[1] རིན་ཐང་ཆེ་བའི་འབྱུག་སྣུམ་ལས་ཀྱང་མཚན་སྙན་གྲགས་དེ་ལེགས། མི་སྐྱེ་དུས་ལས་འཆི་དུས་ལེགས།
[2] སྟོན་མོ་བྱེད་པའི་ཁྱིམ་དུ་འགྲོ་བ་ལས་མྱ་ངན་བྱེད་པའི་ཁྱིམ་དུ་འགྲོ་བ་ལེགས། རྒྱུ་མཚན་དེ་ནི་མི་ཚང་མའི་འགྲོ་ལུགས་ཡིན་ཏེ། ཡང་གསོན་པའི་མི་ཡིས་དོན་དེ་སེམས་སུ་བཟུང་ངེས་ཡིན།
[3] དགའ་བ་ལས་སྐྱོ་བ་ལེགས། རྒྱུ་མཚན་སྐྱོ་བའི་གདོང་གིས་སེམས་ལ་ཕན་ཐོགས་པ་ཡིན།
[4] མཁས་པའི་སེམས་ནི་མྱ་ངན་གྱི་ཁྱིམ་དུ་ཡོད། བླུན་པོའི་སེམས་ནི་འདོད་ཡོན་གྱི་ཁྱིམ་དུ་ཡོད།
[5] བླུན་པོའི་གླུ་ལ་ཉན་པ་ལས་མཁས་པའི་བཀའ་བཀྱོན་ལ་ཉན་ན་ལེགས།
[6] བླུན་པོའི་དགོད་སྒྲ་ནི་ཚེར་མ་མེ་ལ་བསྒྲོན་པ་དང་མཚུངས་པས་ཕྱིར། འདི་ཡང་སྟོང་བ་ཡིན།
[7] བཙན་འཕྲོག་བྱེད་ན་མཁས་པ་བླུན་པོར་འགྱུར། ལྐོག་རྔན་གྱིས་ནི་མི་སེམས་བརླག་པར་འགྱུར།
[8] བྱ་བ་ཞིག་གི་ཐོག་མ་ལས་མཇུག་འབྲས་ལེགས། སེམས་སུ་ང་རྒྱལ་སྐྱེས་པ་ལས་བཟོད་སྒོམ་བྱེད་པ་དེ་ནི་ལེགས་སོ། །
[9] ཁོང་ཁྲོ་ནི་བླུན་པོའི་སེམས་སུ་གནས་པའི་ཕྱིར། རང་གི་སེམས་ནི་རང་དགར་ཁྲོ་བར་མི་བྱའོ། །
[10] ཁྱོད་ཀྱིས་ད་ལྟའི་དུས་ལས་སྔ་མའི་དུས་ནི་ཅིའི་ཕྱིར་དར་པ་ཡིན་ནམ་མ་ཟེར་ཞིག གང་ལ་ཞེ་ན། དེ་བཞིན་འདྲི་བ་ནི་མཁས་རྟགས་མ་ཡིན་ནོ། །
[11] ནོར་སྐལ་དང་ཤེས་རབ་གཉིས་ཀ་བཟང་སྟེ། ཉི་མ་མཐོང་བ་དག་ལ་དེས་ཕན་ཐོགས་པ་ཡིན།
[12] ནོར་གྱིས་མི་སྲུང་བ་ལྟར་ཤེས་རབ་ཀྱིས་ཀྱང་བསྲུང་བར་མཛད། ཤེས་རབ་འབའ་ཞིག་གིས་ཤེས་རབ་དང་ལྡན་པ་རྣམས་ཀྱི་ཚེ་སྲོག་གཅེས་སྲུང་མཛད་ནུས་ཤིང་དེ་ནི་ཤེས་བྱའི་ཕན་ཡོན་ཡིན།
[13] དཀོན་མཆོག་གིས་ཅི་ཞིག་མཛད་པར་གཟིགས་དང་། སུ་ཞིག་གིས་ཁོང་གིས་བཀུག་པ་བསྲང་བར་ནུས་སམ།
[14] བཀྲ་ཤིས་པའི་དུས་སུ་དགའ་བར་གྱིས། དཀའ་སྡུག་མྱོང་དུས་བསམ་བློ་ཐོངས། དཀོན་མཆོག་གིས་དོན་འདི་གཉིས་འབྱུང་བར་མཛད་པ་སྟེ། མི་ཡིས་འབྱུང་འགྱུར་མི་ཤེས་པའི་ཕྱིར་རོ། །
[15] དྲང་བདེན་ཅན་ནི་དྲང་བདེན་ནང་དུ་འཆི་བ་དང་། ངན་པས་སྡིག་པའི་ནང་དུ་མི་ཚེ་བཏང་ནས་ཚེ་ལོ་མཐར་ཕྱིན་པ་ནི་ངས་སྙིང་པོ་མེད་པའི་མི་ཚེ་ལ་རོལ་དུས་མཐོང་བྱུང་།
[16] བཟང་ཚད་ལས་བརྒལ་དུ་མ་འཇུག སྤྱང་ཚད་ལས་བརྒལ་དུའང་མ་འཇུག རང་གིས་རང་ཉིད་འཕུང་བར་ཅི་ལ་བྱེད།
