[1] བྱ་བ་ཐམས་ཅད་ལ་དུས་ཤིག་ཡོད་དེ། གནམ་འོག་གི་དོན་རེ་རེ་ལ་དུས་ཚོད་ཅིག་ཡོད།
[2] སྐྱེ་བའི་དུས་ཤིག་ཡོད་དེ། འཆི་བའི་དུས་ཤིག་ཀྱང་ཡོད། ཤིང་སྡོང་འཛུགས་པའི་དུས་ཤིག་ཡོད་དེ། གང་ཞིག་བཙུགས་པ་དེ་བསློག་པའི་དུས་ཤིག་ཀྱང་ཡོད།
[3] སྲོག་གཅོད་པའི་དུས་ཤིག་ཡོད་དེ། གསོ་བར་བྱེད་པའི་དུས་ཤིག་ཀྱང་ཡོད། བཤིག་པའི་དུས་ཤིག་ཡོད་དེ། བསྐྲུན་པའི་དུས་ཤིག་ཀྱང་ཡོད།
[4] ངུ་བའི་དུས་ཤིག་ཡོད་དེ། དགོད་པའི་དུས་ཤིག་ཀྱང་ཡོད། སྨྲེ་ངག་འདོན་པའི་དུས་ཤིག་ཡོད་དེ། གར་རྩེད་ལ་རོལ་བའི་དུས་ཤིག་ཀྱང་ཡོད།
[5] རྡོ་དབྱུག་པའི་དུས་ཤིག་ཡོད་དེ། རྡོ་སྤུང་བའི་དུས་ཤིག་ཀྱང་ཡོད། པང་དུ་ལེན་པའི་དུས་ཤིག་ཡོད་དེ། མི་ལེན་པའི་དུས་ཤིག་ཀྱང་ཡོད།
[6] འཚོལ་བའི་དུས་ཤིག་ཡོད་དེ། འདོར་བའི་དུས་ཤིག་ཀྱང་ཡོད། འཇོག་པའི་དུས་ཤིག་ཡོད་དེ། འཕེན་པའི་དུས་ཤིག་ཀྱང་ཡོད།
[7] ཧྲལ་བའི་དུས་ཤིག་ཡོད་དེ། འཚེམ་པའི་དུས་ཤིག་ཀྱང་ཡོད། ཁ་རོག་སྡོད་པའི་དུས་ཤིག་ཡོད་དེ། གཏམ་སྨྲ་བའི་དུས་ཤིག་ཀྱང་ཡོད།
[8] བྱམས་པའི་དུས་ཤིག་ཡོད་དེ། སྡང་བའི་དུས་ཤིག་ཀྱང་ཡོད། འཐབ་མོའི་དུས་ཤིག་ཡོད་དེ། ཞི་བདེའི་དུས་ཤིག་ཀྱང་ཡོད།
[9] དེས་ན་ལས་ཀ་བྱེད་པའི་མི་ལ་རང་གི་ལས་ཀྱི་ནང་ནས་ཁེ་ཕན་ཅི་ཞིག་འཐོབ་བམ།
[10] དཀོན་མཆོག་གིས་མི་རྣམས་ལ་ཁུར་བོ་ལྗིད་མོ་གནང་སྟེ་ཁོ་ཚོས་དེ་ལས་དཀའ་སྡུག་མྱངས་པ་ངས་མཐོང་བྱུང་ངོ་། །
[11] དཀོན་མཆོག་གིས་ཐམས་ཅད་བཀོད་པ་དང་། ཁོང་ཉིད་ཀྱི་དུས་ལ་དངོས་པོ་ཐམས་ཅད་མཛེས་པར་བཀོད་ཅིང་། མཐའ་མེད་པའི་ཚེ་སྲོག་ཀྱང་དེ་དག་གི་སེམས་སུ་བཞག་པར་མཛད་ནའང་། དཀོན་མཆོག་གི་ཐོག་མཐའ་བར་གསུམ་གྱི་མཛད་པ་ནི་མི་རྣམས་ཀྱིས་རྟོགས་མི་ནུས་སོ། །
[12] མི་རྣམས་ཚེ་གང་བོར་དགའ་ཞིང་སྐྱིད་ལ་རོལ་བ་ལས་གཞན་བདེ་སྐྱིད་མེད་པ་ངས་རྟོགས་བྱུང་།
