[1] Wa Allah hajja le Muusa wa Haaruun wa gaal :
[2] «Min zurriiyit Laawi, ahsib zurriiyit Gahaat hasab khuchuum buyuuthum wa aayilaathum.
[3] Wa sajjil kulla l-rujaal al-umurhum min 30 le 50 sana le yakhdumu fi kheemat al-ijtimaaʼ.
[4] «Daahu khidmit zurriiyit Gahaat fi kheemat al-ijtimaaʼ. Humman masʼuuliin fi l-bakaan al-mukhaddas marra waahid.
[5] Wa wakit yidooru yisiiru, Haaruun wa awlaadah yifartugu al-sitaar al-yidaarig al-sanduug al-foogah liihaan al-muʼaahada wa yikhattuuh beyah.
[6] Wa yiliffuuh be farwit ijil al-bahar. Wa baʼad da, kulla ke yiliffuuh be gumaach zahri wa yidissu leyah iseeyah al-yichiiluuh beehum.
[7] «Wa l-tarabeeza hana l-khubza al-mukhaddasa, yafurchu foogha gumaach zahri. Wa be foog le l-tarabeeza di, yukhuttu al-sufar wa l-kharaariif wa l-kiisaan wa l-abaariig al-yigaddumuuh fooghum hadiiyat al-charaab. Wa l-khubza al-daayme kula tukuun gaaʼide foog al-tarabeeza di.
[8] Wa yikhattu al-tarabeeza wa kulla l-khumaam al-foogha be gumaach ahmar. Wa baʼad da, yiliffuuha be farwit ijil al-bahar wa yidissu leeha iseeyha al-yichiiluuha beehum.
[9] «Wa yichiilu khita min gumaach zahri wa yikhattu beyah al-faanuus wa tiyeesaat le l-naar al-murassas foogah wa kalaaliibah wa taffaayaatah wa kulla mawaaʼiin al-dihin al-yistaʼmaloohum fi khidmit al-faanuus.
[10] Wa l-faanuus wa kulla muʼiddaatah yiliffuuh be farwit ijil al-bahar wa baʼad da, yukhuttuuh fi l-cheyy al-yanguluuh beyah.
[11] «Wa yikhattu mukhbar al-bakhuur hana l-dahab be gumaach zahri wa yiliffuuh be farwit ijil al-bahar wa baʼad da, yidissu leyah iseeyah al-yichiiluuh beehum.
[12] Wa yichiilu kulla muʼiddaat al-ibaada al-yakhdumu beehum fi l-bakaan al-mukhaddas wa yikhattuuhum be gumaach zahri wa yiliffuuhum be farwit ijil al-bahar wa baʼad da, yukhuttuuhum fi l-cheyy al-yanguluuhum beyah.
[13] «Wa yukhummu al-rumaad min al-madbah wa yafurchu foogah gumaach garadi.
[14] Wa yichiilu kulla l-muʼiddaat al-yakhdumu beehum wa yukhuttuuhum foogah misil khammaamaat al-naar wa l-hadaayid al-yisillu beehum al-laham wa l-feelaat wa l-kiisaan. Wa l-madbah wa kulla muʼiddaatah yiliffuuh be farwit ijil al-bahar wa baʼad da, yidissu leyah iseeyah al-yichiiluuh beehum.
[15] «Wa wakit Haaruun wa awlaadah yikammulu min damdimiin al-bakaan al-mukhaddas wa kulla l-muʼiddaat al-mukhassasiin. Wa wakit yugummu min al-muʼaskar zurriiyit Gahaat yaju yichiilu al-khumaam dool. Laakin ma yilammusu minhum cheyy achaan da yijiib leehum al-moot. Wa da bas al-kallafo beyah zurriiyit Gahaat min kheemat al-ijtimaaʼ.
[16] Wa Aliʼaazar wileed Haaruun raajil al-diin mukallaf be dihin al-faanuus wa l-bakhuur al-muʼattar wa l-hadiiye al-daayme wa dihin al-masahaan. Wa hu indah masʼuuliiye fi kulla kheemat al-ibaada wa fi kulla cheyy al-gaaʼid fi lubbaha wa fi l-bakaan al-mukhaddas wa kulla muʼiddaatah.»
[17] Wa battaan Allah hajja le Muusa wa Haaruun wa gaal :
[18] «Ma tikhallu khuchuum buyuut Gahaat yingatʼu min ust al-Laawiyiin.
[19] Wa khalli Haaruun wa awlaadah yadkhulu wa yikallufu ayyi waahid min zurriiyit Gahaat be khidimtah wa be himlah al-yangulah. Wa be da, humman ma yumuutu wakit yangulu al-muʼiddaat al-mukhaddasiin marra waahid.
[20] Wa ma waajib yadkhulu yichiifu al-muʼiddaat al-mukhaddasiin hatta le mudda gisayre kula achaan da yijiib leehum al-moot.»
[21] Wa Allah hajja le Muusa wa gaal :
[22] «Ahsib zurriiyit Girchuun hasab aayilaathum wa khuchuum buyuuthum.
