[1] شُل واقت عیسانینگ آد-آوازاسی هیرودیس پادیشاهینگ قولاغینا باریپ یِتدی.
[2] اُل اُز ایشچیلِرینه: «بو یحیی تَعمید بِریَنچیدیر. اُل اُلومدِن دیرِلِندیر. اُنونگ بو مُعجِزه‌لِری گُرکِزیپ بیلمِگینینگ سِبَبی هِم شودور» دییدی.
[3] هیرودیس اُز دُغانی فیلیپُسینگ آیالی هیرودیا اُیلِنِندیگی اوچین، یحیانی توتدوریپ، اِل-آیاغینی دانگیب، زیندانا اُقلادیپدی.
[4] سِبَبی یحیی اُنگا: «سِنینگ اُز دُغانینگ آیالینا اُیلِنمِگینگ دُغری دَل» دییّپدی.
[5] هیرودیس یحیانی اُلدورمِک ایسلِیَردی، اِمّا خالقینگ یحیانی نِبی حاساپلاندیغی اوچین بِیله اِتمِکدِن قُرقیاردی.
[6] هیرودیس اُز دُغان گونی خاطیراسینا طُوی توتاندا، هیرودیانینگ قیزی اُرتادا راقص اِدیپ، هیرودیسینگ گُونونی آلدی.
[7] شُندا هیرودیس قیزا قاسام ایچیپ، دیلَن زادینی بِرجِکدیگینه سُز بِردی.
[8] قیز هِم اِنه‌سینینگ اُورِتمِگی بیلِن: «مانگا بیر تاباغینگ ایچینده یحیی تَعمید بِریَنچینینگ کِلّه‌سینی بِر» دییدی.
[9] هیرودیس غامگین بُلدی، اِمّا میهمانلارینگ یانیندا قاسام ایچِنسُنگ، یحیانینگ کِلّه‌سینی اُنگا گِتیریپ بِریلمِگینی دِستور بِردی.
[10] آدام ایبِریپ، زیندانداقی یحیانینگ کِلّه‌سینی کِسدیردی.
[11] اُنونگ کِلّه‌سی بیر تاباقدا گِتیریلیپ، قیزا بِریلدی، اُل هِم مونی اِنه‌سینه اِلتیپ بِردی.
[12] یحیانینگ شَگیرتلِری گِلیپ، اُنونگ جِسِدینی اَکیدیپ جایلادیلار. سُنگرا گیدیپ، مونی عیسی دِرِّو خابار بِردیلِر.
[13] عیسی مونی اِشیدیپ، یِکه اُزی قاییقا میندی-ده، اُل یِردِن بیر بُش یِره گیتدی. جِماغات مونی بیلِنده، شَهرلِردِن چیقیپ، پییادا اُنونگ ایزیندان گیتدیلِر.
[14] اُل قاییقدان دوشِن ماحالی اولی جِماغاتی گُروپ، اُلارا یورِگی آویدی، اُلارینگ مِریضلِرینی شِفا بِردی.
[15] آغشام شَگیرتلِری اُنونگ یانینا گِلیپ: «بو بیر بُش یِر، واقت هِم گیجدیر، جِماغاتی گُیبِر، اُبالارا گیدیپ، اُزلِرینه اییمیت ساتین آلسینلار» دییدیلِر.
[16] عیسی اُلارا: «گیتمِگینگ گِرِگی یُق، اُلارا اییمَگه زادی سیز بِرینگ» دییدی.
[17] شَگیرتلِر هِم عیسی: «بیزینگ بو یِرده بَش چُرِک بیلِن ایکی بالیقدان باشغا زادیمیز یُق آخیرین» دییدیلِر.
[18] عیسی: «اُلاری شو یِره مِنینگ یانیما گِتیرینگ» دییدی.
[19] شُندا عیسی جِماغاتا اُتونگ اوستونده اُتورماغی تابشیردی. بَش چُرِک بیلِن ایکی بالیغی آلیپ، اُل آسمانا باقیپ شوکور اِتدی-ده، چُرِکلِری بُلوشدیریپ، شَگیرتلِرینه بِردی، شَگیرتلِری هِم اُلاری جِماغاتا پایلادیلار.
[20] هِمّه‌لِر اییّپ دُیدولار. آرتان چُرِک بُلِکلِری اُن ایکی سِبِد بُلدی.
[21] موندان اییِنلِرینگ سانی آیال‍لار و چاغالاردان باشغا بَش مونگه قُلای آدامدی.
[22] جِماغاتی اوغرادیپ دورقا، عیسی شَگیرتلِرینه قاییقا مینیپ، اُزوندِن اُنگ بِیلِکی کِنارا گِچمِگی تابشیردی.
[23] جِماغاتی اوغرادانیندان سُنگ، اُنونگ یِکه اُزی دُغا-دیلِگ اِتمِک اوچین داغا چیقدی. آغشام هِم اُل شُل یِرده یِکِدی.
[24] قاییق بُلسا شُل واقت دِریانینگ اُرتاسیندادی، مُوجلِر گِلیپ، اُنگا اورولیاردی، سِبَبی یِل اُلارینگ قارشیسیندان اُسیَردی.
[25] دانگا قُلای عیسی دِریادا سووونگ یوزوندِن یُریپ، اُلارا طاراف گِلدی.
[26] اِمّا شَگیرتلِر اُنونگ سووونگ یوزوندِن یُریپ گِلیَنینی گُرِنلِرینده، تانیمان: «بو بیر گُزومیزه گُرونیَن روحدیر!» دییشیپ، آلدیرادیلار، اُلار قُرقودان یانگا قیغیریشدیلار.
[27] اِمّا عیسی دِرِّو اُلارا آیدیپ: «خاطیرجِم بُلونگ! بو مِن، قُرقمانگ!» دییدی.
[28] پِطرُس اُنگا جُغاپ بِریپ: «اِی آقام، بو سِن بُلسانگ، مانگا دِستور بِر، سووونگ یوزوندِن یُریپ، یانینگا بارایین» دییدی.
[29] عیسی: «گِل!» دییدی. پِطرُس هِم قاییقدان دوشوپ، عیسانینگ یانینا بارجاق بُلوپ، سووونگ یوزوندِن عیسی طارافا یُریمَگه باشلادی.
[30] اِمّا یِلینگ گویجونی گُروپ قُرقدی و غارق بُلوپ باشلاندا: «یا آقام، مِنی نِجات بِر» دییّپ قیغیردی.
[31] عیسی شو واقتا اِلینی اوزادیپ، اُنی توتدی-دا: «اِی آز ایمانلی، نَمه اوچین شِک اِتدینگ؟» دییدی.
[32] اُلارینگ ایکیسی قاییقا مینِن واقتی، یِل یاتدی.
[33] قاییقداقیلار: «سِن، دُغرودان-دا، خودایینگ اُغلوسینگ» دییّپ، اُنگا سِجده اِتدیلِر.
[34] اُلار دِریانینگ بِیلِکی طارافینا گِچیپ، جِنیسارِت یوردونا باردیلار.
[35] اُل یِرینگ آداملاری عیسانی تانیپ، هِر طارافا آدام ایبِریپ، مِریضلِرینگ بارینی اُنونگ یانینا گِتیردیلِر.
[36] اُلار دینگه دُنونینگ اِتِگینَه اِل‍لِرینی دِگیرمَگه اِجازا بِرمِگینی ایسلَپ، اُنگا یالباریاردیلار. اُنگا اِل دِگرِنلِرینگ هِمّه‌سی-ده شِفا تاپیاردی.