[1] Di hi zurriiyit Haaruun akhu Muusa fi l-wakit al-hajja foogah Allah le Muusa fi jabal Siinaaʼ.
[2] Haaruun indah arbaʼa awlaad. Al-bikir usmah Nadaab wa waraayah Abiihu wa Aliʼaazar wa Itamaar.
[3] Wa dool awlaad Haaruun al-masahoohum wa darrajoohum rujaal diin.
[4] Laakin Nadaab wa Abiihu maato fi saharat Siinaaʼ giddaam Allah. Wa maato achaan humman gaddamo le Allah fi lubb kheemat al-ijtimaaʼ bakhuur fi naar al-hu ma azan beeha. Wa humman maato wa ma khallo iyaal. Wa akhwaanhum Aliʼaazar wa Itamaar kamaan gaaʼidiin yakhdumu khidmit rujaal al-diin tihit muraakhabat abuuhum Haaruun.
[5] Wa Allah hajja le Muusa wa gaal :
[6] «Gaddim naas gabiilat Laawi wa khuttuhum tihit muraakhabat Haaruun raajil al-diin achaan yakhdumu leyah.
[7] Wa yugummu be khidmit al-kheema di wa yaharsu Haaruun wa yahfado kulla l-mujtamaʼ giddaam kheemat al-ijtimaaʼ.
[8] Wa humman yahfado kulla muʼiddaat kheemat al-ijtimaaʼ wa yahfado Bani Israaʼiil kula wa yakhdumu fi kheemat al-ibaada.
[9] Wa anti al-Laawiyiin le Haaruun wa awlaadah achaan yisaaʼuduuhum. Wa humman yabgo misil atiiye al-jaabooha kulla Bani Israaʼiil.
[10] Wa kallif Haaruun wa awlaadah le yahfado khidmit rujaal al-diin di leehum humman bas. Wa ayyi naadum aakhar kan yisawwi nafsah raajil diin, waajib yumuut.»
[11] Wa battaan Allah hajja le Muusa wa gaal :
[12] «Daahu ana chilt al-Laawiyiin min kulla Bani Israaʼiil fi badal kulla awlaad al-bikir min ammahaathum achaan al-Laawiyiin yabgo hineeyi ana.
[13] Wa kulla awlaad al-bikir hineeyi. Achaan min yoom ana katalt kulla awlaad al-bikir hana l-Masriyiin fi balad Masir, ana khassast kulla awlaad al-bikir fi Israaʼiil min al-naas wa min al-bahaayim le yabgo hineeyi ana Allah.»
[14] Wa battaan Allah hajja le Muusa fi saharat Siinaaʼ wa gaal :
[15] «Ahsib al-dukuur min zurriiyit Laawi hasab khuchuum buyuuthum wa aayilaathum min wileed chahar wa foog wa alga adadhum.»
[16] Wa Muusa hasabaahum hasab kalaam Allah al-hu amarah beyah.
[17] Wa daahu iyaal Laawi. Hu jaab Girchuun wa Gahaat wa Maraari.
[18] Wa Girchuun jaab khuchuum buyuut Libni wa Chimʼi.
[19] Wa Gahaat jaab khuchuum buyuut Amraam wa Yishaar wa Habruun wa Uzziyiil.
[20] Wa Maraari jaab khuchuum buyuut Mahli wa Muuchi. Wa dool kulluhum ke khuchuum al-buyuut wa l-aayilaat al-marago min Laawi.
[21] Wa min Girchuun wileed Laawi marago khuchuum buyuut Libni wa Chimʼi. Wa humman bas al-yikawwunu gabiilat Girchuun.
[22] Wa hasabo adad al-dukuur min wileed chahar wa foog wa adadhum bigi 7 500.
[23] Wa khuchuum buyuut hana gabiilat Girchuun yanzulu wara l-kheema min jiihat al-kharib.
[24] Wa cheekh gabiilat Girchuun usmah Aliyaasaf wileed Laayiil.
[25] Wa fi kheemat al-ijtimaaʼ, zurriiyit Girchuun tahfad kheemat al-ibaada wa khitaaha wa sitaar hana madkhal kheemat al-ijtimaaʼ
[26] wa l-sataayir al-muhawwigiin beehum al-fadaay wa sitaar baab al-fadaay al-muhawwige kheemat al-ibaada wa l-madbah wa kulla l-hubaal. Wa gabiilat Girchuun masʼuula min kulla l-khumaam dool.
[27] Wa min Gahaat wileed Laawi marago khuchuum buyuut Amraam wa Yishaar wa Habruun wa Uzziyiil. Wa humman bas al-yikawwunu gabiilat Gahaat.
