[1] شُل واقت شَگیرتلِر عیسانینگ یانینا گِلیپ: «آسمانینگ پادیشاهلیغیندا اینگ بِییک کیم؟» دییّپ سُرادیلار.
[2] عیسی-دا بیر چاغانی چاغیریپ، اُنی اُلارینگ اُرتاسیندا قُیدی-دا، شِیله دییدی:
[3] «سیزه دُغروسینی آیدیارین: اِگِر سیز یُلونگیزدان دُنوپ، چاغالار یالی بُلماسانگیز، آسمانینگ پادیشاهلیغینا آصلا گیریپ بیلمِرسینگیز.
[4] کیم شو چاغا یالی فُروتَن بُلسا، آسمانینگ پادیشاهلیغیندا اینگ بِییک شُلدور.
[5] هِر کیم شونونگ یالی بیر چاغانی مِنینگ آدیمدان قابول اِتسه، مِنی قابول اِتدیگیدیر.
[6] اِمّا هِر کیم مانگا اینانیان بو کیچی چاغالارینگ بیرینینگ گونَه اِتمِگینه سِبَپ بُلسا، اُنونگ اوچین بُینوندان اولی دِگیرمِن داشی آسیپ، دِریانینگ دویبونه زینگیلماغی خاص قاوی بُلار.
[7] اینسانلارینگ گونَه اِتمِگینه سِبَپ بُلیان زاتلار اوچین بو دونیَه‌نینگ حالینا، وای! بِیله زاتلار گِلمِلیدیر، اِمّا بولارینگ گِلمِگینه سِبَپ بُلیان آدامینگ گونونه، وای!
[8] اِلینگ یا آیاغینگ سِنینگ گونَه اِتمِگینگه سِبَپ بُلسا، اُنی چاپیپ اُقلا. سِنینگ ایکی اِلّی، ایکی آیاقلی اِبِدی اُدا زینگیلانینگدان، بیر اِلّی، بیر آیاقلی یاشایشا یِتمِگینگ قاوودیر.
[9] گُزونگ سِنینگ گونَه اِتمِگینگه سِبَپ بُلسا، اُنی سُغروپ زینگ. سانگا یِکه گُزلی بُلوپ یاشایشا گیرمِک، ایکی گُزلی بُلوپ دُوزاخ اُدونا زینگیلانینگدان قاوودیر.
[10] «بو کیچیلِرینگ بیرینی اَسگِرمِزلیک اِتمِکدِن داش دورونگ! مِن سیزه شونی آیدیارین: اُلارینگ آسمانداقی پِریشده‌لِری آسمانداقی آتامینگ یوزونی هِمیشه گُریَرلِر. [
[11] اینسان اُغلی ییتِنلِری نِجات بِرمَگه گِلِندیر.]
[12] «سیز نَهیلی فیکر اِدیَرسینگیز؟ بیر آدامینگ یوز قُینی بُلوپ، اُلارینگ بیری ییتسه، اُل تُغسان دُقوزینی داغلاردا قُیوپ، ییتِنینگ ایزینا گُزلِمَگَه چیقمازمی؟
[13] اُنی تاپیپ بیلَیسه، سیزه دُغروسینی آیدیارین، اُل مونونگ اوچین ییتمِدیک تُغسان دُقوزیسینا بِگِنِندِن هِم خاص کَن بِگِنِر.
[14] شِیلِلیکده، بو کیچیلِرینگ بیریدَه هِلَک بُلماغی آسمانداقی آتانگیزینگ ایسلِگی دَلدیر.
[15] «اِگِر دُغانینگ گونَه اِتسه، بار-دا، اَوَّل ایکی بُلوپ گورلِشیپ، عاییبینی اُنگا آیت. سِنینگ سُزونگه قولاق آسّا، بو دُغانینگی قازاندیغینگدیر.
[16] اِگِر سُزونگه قولاق آسماسا، بیر-ایکی آدامی یانینگا آلیپ بار، آیدیلان هِر بیر سُز ایکی یا اوچ شاهادینگ گووَه‌سی بیلِن تاصدیقلانسین.
