[1] عیسی اُلارا یِنه-ده میثال‍لار بیلِن گورّونگ بِردی:
[2] «آسمانینگ پادیشاهلیغی اُز اُغلی اوچین گِلین طُویینی توتان پادیشاه مِنگزِیَندیر.
[3] اُل طُویا چاغیریلانلارا دِرِّو خابار اِتمِک اوچین خیدماتکَرلِرینی ایبِریَر، اِمّا چاغیریلانلار گِلمِک ایسلِمِیَرلِر.
[4] پادیشاه یِنه باشغا خیدماتکَرلِری ایبِریپ، اُلارا: ”چاغیریلانلارا آیدینگ، اینه، مِن طُوی ساچاغینی تاییارلاپ قُیدوم. سیغیرلاریم، سِمیز مال‍لاریم سُیولدی، هِمّه زات تاییار، طُویا گِلسینلِر“ دییَّر.
[5] اِمّا اُلار اَهمییِت هِم بِرمِیَرلِر، بیری اُز اِکین مِیدانینا گیدیَر، یِنه بیری اُز سُوداسینینگ اوغروندا گِزیَر.
[6] باشغالاری بُلسا اُنونگ خیدماتکَرلِرینی توتوپ آزار بِریَرلِر، اُلاری اُلدوریَرلِر.
[7] شِیلِلیکده، پادیشاه غاضاب دُنونی گِییَر. اُل قُشون یُلّاپ، یانگقی قاتل‍لاری دِربی-داغین اِدیَر، شَهرلِرینی اُدلایار.
[8] «سُنگرا پادیشاه خیدماتکَرلِرینه: ”طُوی ساچاغی تاییار، اِمّا چاغیریلانلار مونگا میناسیپ دَلمیش.
[9] یُل‍لارا بارینگ-دا، کیمی تاپسانگیز، طُویا چاغیرینگ“ دییَّر.
[10] خیدماتکَرلِر یُل‍لارا چیقیپ، یامان دییمَن، یاخشی دییمَن، تاپانلارینینگ بارینی اویشوریَرلِر، طُوی جایی میهمانلاردان دُلیار.
[11] «پادیشاه میهمانلاری گُرمَگه گیرِنده، اُنونگ طُوی گِییمینی گِیمِدیک بیر آداما گُزی دوشیَر.
[12] اُنگا: ”اِی دُست، سِن طُوی گِییمینی گِیمَن، بو یِره نَدیپ گیریپ بیلدینگ؟“ دییّپ سُرایار. شُندا اُل آدامینگ دیلی توتولیار.
[13] سُنگرا پادیشاه خیدماتکَرلِرینه: ”اِل-آیاغینی دانگینگ-دا، اُنی داشاری، قارانگقیلیغا قُینگ، اُل یِرده آغلاما و دیش قیجیرداما بُلار“ دییَّر.
[14] چونکی چاغیریلانلار کَن، اِمّا سایلانانلار آزدیر.»
[15] سُنگرا فَریسی‌لِر گیدیپ، اُنی کِپده توتماق بارادا ماصلاحات اِتدیلِر.
[16] هیرودیسینگ طارافدارلارینینگ بیرنَچه‌سینی اُنونگ یانینا ایبِردیلِر. اُلار عیسادان: «اُستاد! بیز سِنینگ دُغرودیغینگی، خودایینگ یُلونی حاقیقات بیلِن اُورِدیَندیگینگی، هیچ کیمه طارافدارلیق اِتمِیَندیگینگی بیلیَریس، سِبَبی سِن آداملارینگ دِرِجه‌سینه باقمایارسینگ.
[17] هانی، بیزه آیت، سِنینگ فیکرینگچه، ایمپِراطُرا مالییات بِرمِک دُغرومی یا-دا دُغری دَل؟» دییّپ سُرادیلار.
[18] عیسی اُلارینگ نییِتلِرینینگ یاماندیغینی بیلیپ: «مِنی نَمه اوچین ایمتِحان اِدیَرسینگیز، اِی ایکییوزلیلِر؟
[19] مانگا مالییات پولونی گُرکِزینگ» دییدی. اُلار عیسی بیر سِکّه گِتیردیلِر.
[20] عیسی اُلاردان: «بو سِکّه‌دَکی شِکیل بیلِن یازغی کیمینگکی؟» دییّپ سُرادی.
[21] اُلار: «ایمپِراطُرینگقی» دییّپ جُغاپ بِردیلِر. شُندا عیسی اُلارا: «اُندا ایمپِراطُرینگقینی – ایمپِراطُرا، خودایینگقینی خودایا بِرینگ» دییدی.
[22] اُلار مونی اِشیدِنلِرینده، حایران قالدیلار. شِیدیپ، اُلار عیسادان آیریلیپ، اُل یِردِن گیتدیلِر.
