[1] ཡང་ཉི་མའི་འོག་ཏུ་གཉའ་གནོན་གྱི་བྱ་བ་རྣམས་བྱུང་བ་ངས་མཐོང་སོང་། གཉའ་གནོན་ཐེབས་མཁན་རྣམས་ངུས་ཀྱང་སེམས་གསོ་བྱེད་མཁན་སུ་ཡང་མེད་དེ། དེ་དག་ལ་གཉའ་གནོན་བྱེད་མཁན་རྣམས་དབང་ཆེ་ནའང་། དེ་དག་ལ་སེམས་གསོ་བྱེད་མཁན་ཡང་མེད།
[2] དེ་བས། ངས་ད་ལྟ་གསོན་པོར་གནས་པའི་གསོན་པོ་རྣམས་ལས་སྔར་ནས་འདས་ཟིན་པའི་གཤིན་པོ་རྣམས་ལ་ལྷག་པར་བསྟོད་པ་ཡིན།
[3] འོན་ཀྱང་དེ་གཉིས་ཀ་ལས་ཀྱང་། ཉི་མའི་འོག་ཏུ་བྱས་པའི་ལས་ངན་པ་མ་མཐོང་བའི་ད་དུང་སྐྱེ་མེད་པ་དག་ནི་སྐྱིད་པར་བསམས།
[4] མི་རྣམས་ཀྱིས་བྱེད་པའི་ལས་དང་གྲུབ་འབྲས་ཐམས་ཅད་ཀྱང་ཕན་ཚུན་བར་གྱི་ཕྲག་དོག་ལས་བྱུང་བ་ངས་མཐོང་བྱུང་། འདི་ཡང་སྟོང་བ་ཡིན་པ་དང་རླུང་གི་རྗེས་སུ་འདེད་པ་ཙམ་མོ། །
[5] བླུན་པོས་ལག་པར་ལག་པ་འཐམས་ནས་རང་ཤ་རང་གིས་ཟ་བ་ཡིན།
[6] དཀའ་ལས་དང་ལྡན་པའི་སྤར་བ་གཉིས་ལས། སེམས་ལྷོད་པོའི་སྤར་བ་གང་ལེགས་སོ། །
[7] དེ་ནས་ངས་སླར་ཡང་ཉི་མའི་འོག་གི་སྙིང་པོ་མེད་པའི་དོན་ཞིག་མཐོང་བ་ནི།
[8] མི་ལ་ལ་གྲོགས་མེད་ཁེར་རྐྱང་ཡིན་ལ། བུ་ཡང་མེད། སྤུན་ཟླ་ཡང་མེད། འོན་ཀྱང་དེའི་འབད་བརྩོན་ལ་རྫོགས་མཐའ་མེད་ལ། དེའི་མིག་ནོར་གྱིས་ཀྱང་མི་ཚིམ། དེས་ན་རེ། ངས་དཀའ་ལས་ཡོད་ཚད་སུའི་དོན་དུ་མྱོང་ཞིང་། ཅི་ལ་རང་གི་སེམས་བདེ་བ་ལས་འབྲལ་བར་བྱེད་དམ་ཟེར། འདི་ཡང་སྟོང་བ་ཡིན་ལ་ཁུར་པོ་ཤིན་ཏུ་ལྗིད་མོ་ཡིན་ནོ། །
[9] མི་ཁེར་རྐྱང་ལས་མི་གཉིས་ཡིན་ན་དགའ། གང་ལ་ཞེ་ན། དེ་དག་ལ་ལས་ཀྱི་རྔན་པ་ལེགས་པར་འཐོབ་སྟེ།
[10] གཅིག་འགྱེལ་ན་གཞན་དེས་རང་གི་གྲོགས་པོ་སློང་བར་བྱ། འོན་ཀྱང་གཅིག་པུ་ཡིན་པ་དེ་འགྱེལ་ན། ཁོ་རང་སློང་མཁན་མེད་པས་མི་དེར་ཆག་སྒོ་ཡིན་ནོ། །
[11] ཡང་མི་གཉིས་མཉམ་དུ་ཉལ་ན་དྲོན་པོ་ཡིན་མོད། འོན་ཀྱང་མི་ཁེར་རྐྱང་ནི་ཇི་ལྟར་དྲོ་བར་འགྱུར།
[12] ཡང་མི་ཁེར་རྐྱང་ནི་དགྲ་ངོར་འཕམ་ཞིང་མི་གཉིས་ཀྱིས་ཐུབ་པར་འགྱུར། ཐག་པ་སུམ་རྐྱ་ནི་མྱུར་དུ་མི་ཆད།
[13] ཞལ་གདམས་ལ་མི་ཉན་པའི་རྒྱལ་པོ་བླུན་པོ་ཞིག་ལས། ན་གཞོན་དབུལ་པོ་མཁས་པ་ཞིག་ལེགས།
[14] རྒྱལ་སྲིད་ཀྱི་ནང་དུ་དབུལ་པོར་སྐྱེས་མཁན་དེ་བཙོན་ར་ནས་འཐོན་ཞིང་རྒྱལ་སྲིད་འཛིན་དུ་འོང་ངོ་། །
[15] ཡང་ཉི་མའི་འོག་ཏུ་གསོན་པོར་གནས་པ་ཐམས་ཅད་རྒྱལ་པོ་རྒན་པ་དེའི་ཚབ་ཏུ་རྒྱལ་སྲིད་འཛིན་དུ་འོང་བའི་ན་གཞོན་དེའི་རྗེས་སུ་འབྲངས་ཏེ།
[16] ཁོས་སྐྱོང་བའི་མི་རྣམས་ཏེ་འབངས་མི་ཐམས་ཅད་བགྲང་ལས་འདས་ཀྱང་། དེའི་རྗེས་སུ་ཐོན་པ་རྣམས་དེ་ལ་ཡང་དགའ་བར་མ་གྱུར་བས། འདི་ཡང་སྟོང་བ་དང་རླུང་གི་རྗེས་སུ་འདེད་པ་ཙམ་ཡིན།