1 መልእኽቲ ዮሓንስ 3
[1] ውሉድ እግዚኣብሔር ተብሂልና ምእንቲ ኽንጽዋዕ እግዚኣብሔር ኣብ ከመይ ዝበለ ፍቕሪ ኸም ዝሃበና እስኪ ርአዩ! ውሉድ እግዚኣብሔርውን ኢና። ዓለም ንእኡ ስለ ዘይፈለጠቶ እያ ንኣናውን ዘይፈለጠትና።
[2] ኣቱም ፍቑራተይ! ሕዚ ውሉድ እግዚኣብሔር ኢና፤ እንታይ ከም እንኸውን ከዓ ገና ኣይተገልጸን። ክርስቶስ እንትግለጽ ግና፤ ከምታ ዘለዋ ኽንርእዮ ኢና እሞ ንእኡ ኸም እንመስል ንፈልጥ ኢና።
[3] ኣብ ክርስቶስ ተስፋ ዝገብር ኲሉ ኸምቲ ንሱ ንጹህ ዝኾነ ንባዕሉ የንጽህ።
[4] ኃጢኣት ዝገብር ኲሉ ሕጊ እግዚኣብሔር ይጥሕስ፤ ኃጢኣት ድማ ምጥሓስ ሕጊ እግዚኣብሔር እዩሞ።
[5] ክርስቶስ ንኃጢኣት ከርኅቕ ኢሉ ኸም ዝተገልጸ ትፈልጡ ኢኹም፤ ኣብኡውን ኃጢኣት የለን።
[6] እቲ ኣብ ክርስቶስ ዝነብር ኲሉ ኃጢኣት ኣይገብርን እዩ። ኃጢኣት ዝገብር ግና ንክርስቶስ ኣይረኣዮን፤ ኣይፈለጦንውን።
[7] ደቀይ! ሓደኳ ኣየስሕትኩም። ከምቲ ክርስቶስ ጻድቕ ዝኾነ እቲ ጽድቂ ዝገብር ከዓ ጻድቕ እዩ።
[8] ካብ መጀመርታ ጀሚሩ ኃጢኣት ዝገብር ዘሎ ዲያብሎስ እዩ እሞ ኃጢኣት ዝገብር ካብ ዲያብሎስ እዩ። ወዲ እግዚኣብሔር ከዓ ግብሪ ዲያብሎስ ምእንቲ ኸፍርስ ኢሉ እዩ ዝተገልጸ።
[9] ካብ እግዚኣብሔር ዝተወልደ ባህርይ እግዚኣብሔር ኣብኡ ስለ ዘሎ ኃጢኣት ኣይገብርን እዩ። ካብ እግዚኣብሔር ስለ ዝተወለደውን ኃጢኣት ክገብር ኣይኽእልን እዩ።
[10] ጽድቂ ዘይገብርን ንኃዉ ዘየፍቅርን ካብ እግዚኣብሔር ኣይኮነን። ደቂ እግዚኣብሔርን ደቂ ዲያብሎስን በዙይ እዮም ዝፍለጡ።
[11] እታ ኻብ መጀመርታ ዝሰማዕኹምዋ መልእኽቲ ንስንሳትና ንፋቐር እትብል እያ።
[12] ከምቲ ኻብ ሰይጣን ወገን ዝነበረ ንኃዉ ኸዓ ዝቐተለ ቃየል ኣይንኹን። ስለ ምንታይከ እዩ ዝቐተሎ? ግብሩ ኽፉእ ግብሪ ኃዉ ግና ሠናይ ስለ ዝነበረ እዩ።
[13] ኣኅዋተይ! ዓለም እንተ ጸልአትኩም ኣይትገረሙ።
[14] ንሕና ነኅዋትና ነፍቅሮም ስለ ዝኾንና ካብ ሞት ናብ ሕይወት ከም ዝተሳገርና ንፈልጥ ኢና። እቲ ኃዉ ዘየፍቅር ግና ኣብ ጽላል ሞት እዩ ዝነብር።
[15] ንኃዉ ዝጸልእ ዂሉ ቐታል ነፍሲ እዩ። ቀታል ነፍሲ ዝኾነ ዂሉ ድማ ናይ ዘለዓለም ሕይወት ከም ዘይብሉ ትፈልጡ ኢኹም።
[16] ክርስቶስ ንሕይወቱ ቤዛና ስለ ዘኅለፈ ንፍቕሪ በዙይ ኢና እንፈልጣ። ንሕናውን ምእንቲ ኣኅዋትና ሕይወትና ቤዛ ኽነኅልፍ ይግብአና እዩ።
[17] ግና ዝኾነ ይኹን ጥሪት እዛ ዓለም እዚኣ ዘለዎ እሞ ኃዉ ተሸጊሩ እንተሎ እናረኣዮ እንተ ዘይራህረሀሉ ከመይ ኢሉ ደኣ ንእግዚኣብሔር አፍቅር እየ ኽብል ይኽእል?
[18] ኣቱም ደቀይ! ብግብርን ብሓቅን እምበር ብቓል ወይ ብልሳን ጥራህ ኣይንፋቐር።
[19] -
[20] ካብ ሓቂ ወገን ምዃንና ኸዓ በዙይ ክንፈልጥ ኢና። ሕሊናና እንተ ወቐሰና ድማ እግዚኣብሔር ካብ ኲሉ ዝዓብን ኲሉ ዝፈልጥን ስለ ዝኾነ ንልብና ኣብ ቕድሚኡ ኽነህድኦ ኢና።
[21] ኣቱም ፍቑራተይ! ልብና እንተ ዘይወቐሰና ግና ኣብ ቅድሚ እግዚኣብሔር ትብዓት ኣለና።
[22] ትእዛዛቱ እንሕሉን ንእኡ ዘሐጉሶ እንገብርን ስለ ዝኾንና ድማ ነቲ እንልምኖ ኹሉ ኻብኡ ኽንቕበል ኢና።
[23] ትእዛዙ ድማ ከምቲ ንሱ ዝኣዘዘና ጌርና ብስም ወዱ ኢየሱስ ክርስቶስ ክንኣምንን ንስንሳትናውን ክንፋቐር እዩ።
[24] እቲ ትእዛዛት እግዚኣብሔር ዝሕሉ እግዚኣብሔር ኣብኡ ይነብር። ንሱውን ኣብ እግዚኣብሔር ይነብር። እግዚኣብሔር ኣባና ኸም ዝነብር ከዓ በቲ ዝሃበና መንፈስ ቅዱስ ኢና እንፈልጥ።