[23] اُلومدِن سُنگ دیرِلیشینگ یُقدوغینی آیدیان صادّوقی‌لار عیسانینگ یانینا گِلیپ، اُنگا شِیله سُراق بِردیلِر:
[24] «اُستاد! موسی بیزه شِیله آیدیپدیر: ”اِگِر ایکی دُغانینگ بیری اُلسه، ایزیندا آیالی دول قالیپ، اُلارینگ اُغلانلاری هِم یُق بُلسا، بِیلِکی دُغانی اُنونگ آیالینا اُیلِنیپ، اُلِن دُغانینینگ نِسلینی دُوام اِتدیرسین.“
[25] بیزینگ آرامیزدا یِدی دُغان باردی. بیرینجیسی اُیلِندی-ده اُلدی. نِسلی بُلمانسُنگ، آیالینی دُغانینا بِردیلِر.
[26] ایکینجیسی، اوچونجیسی، تا یِدینجیسینه چِنلی هِمّه‌سینده شُل بیر یاغدای قایتالاندی.
[27] اُلارینگ هِمّه‌سیندِن سُنگ اُل آیال هِم اُلدی.
[28] ایندی قیامات گونی اُلار اُلومدِن دیرِلِنلِرینده، بو آیال اُل یِدی دُغانینگ هایسیسینینگ آیالی بُلار؟ چونکی اُلارینگ هِمّه‌سی-ده اُنی بیلِن اُیلِنیپدی.»
[29] عیسی اُلارا شِیله جُغاپ بِردی: «سیز نه مُقادِّس یازغیلاری، نه-ده خودایینگ قودراتینی بیلیَرسینگیز، شُنونگ اوچین یالنگیشیارسینگیز.
[30] اینسانلار اُلومدِن دیرِلِنده، نه اُیلِنِرلِر، نه-ده نیکاح اِدِرلِر، اُلار آسمانداقی پِریشده‌لِر یالی بُلارلار.
[31] اُلولِرینگ دیرِلیشی باباتدا بُلسا، سیز خودایینگ اُزونگیزه:
[32] ”مِن ابراهیمینگ، اسحاقینگ و یعقوبینگ خوداییدیرین“ دییِنینی اُقیمادینگیزمی؟ اُل اُلولِرینگ دَل-ده، دیریلِرینگ خوداییدیر.»
[33] جِماغات مونی اِشیدیپ، اُنونگ تَعلیماتینا حایران قالدیلار.
[34] فَریسی‌لِر عیسانینگ صادّوقی‌لارا اِدِندیگینی اِشیدِنلِرینده، بیر یِره ییغنانیشدیلار.
[35] اُلاردان بیر دین عالیم عیسانی ایمتِحان اِتمِک اوچین:
[36] «اُستاد، تُورات‌دا اینگ اولی حُکوم نَمه؟» دییّپ سُرادی.
[37] عیسی اُنگا شِیله جُغاپ بِردی: «بیرینجیسی: ”تانگری خودایینگیزی هِمّه یورِگینگیز، هِمّه جان-تِنینگیز و بار دوشونجَنگیز بیلِن سُیونگ.“
[38] شو بیرینجی و اینگ اولی حُکومدیر.
[39] ایکینجیسی-ده: ”هِمسایانگی اُزونگی سُیشونگ یالی سُی!“
[40] هِمّه تُورات بیلِن پیغامبارلارینگ یازغیلاری شو ایکی حُکومَه باغلیدیر.»
[41] فَریسی‌لِر اویشوپ دورقالار، عیسی اُلاردان:
[42] «مسیح بارادا نَمه فیکر اِدیَرسینگیز؟ اُل کیمینگ اُغلی؟» دییّپ سُرادی. اُلار هِم عیسی: «اُل داوودینگ اُغلی» دییّپ جُغاپ بِردیلِر.
[43] عیسی اُلارا شِیله دییدی: «اُندا نَمه اوچین داوودینگ اُزی مُقادِّس روحدان ایلهام آلیپ، مسیحه تانگری دییَر؟ اُل شِیله دییّپدیر:
[44] ”خودای مِنینگ تانگریما شِیله آیتدی: دوشمانلارینگی آیاق آشاغینا سالیانچام، مِنینگ ساغیمدا اُتور.“
[45] اِگِر داوود مسیحه تانگری دییَن بُلسا، اُل نَهیلی داوودینگ اُغلی بُلیار؟»
[46] هیچ کیم عیسی جُغاب بِریپ، بیر سُز هِم آیدیپ بیلمِدی. شُل گوندِن بِیلَک هیچ کیم اُندان یِکِجه زات سُراماغا-دا یورِک اِتمِدی.