[1] ངས་རང་གི་སེམས་ལ་འདི་ལྟར། ཤོག་དང་། ངས་ཁྱོད་ལ་དགའ་སྤྲོས་དཔྱོད་ཅིང་ཕན་ཐོགས་ཅི་ཞིག་ཡོད་པར་བལྟ་རུ་འཇུག་བསམས་ཀྱང་། འདི་ཡང་སྟོང་བ་ཡིན་ཏེ།
[2] གད་མོ་ལ་བདག་གིས་དེ་ནི་ང་རྒྱལ་ཡིན་པར་སྨྲས། ལོངས་སྤྱོད་གླེང་ན་དེར་ཕན་ནུས་ཅི་ཡོད་དམ།
[3] བདག་གིས་མི་ནི་ཅི་འདྲ་ཡིན་པ་གསལ་བོར་ངེས་ཤིང་། གནམ་འོག་ཏུ་མི་ཚེ་ཐུང་ཐུང་གི་ལོ་ཟླའི་ཁྲོད་དུ་བྱ་བ་གང་ཞིག་ལེགས་པོ་ཡིན་པ་རྟོགས་པའི་བར་དུ། ངའི་ཤེས་རབ་ཀྱིས་ང་ལ་ལམ་བསྟན་ཏེ། རྒུན་ཆང་གིས་ལུས་སྐྱིད་པར་བྱེད་པའི་སྐོར་དང་། བློ་རྨོངས་པ་དེ་དབང་དུ་འགུག་པའི་དོན་དུ་བསམ་བློ་བཏང་།
[4] ངས་ལས་ཆེན་པོ་རྣམས་བྱས་ཏེ། རང་གི་ཕྱིར་ཕོ་བྲང་རྣམས་བཞེངས་ནས་རྒུན་ཚལ་རྣམས་བཙུགས།
[5] མེ་ཏོག་ལྡུམ་ར་དང་སྐྱེད་མོས་ཚལ་རྣམས་བཟོས་ཏེ། དེ་དག་གི་ནང་དུ་ཤིང་སྡོང་སྣ་ཚོགས་བཙུགས།
[6] ངས་ནགས་ཚལ་གྱི་ལྗང་བུ་རྣམས་ལ་ཆུ་གཏོང་བའི་ཆེད་དུ་རྫིང་བུ་རྣམས་ཀྱང་བརྐོས།
[7] ངས་བྲན་གཡོག་གཞན་ཡང་ཉོས་ལ། རང་ཁྱིམ་དུ་སྐྱེས་པའི་བྲན་གཡོག་ཀྱང་ཡོད། ཡང་སྔོན་ཆད་ཡེ་རུ་སཱ་ལེམ་དུ་གནས་པ་ཀུན་ལས་ཀྱང་བདག་ལ་བ་ཁྱུ་དང་། ར་ལུག་གི་ཁྱུ་ལྷག་པར་ཆེན་པོ་ཡོད།
[8] ཡང་ངས་གསེར་དངུལ་དང་། རྒྱལ་པོ་དང་སྡེ་རྣམས་ཀྱི་གཏེར་མཛོད་རྣམས་ཀྱང་རང་གི་ཕྱིར་བསགས་པར་མ་ཟད། གླུ་པ་གླུ་མ་རྣམས་དང་། མི་རྣམས་དུང་བའི་དངོས་པོ་དང་། བཙུན་མོ་རྣམས་ཀྱང་རང་གི་ཕྱིར་བསྡུས་པ་ཡིན།
[9] དེ་ལྟར་བདག་ནི་ཉིན་རེར་རྒྱས་པ་དང་། སྔོན་ཆད་ཡེ་རུ་སཱ་ལེམ་དུ་གནས་པ་ཀུན་ལས་ཀྱང་ལྷག་པར་དར་ཏེ། ངའི་ཤེས་རབ་ནི་ད་དུང་ངའི་ནང་དུ་ལུས་སོ། །