[17] اُلارا-دا قولاق آسماق ایسلِمِسه، اُندا کِلیسا آیت. اُنگا-دا قولاق آسماق ایسلِمِسه، قُی، اُل سِنینگ اوچین بیر بیگانه یا-دا مالییات آلیانچی یالی بُلسون.
[18] «سیزه دُغروسینی آیدیارین: یِر یوزونده باغلانزادینگ آسماندا-دا باغلانار. یِر یوزونده آچانزادینگ آسماندا-دا آچیلار.
[19] یِنه سیزه شونی آیدیارین: اِگِر آرانگیزدان ایکی آدام ایسلِندیک زادی دیلِمِک اوچین بیر فیکره گِلسه، آسمانداقی آتام دیلِگلِری بیتیرِر.
[20] مِنینگ آدیم بیلِن ایکی یا-دا اوچ آدام اویشسه، مِن هِم اُلارینگ آراسیندا بُلارین.»
[21] سُنگرا پِطرُس عیسانینگ یانینا گِلیپ، اُندان: «آقام، دُغانیم مانگا قارشی گونَه ایش اِتسه، مِن اُنی نَچه گِزِک باغیشلایین؟ یِدی گِزِکمی؟» دییّپ سُرادی.
[22] عیسی اُنگا: «مِن سانگا یِدی گِزِک دَل، یِتمیش گِزِک یِدی دییَّرین» دییّپ جُغاپ بِردی.
[23] «شُنونگ اوچین هِم آسمانینگ پادیشاهلیغی اُز خیدماتکَرلِری بیلِن حاساپلاشماق ایسلَن بیر پادیشاه مِنگزِیَر.
[24] اُل حاساپلاشماغا باشلاندا، اُنونگ یانینا اُن مونگ قیزیل پول بِرگیسی بُلان بیر خیدماتکَرینی گِتیریَرلِر.
[25] اُل بِرگیسینی بِریپ بیلمَنسُنگ، پادیشاه اُنگا، اُزونی، آیالینی، فِرزِنتلِرینی و هِمّه مال‍لارینی ساتیپ، بِرگیسینی بِرمِگی دِستور بِریَر.
[26] اُل یِره یوزین دوشوپ، پادیشاه: ”صابیر اِت! بارینی بِرِیین“ دییّپ یالباریار.
[27] پادیشاه اُنگا یورِگی آوییار، اُنونگ بِرگیسینی گِچیپ، اُنی بُشادیپ گُیبِریَر.
[28] «یانگقی خیدماتکَر چیقیپ گیدیَر. اُل اُزونه یوز دینار بِرگیسی بُلان بیر هِمکَرینَه ساتاشیار. اُنی توتوپ: ”بِرگینگی بِر“ دییّپ، اُنونگ بُقورداغیندان یاپیشیار.
[29] هِمکَری اُنونگ آیاغینا ییقیلیپ: ”صابیر اِت، بِرگیمی بِرِرین“ دییّپ، اُنگا یالباریار.
[30] اِمّا اُل اِتمِیَر، قایتام، بِرگیسینی بِریَنچَه، اُنی زیندانا سالدیریار.
[31] «باشغا هِمکَرلِری بو واقانی گُروپ، قاتی قینانیارلار. اُلار گیدیپ، بُلان هِمّه زادی پادیشاها دِرِّو خابار بِریَرلِر.
[32] پادیشاه خیدماتکَری چاغیریپ: ”اِی یامان قول! مانگا یالبارانینگ اوچین، مِن سِنینگ بِرگینگ بارینی گِچدیم.
[33] مِنینگ سانگا رِحم اِدیشیم یالی، سِن هِم هِمکَرینگه رِحم اِتمِلی دَلمیدینگ؟“ دییَّر.
[34] پادیشاه غاضابا مینیپ، بِرگیسینی بِریَنچَه، اُنی زیندانا اِذیِت آزار بِریَنلِرینگ اِلینه تابشیریار.
[35] «اِگِر سیزینگ-ده هِر بیرینگیز اُز دُغانینینگ گونَه‌لِرینی یورِکدِن باغیشلاماسانگیز، آسمانداقی آتام-دا سیزه شِیله اِدِر.»