[28] Wa hasabo adad al-dukuur min wileed chahar wa foog wa adadhum bigi 8 300. Wa humman yahfado muʼiddaat al-bakaan al-mukhaddas.
[29] Wa khuchuum buyuut hana gabiilat Gahaat yanzulu min jiihat al-wati le kheemat al-ibaada.
[30] Wa cheekh gabiilat Gahaat usmah Alisaafan wileed Uzziyiil.
[31] Wa humman masʼuuliin min sanduug muʼaahadat Allah wa l-tarabeeza wa l-faanuus wa l-madaabih wa l-muʼiddaat al-mukhassasiin wa l-sitaar al-yidaarig sanduug muʼaahadat Allah. Wa gabiilat Gahaat masʼuula min kulla l-khumaam dool.
[32] Wa kubaaraat al-Laawiyiin kabiirhum Aliʼaazar wileed Haaruun raajil al-diin. Wa hu masʼuul min al-naas al-yahfado al-bakaan al-mukhaddas.
[33] Wa min Maraari wileed Laawi marago khuchuum buyuut Mahli wa Muuchi. Wa humman bas al-yikawwunu gabiilat Maraari.
[34] Wa hasabo adad al-dukuur min wileed chahar wa foog wa adadhum bigi 6 200.
[35] Wa cheekh gabiilat Maraari usmah Suriyiil wileed Abihaayil. Wa humman yanzulu min jiihat al-munchaakh le kheemat al-ibaada.
[36] Wa humman masʼuuliin min khachab al-kheema wa maraadiis wa amadha wa asaasha wa kulla muʼiddaatha. Wa gabiilat Maraari masʼuula min kulla l-khumaam dool.
[37] Wa battaan induhum masʼuuliiye fi l-muʼiddaat al-muhawwigiin beehum al-fadaay misil al-amad wa l-asaas wa l-wutaad wa l-hubaal.
[38] Wa Muusa wa Haaruun wa awlaadah yanzulu giddaam kheemat al-ijtimaaʼ min jiihaat al-sabaah. Wa humman yahfado Bani Israaʼiil giddaam al-beet al-mukhaddas. Wa ayyi naadum aakhar kan yigarrib le l-beet da waajib yumuut.
[39] Wa hasab kalaam Allah, Muusa wa Haaruun hasabo kulla l-Laawiyiin al-dukuur min wileed chahar wa foog hasab khuchuum buyuuthum. Wa adadhum bigi 22 000.
[40] Wa battaan Allah gaal le Muusa : «Ahsib kulla awlaad al-bikir al-dukuur min Bani Israaʼiil al-umurhum min chahar wa foog wa sajjil asaameehum.
[41] Wa ajʼal al-Laawiyiin leyi ana Allah fi badal kulla awlaad al-bikir min Bani Israaʼiil. Wa ajʼal bahaayim al-Laawiyiin fi badal kulla awlaad al-bikir hana bahaayim Bani Israaʼiil.»
[42] Wa Muusa hasab kulla awlaad al-bikir min Bani Israaʼiil misil Allah amarah beyah.
[43] Wa sajjal asaame kulla awlaad al-bikir al-dukuur al-umurhum min chahar wa foog. Wa adadhum bigi 22 273.
[44] Wa Allah hajja le Muusa wa gaal :
[45] «Ajʼal al-Laawiyiin fi badal kulla awlaad al-bikir min Bani Israaʼiil wa bahaayim al-Laawiyiin fi badal bahaayimhum. Wa l-Laawiyiin yabgo hineeyi ana Allah.
[46] Wa laakin awlaad al-bikir min Bani Israaʼiil adadhum bigi 273 ziyaada min adad al-Laawiyiin. Wa l-naas al-ziyaada dool waajib tafdoohum.
[47] Wa le fadayaanhum, tichiil 5 hajar fudda le ayyi waahid. Wa hasab al-wazin al-rasmi hana l-bakaan al-mukhaddas, ayyi hajar fudda yawzin 12 giraam.
[48] Wa l-fudda al-yafdo beeha al-naas al-ziyaada di, antiiha le Haaruun wa awlaadah.»
[49] Wa Muusa lamma fuddit al-fadayaan hana l-naas al-adadhum ziyaada min adad al-Laawiyiin.
[50] Wa Muusa chaal min awlaad al-bikir hana Bani Israaʼiil 1 365 hajar fudda hasab al-wazin al-rasmi hana l-bakaan al-mukhaddas.
[51] Wa Muusa anta fuddit al-fadayaan di le Haaruun wa awlaadah misil Allah amarah beyah.