[10] ངས་རང་གི་མིག་གིས་མཐོང་འདོད་པ་ཐམས་ཅད་ལ་བལྟས་ཤིང་། སྐྱིད་པར་བསམས་པ་གང་ལས་ཀྱང་རང་གི་སེམས་ནི་མ་བཀག ཅིའི་ཕྱིར་ཞེ་ན། ངའི་སེམས་ནི་རང་གི་ལས་ཐམས་ཅད་ལ་དགའ་ཞིང་། འདི་ནི་ངས་བྱས་པའི་ལས་ཐམས་ཅད་ནས་ཐོབ་པའི་སྐལ་ཡིན།
[11] དེ་ནས་ངས་རང་བྱས་ཀྱི་ལས་དང་སྡུག་མྱངས་པའི་འབྲས་བུ་ཐམས་ཅད་ལ་བལྟས་པ་དང་། ཀྱེ་ཧོ། དེ་ཐམས་ཅད་ནི་སྟོང་བ་དང་རླུང་གི་རྗེས་སུ་འདེད་པ་ཙམ་ཡིན། ཉི་མའི་འོག་ཏུ་དེ་ལ་ཕན་ཐོགས་ཅི་ཡང་མེད།
[12] དེ་ནས་ངས་ཤེས་རབ་དང་སྨྱོ་ཧམ། བླུན་རྨོངས་བཅས་ཀྱི་ཕྱོགས་སུ་བློ་ཁ་བསྒྱུར་བ་ཡིན། སྔར་ནས་བྱས་ཟིན་པ་དེ་ལས་གཞན། རྒྱལ་པོའི་རྗེས་སུ་འབྱུང་བ་རྣམས་ཀྱིས་གཞན་ཅི་ཞིག་བྱེད་ནུས་སམ།
[13] དེ་ནས་འོད་ནི་མུན་པ་ལས་བརྒལ་བ་ལྟར། ཤེས་རབ་ནི་བླུན་རྨོངས་ལས་བརྒལ་བ་ངས་རྟོགས་བྱུང་།
[14] མཁས་པ་ལ་ནི་ཤེས་རབ་ཀྱི་སྤྱན་དང་ལྡན། བླུན་པོ་ནི་མུན་པའི་ནང་དུ་འགྲུལ་བ་ཡིན། འོན་ཀྱང་དེ་གཉིས་ཀྱི་སྔོན་ལས་གཅིག་ཡིན་པ་ངས་རྟོགས་སོང་།
[15] ངའི་སེམས་སུ་འདི་ལྟར། བླུན་པོ་ལ་འབྱུང་བ་བཞིན་དུ་བདག་ལའང་འབྱུང་བར་འགྱུར་བས། བདག་རབ་ཏུ་མཁས་པར་འགྱུར་དགོས་དོན་ཅི་ཡོད་སྙམ་པ་དང་། ཡང་ངའི་སེམས་སུ་འདི་ཡང་སྟོང་བ་ཡིན་བསམས་པའོ། །
[16] ཅིའི་ཕྱིར་ཞེ་ན། མཁས་བླུན་གཉིས་ཀ་གཅིག་ཡིན་ཏེ་སུ་ཞིག་གིས་ཀྱང་ཁོ་རྣམས་དུས་རྟག་ཏུ་དྲན་པར་མི་བྱ་ལ། མ་འོངས་པའི་དུས་སུ་ཐམས་ཅད་བརྗེད་པར་འགྱུར་བས། བླུན་པོ་ནང་བཞིན་མཁས་པ་ཡང་འཆི་བར་ངེས།
[17] དེའི་རྐྱེན་གྱིས་ཉི་མའི་འོག་ཏུ་བྱེད་པའི་ལས་ནི་སྡུག་བསྔལ་དུ་མཐོང་བས། ང་རང་ཚེ་སྲོག་ལ་སྡང་བ་ཡིན། ཐམས་ཅད་སྟོང་བ་ཡིན་པ་དང་། རླུང་གི་རྗེས་སུ་འདེད་པ་ཙམ་ཡིན་ནོ། །
