[1] Wa yoom waahid, Bani Israaʼiil gammo yachku be zaʼal le Allah. Wa wakit hu simiʼ chakwaahum, khidib khadab chadiid wa nazzal fooghum naar wa l-naar di haragat taraf fariighum.
[2] Wa Bani Israaʼiil koorako le Muusa wa hu chahad Allah wa l-naar di maatat.
[3] Wa khalaas, humman sammo al-bakaan da Tabʼiira (maʼanaatah bakaan al-hariige) achaan naar Allah nazalat fooghum wa haragat min al-fariig.
[4] Wa yoom aakhar, al-ajaanib al-gaaʼidiin maʼa Bani Israaʼiil girmo wa dawwaro leehum laham. Wa Bani Israaʼiil zaathum gammo yabku wa yuguulu : «Al-jaham katalna. Nidooru laham naakulu !
[5] Al-yoom aniina alfakkarna al-huut al-gaaʼidiin naakuluuh fi Masir saakit bala gurus wa l-fagguus wa l-chammaam wa l-basal al-akhdar wa l-tuum wa l-basal.
[6] Wa hassaʼ da, niiyitna gafalat min al-akil achaan akil aakhar binchaaf ke ma fiih, illa l-manna di.»
[7] Wa l-manna hi misil al-kussubarra wa tinchaaf misil al-samukh.
[8] Wa Bani Israaʼiil yamchu yukhummuuha wa yarhakooha fi l-murhaaka aw yudugguuha fi l-fundug. Wa yirakkubuuha fi l-buraam wa yisalluluuha kisaar kula. Wa tuʼmitha misil al-kaʼak al-sawwooh be dihin.
[9] Wa be l-leel wakit al-karany yanzil fi l-fariig, al-manna kula tanzil maʼaayah.
[10] Wa Muusa simiʼ kulla khuchuum buyuut Bani Israaʼiil gaaʼidiin yabku, ayyi waahid fi khachum baab kheemtah. Wa Allah khidib khadab chadiid wa achaan da, Muusa kula ziʼil.
[11] Wa gaal le Allah : «Maala sawweet cheyy fasil misil da leyi ana abdak ? Wa maala ma ridiit leyi ? Wa maala tukhutt masʼuuliiyit kulla l-chaʼab da fi raasi ana ?
[12] Kulla l-naas dool, ana bas wilidtuhum walla ? Wa maala taamurni wa tuguul leyi : ‹Ahdinhum fi sadrak misil al-amm tahdin sakhiirha, lahaddi tiwaddiihum fi l-ard al-ana waaʼadt beeha juduudhum.›
[13] Wa min ween ana nalga laham nantiih le kulla l-chaʼab da ? Achaan humman gaaʼidiin yabku wa yuguulu leyi : ‹Antiina laham naakulu !›
[14] Ana wiheedi ma nagdar nichiil masʼuuliiyithum achaan humman tugaal leyi.
[15] Ya Rabb, kan di bas muʼaamalatak leyi, aktulni hassaʼ. Wa kan ana nalga minnak rida, battaan ma nichiif bala misil da.»
[16] Wa Allah radda le Muusa wa gaal : «Jiib leyi 70 raajil min chuyuukh Bani Israaʼiil al-inta taʼarifhum kadar humman chuyuukh wa mukallafiin min Bani Israaʼiil. Chiilhum wa jiibhum giddaam kheemat al-ijtimaaʼ wa hinaak humman yagiifu maʼaak.
[17] Wa fi l-bakaan da, ana nanzil wa nikallim maʼaak wa nichiil min al-ruuh al-gaaʼid foogak wa nukhuttah fooghum. Wa be da, humman yichiilu maʼaak masʼuuliiyit al-chaʼab wa battaan inta ma tichiilha wiheedak.
[18] Wa guul le l-chaʼab : ‹Khassusu nufuusku wa ambaakir taakulu laham achaan Allah simiʼ bakiiku wakit gultu : “Al-jaham katalna nidooru laham naakulu ! Aywa, akheer leena kan gaʼadna fi Masir.” Wa fi chaan da, Allah yantiiku laham wa intu taakuluuh.
