[1] ཡེ་རུ་སཱ་ལེམ་གྱི་རྒྱལ་པོ་སྟེ་དཱ་བིད་ཀྱི་སྲས་སྟོན་པ་ལགས་པའི་གཏམ་ནི་འདི་ལྟ་སྟེ།
[2] སྟོང་བའི་སྟོང་བ། སྟོང་བའི་སྟོང་བ། ཐམས་ཅད་སྟོང་བ་ཡིན་ཞེས་སྟོན་པས་གསུངས།
[3] མི་ཡིས་ཉི་མའི་འོག་ཏུ་ངལ་རྩོལ་བྱས་ཏེ་དཀའ་སྡུག་མྱངས་པ་ལ་ཕན་ཐོགས་ཅི་ཡོད།
[4] མི་རབས་ཤིག་འདའ་ཞིང་ཡང་མི་རབས་ཤིག་འབྱུང་། ས་གཞི་ནི་རྟག་ཏུ་གནས།
[5] ཉི་མ་འཆར་ཞིང་ཉི་མ་ནུབ་པ་དང་། མཐར་འཚབ་འཚུབ་ངང་རང་གནས་སུ་བཞུད་འགྲོ།
[6] རླུང་ནི་ལྷོ་ཕྱོགས་སུ་གཡུག་ཅིང་ཡང་བྱང་ཕྱོགས་སུ་འཁོར། སྐོར་བ་བརྒྱབ་ནས་འཁོར་ཞིང་ནམ་ཡང་མཚམས་མི་ཆད།
[7] གཙང་པོ་ཡོད་དོ་ཅོག་ནི་རྒྱ་མཚོར་ཞུགས་ཀྱང་རྒྱ་མཚོ་མ་གང་སྟེ། གཙང་པོ་དག་ནི་ཐོན་པའི་གནས་སུ་ཕྱིར་ལོག་པའོ། །
[8] བྱ་བ་ཡོད་ཚད་ཀྱིས་མི་ལ་སུན་སྣང་བསྐྱེད་པ་སྟེ། མི་ཡིས་བརྗོད་མི་ཚར་ལ། མིག་གིས་བལྟས་མི་ཚར། རྣ་བས་ཀྱང་ཉན་མི་ཚར་བ་ཞིག་གོ །
[9] གང་ཞིག་བྱུང་ཟིན་པ་དེ་ནི་ཡང་བསྐྱར་འབྱུང་བར་འགྱུར་ལ། གང་ཞིག་བྱས་ཟིན་པ་དེ་ནི་ཡང་བསྐྱར་བྱེད་པར་འགྱུར་བས། ཉི་མའི་འོག་ཏུ་གསར་པ་ཅི་ཡང་མེད་དོ། །
[10] ཡང་མི་ཡིས་འདི་ནི་གསར་པའོ་ཞེས་སྨྲ་ནུས་པའི་བྱ་བ་ཅི་ཞིག་ཡོད་དམ། མ་གཞི་དེ་ནི་རང་ཅག་གི་ཡར་སྔོན་ལ་དུས་སྔ་མོ་ནས་ཡོད་པ་ཡིན།
[11] འདས་ཟིན་པ་ནི་སུས་ཀྱང་མི་དྲན་ལ། འབྱུང་འགྱུར་དག་ཀྱང་མི་རབས་རྗེས་མ་རྣམས་ཀྱིས་དྲན་པར་མི་འགྱུར་རོ། །
[12] སྐབས་དེར་སྟོན་པ་བདག་ནི་ཡེ་རུ་སཱ་ལེམ་དུ་ཡེས་ར་ཨེལ་གྱི་རྒྱལ་པོ་བྱེད་དུས།
[13] བདག་གིས་རང་གི་ཤེས་རབ་ཀྱིས་གནམ་འོག་ཏུ་བྱུང་བའི་བྱ་བ་ཐམས་ཅད་ལ་སེམས་རྣལ་དུ་ཕབ་ནས་བརྟགས་པ་ན། དཀོན་མཆོག་གིས་མི་ལ་ཁུར་བོ་ལྗིད་མོ་གནང་ནས་ཁོ་ཚོར་དཀའ་སྡུག་མྱང་བར་མཛད་པའོ། །
[14] ངས་ཉི་མའི་འོག་ཏུ་བྱུང་བའི་དོན་ཐམས་ཅད་ལ་བལྟས་པ་ན། ཐམས་ཅད་སྟོང་བ་ཡིན་པ་དང་། རླུང་གི་རྗེས་སུ་འདེད་པ་ཙམ་ཡིན་པ་རྟོགས།
[15] འཁྱོག་པོ་ཡིན་པ་བསྲང་མི་ནུས་ལ། མེད་པ་དེ་རྩི་བར་མི་ནུས།
[16] ངའི་སེམས་སུ་ང་ལ་ཤེས་རབ་ཆེན་པོ་ཐོབ་ཅིང་། ངའི་ཡར་སྔོན་དུ་ཡེ་རུ་སཱ་ལེམ་ལ་དབང་སྒྱུར་མཁན་ཐམས་ཅད་ལས་ཀྱང་ལྷག་པ་ཡིན་ཏེ། ངའི་སེམས་སུ་ཤེས་རབ་དང་ཤེས་བྱ་ཉམས་ལེན་ཐོབ་བྱུང་སྙམ།
[17] བདག་གིས་ཡང་བློ་སེམས་རྩེ་གཅིག་གིས་ཤེས་རབ་དང་ཤེས་བྱ་དང་། སྨྱོ་ཧམ་དང་བླུན་རྨོངས་ཅི་ཡིན་པར་ཞིབ་ཏུ་བརྟགས་པ་ན། ད་གཟོད་དེ་ཡང་སྟོང་བ་ཡིན་པ་རྟོགས་བྱུང་།
[18] ཅི་ལ་ཞེ་ན། ཤེས་རབ་འཕེལ་ན་སྡུག་བསྔལ་དེ་ལས་མང་ཞིང་། ཤེས་བྱ་མང་ན་མྱ་ངན་དེ་ལས་ཆེ་བའོ། །