[18] དེས་མ་ཟད། ཉི་མའི་འོག་ཏུ་བྱས་པའི་ལས་ཐམས་ཅད་ལའང་ང་རང་སྡང་སྟེ། ཅིའི་ཕྱིར་ཞེ་ན། ངས་དེ་རྣམས་མི་རབས་རྗེས་མའི་དོན་དུ་འཇོག་དགོས་པས་ཕྱིར་རོ། །
[19] ཡང་དེ་ནི་མཁས་པའམ་ཡང་ན་བླུན་པོ་ཡིན་པ་སུས་ཤེས། འོན་ཀྱང་ངས་བྱས་པའི་ལས་ཐམས་ཅད་དང་། གང་གི་དོན་དུ་ངས་ཉི་མའི་འོག་ཏུ་རང་གི་ཤེས་རབ་ལ་བརྟེན་ནས་ཐོབ་པ་ལ་དེས་དབང་བསྒྱུར་བས་ན། འདི་ཡང་སྟོང་བ་ཡིན།
[20] དེའི་ཕྱིར་ཉི་མའི་འོག་ཏུ་ངས་འབད་པའི་ལས་ཐམས་ཅད་ལ་ང་རང་ཡིད་ཆད་དོ། །
[21] ཅིའི་ཕྱིར་ཞེ་ན། ཤེས་རབ་དང་ཤེས་བྱ། རིག་རྩལ་བཅས་ལ་བརྟེན་ནས་ཐོབ་པའི་རང་གི་ཡོད་ཚད་ནི། མཐར་ལས་ཅི་ཡང་མ་བྱས་པའི་མི་ལ་ནོར་སྐལ་དུ་འཇོག་དགོས་པའི་ཕྱིར། འདི་ཡང་སྟོང་བ་ཡིན་པ་སྟེ་སེམས་སྡུག་ཆེན་པོ་ཞིག་གོ །
[22] ཉི་མའི་འོག་ཏུ་སེམས་ཁུར་ངང་བྱས་པའི་ལས་ཐམས་ཅད་ནས་མི་ལ་ཅི་ཞིག་ཐོབ་པ་ཡིན་ནམ།
[23] ཁོས་ཉིན་རེར་སེམས་ཁུར་བྱས་པས། ཁོའི་འབད་རྩོན་མྱ་ངན་དུ་གྱུར་ཏེ། ཁོའི་སེམས་ནི་མཚན་མོར་ཡང་ལྷོད་ལ་མ་བབས་པས། འདི་ཡང་སྟོང་བ་ཡིན་ནོ། །
[24] བཟའ་བཏུང་དང་རང་གི་ལས་ཀའི་ནང་དུ་ཡིད་ཚིམ་པ་ལས་ལྷག་པ་ཞིག་མི་ལ་མེད་དེ། དེ་ཡང་དཀོན་མཆོག་གི་ཕྱག་གིས་གནང་བ་ངས་མཐོང་ངོ་། །
[25] བཟའ་བཏུང་དང་ལོངས་སྤྱོད་གླེང་ན། སུ་ཞིག་བདག་ལས་ལྷག་པ་ཡིན་ནམ།
[26] དཀོན་མཆོག་སུ་ལ་ཐུགས་མཉེས་ན་ཁོང་གིས་དེ་ལ་ཤེས་རབ་དང་ཤེས་བྱ། དགའ་སྤྲོ་བཅས་གནང་བ་དང་། སྡིག་ཅན་ལ་ཅི་གནང་ཞེ་ན། དཀའ་སྡུག་གནང་བར་མ་ཟད། དེ་རྣམས་ཀྱིས་བསགས་པའི་རྒྱུ་ནོར་ཐམས་ཅད་ཀྱང་དཀོན་མཆོག་ཐུགས་མཉེས་པ་ལ་ནོར་སྐལ་དུ་གཏོང་ངོ་། ། འདི་ཡང་སྟོང་བ་ཡིན་པ་དང་རླུང་གི་རྗེས་སུ་འདེད་པ་ཙམ་ལས་མ་འདས་སོ། །