[17] ཚོད་མེད་པར་སྤྱོད་ངན་མ་བྱེད། བླུན་པོར་མ་གྱུར་ཅིག དུས་མ་སླེབ་པར་འཆི་དགོས་དོན་ཅི་ཡོད།
[18] འདི་བསྲུང་བར་མ་ཟད་གཞན་དེ་ཡང་ལག་པས་མ་ལྷོད་ཅིག ཅི་ལ་ཟེར་ན། དཀོན་མཆོག་ལ་གུས་ཤིང་འཇིགས་པ་རྣམས་ནི་འདི་གཉིས་ལ་གཡོལ་ངེས་ཡིན།
[19] ཤེས་རབ་ཀྱིས་གྲོང་ཁྱེར་ལ་ཡོད་པའི་འགོ་དཔོན་བཅུ་ལས་མཁས་པ་ལ་ནི་ལྷག་པར་སྟོབས་དང་ལྡན་པར་བྱེད།
[20] ས་སྟེང་དུ་རྟག་ཏུ་བཟང་པོ་བྱེད་ཅིང་ཉེས་པ་གང་ཡང་མི་བྱེད་པའི་མི་དྲང་པོ་ནི་གཅིག་ཀྱང་མེད།
[21] གཏམ་ཐམས་ཅད་ལ་དོ་སྣང་མ་བྱེད་ཅིག ཇི་སྟེ་བྱས་ན་གཡོག་པོས་ཁྱོད་ལ་སྨོན་ལོག་འདེབས་པ་ཐོས་པར་འགྱུར།
[22] དེ་ཅིའི་ཕྱིར་ཞེ་ན། ཁྱོད་ཀྱིས་ཀྱང་ལན་དུ་མར་གཞན་ལ་དེ་བཞིན་དུ་སྨོན་ལོག་བཏབ་པ་ནི་ཁྱོད་རང་གི་སེམས་ཀྱིས་ཤེས་སོ། །
[23] ངས་དེ་སྔར་འདི་ཐམས་ཅད་ལ་ཤེས་རབ་ཀྱི་སྒོ་ནས་དཔྱད་པ་ཡིན། ང་མཁས་པར་འགྱུར་འདོད་ཅེས་སྨྲས་ཀྱང་། དེ་ནི་ང་དང་རྒྱང་རིང་དུ་མཆིས་ཏེ།
[24] བྱ་བ་ཡོད་ཚད་རབ་ཏུ་རྒྱང་རིང་ཞིང་ཤིན་ཏུ་གཏིང་ཟབ་པས། སུ་ཞིག་གིས་དེ་རྟོགས་པར་ནུས་སམ།
[25] ངས་རང་གི་བློ་ཁ་བསྒྱུར་ཏེ། སེམས་གཏིང་ནས་ཤེས་རབ་དང་བྱ་བ་ཡོད་ཚད་ཀྱི་འབྱུང་རྐྱེན་རྟོགས་འདོད་པ་དང་དཔྱོད་འདོད་པ། བཙལ་འདོད་པ་ཡིན། ཡང་བླུན་པོའི་ལུགས་ནི་ངན་པ་དང་། བློ་རྨོངས་པ་ནི་ཧམ་པ་ཆེ་བ་ཡིན་པ་རྟོགས་འདོད་པ་ཡིན།
[26] ཡང་ངས་བུད་མེད་ལ་ལ་ནི་འཆི་བ་ལས་ཀྱང་ཁ་མོ་ཡིན་པ་དང་། སེམས་ནི་རྙི་རྒྱ་དང་ལག་པ་ནི་ལྕགས་ཐག་ལྟ་བུ་ཡིན་པ་རྟོགས་ཤིང་། དཀོན་མཆོག་ཐུགས་མཉེས་པ་རྣམས་ནི་མོ་ལས་ཐར་བ་དང་། སྡིག་ཅན་རྣམས་ནི་མོས་འཛིན་པར་འགྱུར།
[27] ཀྱེ་ཧོ་སྟོན་པས་འདི་སྐད་དུ། ངས་མཐར་ཐུག་དེ་རྟོགས་པའི་དོན་དུ་རེ་རེ་བཞིན་བསྡུར་ནས་རྩད་ཆོད་པ་ནི། བྱ་བ་ཡོད་ཚད་ཀྱི་འབྱུང་རྐྱེན་ཤེས་འདོད་པ་ཡིན་ཏེ།
[28] ད་ཙམ་གྱི་བར་དུ་ངའི་སེམས་ཀྱིས་བཙལ་ཡང་མ་ཐོབ། སྐྱེས་པ་སྟོང་ཕྲག་གི་ནང་ནས་གཞུང་དྲང་གཅིག་ངས་རྙེད་ཀྱང་། བུད་མེད་ཐམས་ཅད་ལས་གཞུང་དྲང་གཅིག་ཀྱང་རྙེད་མ་བྱུང་།
[29] དཀོན་མཆོག་གིས་མི་ནི་དྲང་པོར་བཀོད་ཀྱང་། དེ་དག་གིས་བྱུས་ངན་མང་པོ་བཙལ་ཡོད་པ་ཁོ་ན་ངས་རྙེད་པ་ཡིན་ནོ། །