ahu kamisige-kamisige hanikéri ahu yohona u kakumu femu wayamu narané. Damu femu wayamu u yohonan niye fani kakumu u yohonan deyoho. Damu fani kakumu kefari yohonan deyoho, meneféyané!
[20] Ahu kakumu kefari yohongkumaki, kefari yoho égéki Ala Éné modu hanikigi égéki fani emon deyoho.
[21] Emoho nemohoni, guguna modu ukukuwoho emu-hori-daha poréyahamu égena égéki penané otohoiné. Damu guguna sifing keiyongkéri ahu yoho bake emesumahana égéki meneféyané. Damu Ala Yesus Éné sisi yoho égéki habigiyoméri égéni, gugu ahu kunggu gahakumu bohonané mahana ékému guguki umburomoné. Emohoni, guguna modu amiféri Ala Yesus Éné sisi yoho égéki hanikéri dagena yaki égéki yeri bunané.
[22] Damu gugu Ala Éné u dari ureyafuri bohonan deyoho, mite Ala Éné u esumu dari u yohoto hamemere emesunané. Damu kamu Ala Éné u remu dagenate fani emesumenan dekumaka, gugu Ala Éné u dagena égéki mése degigi ememere fimiri guku guguki yahamu yohona.
[23] Damu ahu Ala Éné u dagenate ureyafuri bohonangkumaka, ahu ohousi éné ketobégé makemere baha ememere etoho égéki hamemere emoho.
[24] Damu ahu égé ememere éné ketobégé égéki femu wayamu etohoki, damu égé kusumu hori damu éné ketobégé makemere bahani etoho yaki égéki mése dakumu gagabumoho.
[25] Emohote, Nugunabo Yesus Éné akiya yokukubumoho égéki esemu manggohokigi, damu Éné akiya yokukubumoho égéki esemu habigiyomohoni, ahu poréyahamu emoné mohoto ékému umburomoho. Ahu égé Nugunabo Yesus Éné akiya yokukubumoho égéki femu etori bahani, égé fani Nugunabo Yesus Éné akiya yokukubumoho égéki fani u remu dari ureyafuri bohonan deyoho, damu égé u égéki dari fani gagabumon deyoho. Damu égé esemu u yoho égéki dari u yohoto hamemere emesumohoni, Ala ahu égéki wayamu emoné.
[26] Ahu fe yori emiyoho, "Nu esemu Ala Éné modu hanikigi égéki emesuméri wayamu bere, damu kukuwoho fe fani poréyahamu eméré deyoho," ememere yoho. Emohote, ahu égé éné fage féri u yoho égéki fani hafuféri etori bohon dekumaka, égé uku égéki yahamu yoho. Damu égé Yesus Énini fimiri sembayang yeri baha égéki homereyaha emoho kéré.
[27] Nugunabo Ala fimohoni ahu yoho Yesus Énini fimiri sembayang yeri bahana égéki fe fani poréyahakin de esemu manggohokigi égéki ememere égena: Ahu yoho ofo moku yoho kumu ahamo yoho kumu ememere ukukuwoho agefekigi gebuuri kugutoméri bahana yohoki femu wayamu etori bahana égé kéré. Damu feki ahu fani Yesus Énini fimiri bahana de yoho keiyongmu emesumahana égéki fani kotoféyahana de égé kéré.