[1] Wa Muusa kallam le kubaaraat gabaayil Bani Israaʼiil wa gaal : «Daahu amur Allah al-gaalah.
[2] Kan raajil yisawwi nazir le Allah wa yahlif wa yuguul yitimm haliiftah, waajib al-raajil da ma yafchul min al-nazir wa yitabbig sawa sawa al-kalaam al-hu gaalah.
[3] «Wa kan bitt sabiiye gaaʼide fi beet abuuha wa tisawwi nazir le Allah wa tahlif wa tuguul titimm haliifitha,
[4] kan abuuha simiʼ be nazirha wa haliifitha wa ma gaal cheyy, khalaas nazirha da hi masʼuula minnah wa haliifitha kula hi masʼuula minha.
[5] Wa laakin kan fi nafs al-yoom wakit abuuha simiʼ bas daharha, khalaas hi ma masʼuula min al-nazir wa la min al-haliife wa Allah yakhfir leeha achaan abuuha daharha.
[6] «Wa kan al-bitt di sawwat nazirha wa l-kalaam al-hi halafat beyah wa baʼad da akhadat,
[7] kan raajilha simiʼ wa ma gaal cheyy, khalaas nazirha da hi masʼuula minnah wa haliifitha kula hi masʼuula minha.
[8] Wa laakin kan fi nafs al-yoom wakit raajilha simiʼ bas daharha, khalaas hu yibattil al-nazir wa l-haliife al-sawwathum wa be da, Allah yakhfir leeha.
[9] «Wa kan le l-mara al-armala aw al-mutallaga, kan sawwat nazir aw haliife, hi masʼuula minnah.
[10] «Wa laakin kan al-mara fi beet raajilha bas hi sawwat nazir wa halafat wa gaalat tisawwi cheyy
[11] kan raajilha simiʼ wa ma gaal cheyy wa ma daharha, khalaas nazirha da hi masʼuula minnah wa haliifitha kula hi masʼuula minha.
[12] Wa laakin kan raajilha yibattil kalaamha fi nafs al-yoom wakit hu simiʼ, khalaas hi ma indaha nazir wa la indaha haliife achaan raajilha battalaahum wa Allah yakhfir leeha.
[13] «Wa ayyi nazir aw haliife hana siyaam, raajilha bas yibattilah aw yiʼakkidah.
[14] Wa kan raajilha ma gaal cheyy lahaddi ambaakir, khalaas hu sawwaaha masʼuula min al-nazir aw al-haliife achaan hu ma gaal cheyy fi l-yoom al-awwal wakit hu simiʼ.
[15] Wa laakin kan hu battal al-nazir aw al-haliife di baʼad yoom min hu simiʼ, khalaas hu yichiil masʼuuliiyit al-khata hana martah.»
[16] Wa dool al-gawaaniin al-Allah amar beehum Muusa wa bukhussu al-raajil wa martah aw al-abu wa bittah al-sabiiye wakit hi lissaaʼ gaaʼide maʼaayah fi beetah.