[13] མི་རྣམས་ཀྱིས་བཟའ་བཏུང་སྤྱོད་པ་དང་། རང་གི་ལས་ཐམས་ཅད་ཀྱི་འབྲས་བུ་ལོངས་སུ་སྤྱོད་པ་ནི་དཀོན་མཆོག་གི་གནང་སྦྱིན་ལགས་སོ། །
[14] དཀོན་མཆོག་གིས་ཅི་མཛད་ཐམས་ཅད་རྟག་ཏུ་གནས་ཏེ། དེའི་ནང་དུ་ཅི་ཡང་བསྣོན་པར་མི་ནུས་ལ་ཅི་ཡང་འཕྲི་བར་མི་འཇོན། དེ་ནི་མི་རྣམས་དཀོན་མཆོག་ལ་གུས་ཤིང་འཇིགས་པའི་ཆེད་དུ་ཁོང་གིས་དེ་བཞིན་བསྒྲུབས་པར་ངས་རྟོགས་བྱུང་།
[15] ད་ལྟ་ཡོད་པ་དེ་སྔར་ནས་བྱུང་ཟིན་པ་དང་། འབྱུང་འགྱུར་གྱི་དོན་རྣམས་ཀྱང་སྔར་ནས་བྱུང་བ་ཡིན་ཏེ། དཀོན་མཆོག་གིས་འདས་ཟིན་རྣམས་ཡང་བསྐྱར་འབྱུང་བར་མཛད།
[16] ཡང་དེས་མ་ཟད་ངས་ཉི་མའི་འོག་ཏུ་ཁྲིམས་ཐག་གཅོད་སར་གཡོ་སྒྱུ་ལྡན་པ་དང་། དྲང་བདེན་ཡིན་སར་གཡོ་སྒྱུ་ཡོད་པའང་རྟོགས་བྱུང་།
[17] ངས་རང་གི་སེམས་སུ། བྱ་བ་རེ་རེ་དང་ལས་དོན་ཐམས་ཅད་ལ་དུས་ཤིག་ཡོད་པས། དཀོན་མཆོག་གིས་མི་དྲང་བདེན་དང་མི་ངན་གཉིས་ལ་ལེགས་ཉེས་འབྱེད་པར་འགྱུར་སྙམ་དུ་བསམས་བྱུང་།
[18] ཡང་ངས་རང་གི་སེམས་སུ། འཇིག་རྟེན་མི་བུ་རྣམས་ལ་མཚོན་ན་དཀོན་མཆོག་གིས་དེ་དག་ལ་བརྟག་པར་མཛད་ཅིང་། མི་རྣམས་ལ་རང་ཉིད་ནི་དུད་འགྲོ་ལྟ་བུ་ཡིན་པ་རྟོགས་སུ་འཇུག་སྙམ་པ་ཡིན།
[19] ཅི་ལ་ཞེ་ན། མི་བུ་རྣམས་ལ་བྱུང་བ་དེ་རྣམས་དུད་འགྲོ་ལའང་འབྱུང་ལ། དེ་གཉིས་ཀའི་མྱོང་ཚུལ་ནི་གཅིག་ཡིན་ཏེ། འདི་ཅི་ལྟར་འཆི་བ་ཡིན་ན་དེ་ཡང་དེ་ལྟར་དུ་འཆི་བ་ཡིན། དེ་གཉིས་ཀྱིས་དབུགས་ལེན་པའང་གཅིག་ཡིན་པས། མི་ནི་དུད་འགྲོ་ལས་རྩ་ཆེན་མ་ཡིན་ལ་ཐམས་ཅད་སྟོང་བ་ཡིན།
[20] ཐམས་ཅད་གནས་གཅིག་ཏུ་འགྲོ་བ་སྟེ། ཐམས་ཅད་ས་རྡུལ་ལས་བྱུང་ཞིང་། ཐམས་ཅད་སླར་ཡང་ས་རྡུལ་དུ་འགྱུར་བ་ཡིན།
[21] མིའི་རྣམ་ཤེས་ནི་ཡར་འདྲེན་པ་དང་། དུད་འགྲོའི་རྣམ་ཤེས་ནི་མར་འདྲེན་པ་སུ་ཡིས་ཤེས་སམ།
[22] དེ་བས། མི་ལ་རང་གི་ལས་རྣམས་ནས་དགའ་སྤྲོ་ཐོབ་པ་ལས་གཞན་དགའ་སྤྲོ་མེད་པ་ངས་མཐོང་། དེ་ནི་ཁོའི་ཟས་སྐལ་ཡིན་པས་སོ། །སུ་ཞིག་གིས་ཁོའི་རྗེས་སུ་འབྱུང་བ་དེ་ཁོ་ལ་སྟོན་ནུས་སམ།