[19] Wa l-laham da, ma taakuluuh le muddit yoom aw yoomeen aw khamsa aw achara aw 20 yoom.
[20] Laakin taakuluuh le muddit chahar tamaam lahaddi yamrug leeku min manaakhirku wa yitiir leeku. Wa da achaan abeetu Allah al-gaaʼid fi usutku wa bakeetu giddaamah wa gultu : “Maala maragna min Masir ?”›»
[21] Wa Muusa radda le Allah wa gaal : «Al-chaʼab al-ana gaaʼid fi usuthum adad al-askar 600 000. Wa be da kula, inta gult tantiihum laham yaakulu le muddit chahar kaamil !
[22] Wa laakin kan nadbaho kulla l-khanam wa l-bagar kula yitimmu leehum walla ? Wa kan nakurbu kulla huut al-bahar kula yitimm leehum walla ?»
[23] Wa Allah gaal le Muusa : «Iidi ana Allah gisayre walla ? Wa hassaʼ tichiif kan kalaami yilhaggag leek walla la.»
[24] Wa Muusa marag min al-kheema wa macha khabbaraahum le l-chaʼab be kalaam Allah. Wa lamma al-sabʼiin rujaal min chuyuukh Bani Israaʼiil wa khattaahum hawaale al-kheema.
[25] Wa Allah nazal fi lubb al-sahaabaay wa kallam leyah. Wa chaal min al-ruuh al-gaaʼid foog Muusa wa khattaah foog al-sabʼiin chuyuukh. Wa wakit al-ruuh gaʼad fooghum, tawwaali gammo yitnabbaʼo wa battaan yoom aakhar ma sawwooh.
[26] Wa laakin rujaal itneen, al-waahid usmah Alidaad wa l-aakhar usmah Midaad, humman kula min al-sabʼiin kubaaraat wa ma macho maʼa l-aakhariin le l-kheema. Wa laakin humman kula al-ruuh nazal fooghum wa gammo yitnabbaʼo fi l-fariig.
[27] Wa wileed waahid jara khabbar Muusa wa gaal : «Alidaad wa Midaad gaaʼidiin yitnabbaʼo fi l-fariig.»
[28] Wa Yachuuʼ wileed Nuun musaaʼid Muusa min chabaabah, gaal : «Ya sayyidi Muusa ! Adharhum.»
[29] Wa Muusa gaal leyah : «Inta hasuud leyi walla chunu ? Aywa, khalli Allah yinazzil ruuhah fi kulla l-chaʼab wa yisawwiihum kulluhum anbiya.»
[30] Wa baʼad da, khalaas Muusa wa kulla chuyuukh Bani Israaʼiil gabbalo fi l-fariig.
[31] Wa khalaas, Allah jaab riih min ale l-bahar wa jaabat maʼaaha tuyuur al-salwa wa sabbathum fi l-fariig fi ayyi jiihe lahaddi machi yoom. Munsabbiin fi l-ard wa gaaymiin minha lahaddi duraaʼeen.
[32] Wa Bani Israaʼiil gammo yukhummu al-salwa tuul al-leel wa tuul al-nahaar lahaddi l-yoom al-taani. Wa lammo al-salwa wa l-ligi chiyya kula ligi 25 chuwaal wa charrooha hawaale al-fariig le tijiff.
[33] Wa wakit gaaʼidiin yaakulu al-laham wa lissaaʼ ma kammalo min aklah ke bas, Allah khidib khadab chadiid wa darabaahum be waba chadiid.
[34] Wa sammo al-bakaan da Khibruut Hattaawa (maʼanaatah khubuur al-garam). Achaan da bas al-bakaan al-dafano foogah al-naas al-garmaaniin le akil al-laham.
[35] Wa min Khibruut Hattaawa, Bani Israaʼiil saaro wa macho le Hasiruut wa gaʼado hinaak.