[23] Wa sajjil kulla l-rujaal al-umurhum min 30 le 50 sana le yugummu wa yakhdumu fi kheemat al-ijtimaaʼ.
[24] «Daahu khidmit khuchuum buyuut Girchuun. Humman yakhdumu wa yangulu.
[25] Yangulu sataayir kheemat al-ibaada wa kheemat al-ijtimaaʼ wa l-khita al-be foog leeha wa l-khita al-min farwit ijil al-bahar wa sitaar hana madkhal kheemat al-ijtimaaʼ.
[26] Wa battaan yangulu sataayir al-fadaay al-muhawwige kheemat al-ibaada wa l-madbah wa l-sitaar hana khachum baab al-fadaay wa l-hubaal wa kulla l-muʼiddaat al-waajib leehum le yisawwu khidmithum.
[27] «Wa be amur min Haaruun wa awlaadah, zurriiyit Girchuun yisawwu kulla khidmithum hana l-nagiliin. Wa humman bas al-yikallufu zurriiyit Girchuun be l-khumaam al-yahfadooh wa l-yanguluuh.
[28] Wa di khidmit khuchuum buyuut Girchuun humman yakhdumu wa yahfado kheemat al-ijtimaaʼ tihit muraakhabat Itamaar wileed Haaruun raajil al-diin.»
[29] Wa battaan Allah gaal le Muusa : «Ahsib zurriiyit Maraari hasab khuchuum buyuuthum wa aayilaathum.
[30] Wa sajjil kulla l-rujaal al-umurhum min 30 le 50 sana le yakhdumu fi kheemat al-ijtimaaʼ.
[31] Daahu kulla khidmithum fi kheemat al-ijtimaaʼ wa l-muʼiddaat al-yahfadoohum wa yanguluuhum. Humman yangulu khachab al-kheema wa maraadiisha wa amadha wa asaasha
[32] wa l-amad al-muhawwigiin beehum al-fadaay wa l-asaas wa l-wutaad wa l-hubaal wa kulla l-muʼiddaat al-waajib leehum le yisawwu khidmithum. Ayyi waahid yinaaduuh be usmah wa yikallufuuh be l-muʼiddaat al-yahfadhum wa l-yangulhum.
[33] Wa di khidmit khuchuum buyuut Maraari fi kheemat al-ijtimaaʼ tihit muraakhabat Itamaar wileed Haaruun raajil al-diin.»
[34] Wa Muusa wa Haaruun wa chuyuukh al-mujtamaʼ hasabo zurriiyit Gahaat hasab khuchuum buyuuthum wa aayilaathum.
[35] Wa sajjalo kulla l-rujaal al-umurhum min 30 le 50 sana al-yagdaro yakhdumu fi kheemat al-ijtimaaʼ.
[36] Wa fi khuchuum al-buyuut dool adad al-rujaal bigi 2 750 raajil.
[37] Wa da adad al-rujaal min khuchuum buyuut Gahaat al-gaaʼidiin yakhdumu fi kheemat al-ijtimaaʼ. Wa khalaas Muusa wa Haaruun hasaboohum hasab kalaam Allah le Muusa.
[38] Wa hasabo zurriiyit Girchuun hasab khuchuum buyuuthum wa aayilaathum.
[39] Wa sajjalo kulla l-rujaal al-umurhum min 30 le 50 sana al-yagdaro yakhdumu fi kheemat al-ijtimaaʼ.
[40] Wa fi khuchuum al-buyuut wa l-aayilaat dool adad al-rujaal bigi 2 630 raajil.
[41] Wa da adad al-rujaal min khuchuum buyuut Girchuun al-gaaʼidiin yakhdumu fi kheemat al-ijtimaaʼ. Wa khalaas Muusa wa Haaruun hasaboohum hasab kalaam Allah.
[42] Wa hasabo zurriiyit Maraari hasab khuchuum buyuuthum wa aayilaathum.
[43] Wa sajjalo kulla l-rujaal al-umurhum min 30 le 50 sana al-yagdaro yakhdumu fi kheemat al-ijtimaaʼ.
[44] Wa fi khuchuum al-buyuut dool adad al-rujaal bigi 3 200.
[45] Wa da adad al-rujaal min khuchuum buyuut Maraari. Wa khalaas Muusa wa Haaruun hasaboohum hasab kalaam Allah le Muusa.
[46] Wa khalaas Muusa wa Haaruun wa chuyuukh Bani Israaʼiil hasabo kulla l-Laawiyiin hasab khuchuum buyuuthum wa aayilaathum.
[47] Wa sajjalo kulla l-rujaal al-umurhum min 30 le 50 sana al-yagdaro yakhdumu fi kheemat al-ijtimaaʼ wa yanguluuha.
[48] Wa l-rujaal dool adadhum be l-jumla bigi 8 580.
[49] Wa hasab amur Allah, Muusa hasabaahum wa anta le ayyi raajil khidimtah wa himlah al-yangulah wa masʼuuliiytah misil Allah amarah beyah.