[1] Wa wakit al-malik Araad al-Kanʼaani al-gaaʼid yaskun fi saharat Nagab simiʼ kadar Bani Israaʼiil jaayiin be derib Ataariim, hu laagaahum wa haarabaahum wa karab minhum masaajiin.
[2] Wa baʼad da, Bani Israaʼiil aahado Allah wa gaalo : «Kan dasseet leena al-chaʼab da fi iideenna, aniina kula nidammuru kulla hillaalhum ma nikhallu minhum cheyy.»
[3] Wa Allah khibil kalaamhum wa nasaraahum fi l-Kanʼaaniyiin dool. Wa Bani Israaʼiil dammaro kulla l-Kanʼaaniyiin dool wa hillaalhum ma khallo minhum cheyy. Wa sammo al-bakaan da Hurma (maʼanaatah al-damaar).
[4] Wa Bani Israaʼiil saaro min jabal Hoor wa macho be l-derib al-yufuut be l-bahar al-Ahmar achaan humman yidooru yihawwugu baʼiid min balad Adoom. Wa laakin fi l-derib, humman ma sabaro.
[5] Wa gammo didd al-Rabb wa didd Muusa wa gaalo : «Maala maragtuuna min balad Masir wa jibtuuna le numuutu fi l-sahara di ? Achaan hini ma fi khubza wa la almi wa akilna da, akil ma yanfaʼ. Taar leena khalaas.»
[6] Wa khalaas Allah rassal leehum dabiib amchideegaat wa addo katiir min Bani Israaʼiil wa katalaahum.
[7] Wa Bani Israaʼiil jo le Muusa wa gaalo leyah : «Aniina aznabna wakit gammeena didd Allah wa diddak inta. Hassaʼ da, achhad leena Allah achaan yibaʼʼid minnina al-dabiib da.» Wa Muusa chahad leehum Allah.
[8] Wa Allah gaal le Muusa : «Asnaʼ daabi amchideegaat wa arfaʼah foog fi uud. Wa ayyi naadum al-addaah daabi kan chaafah, battaan ma yumuut.»
[9] Wa khalaas, Muusa sanaʼ daabi hana nahaas wa rafaʼah foog fi uud. Wa wakit daabi yiʼaddi naadum, kan al-naadum da chaaf al-daabi hana l-nahaas da battaan ma yumuut.
[10] Wa Bani Israaʼiil saaro wa nazalo fi Ubuut.
[11] Wa battaan saaro min Ubuut wa nazalo fi Iyy Abaariim fi l-sahara sabaah min balad Muwaab.
[12] Wa min al-bakaan da, saaro wa nazalo fi khachum waadi Zarad.
[13] Wa minnah saaro wa nazalo khaadi le waadi Arnuun wa da l-waadi al-yuchugg al-sahara wa jaayi min turaab al-Amuuriyiin. Wa hu gaaʼid huduud ambeen balad Muwaab wa balad al-Amuuriyiin.
[14] Wa fi chaan da, fi kalaam maktuub fi kitaab al-Huruub hana Allah wa l-kalaam da bukhuss madiinat Waahib fi Suufa be wudyaanha wa waadi Arnuun
[15] wa rujuulah al-yusubbu ale madiinat Aar yabgo huduud Muwaab.
[16] Wa min al-bakaan da, saaro wa nazalo fi hillit Biir. Wa da l-bakaan al-Allah amar Muusa wa gaal leyah : «Limm al-chaʼab wa ana nantiihum almi.»
[17] Wa Bani Israaʼiil khanno be l-khine da : «Atmi, ya biir, wa ya naas, khannu leeha katiir.
[18] Wa l-biir di hafarooha al-kubaaraat wa gaddooha al-hukkaam be isay mulukhum wa isay kheezaraanhum.» Wa min al-sahara, saaro lahaddi Mattaana
[19] wa min Mattaana lahaddi Nahliyiil wa min Nahliyiil lahaddi Baamoot.
[20] Wa min Baamoot saaro lahaddi l-waadi al-fi balad Muwaab wa da ale raas jabal al-Fisga al-minnah tinchaaf kulla l-sahara.
[21] Wa Bani Israaʼiil rassalo naas le Siihuun malik al-Amuuriyiin wa gaalo leyah :
[22] «Nidooru nuchuggu ardak wa ma nitallufu al-ziraaʼa wa la chadar al-inab wa ma nacharbo almi biyaarak. Aniina nichiilu al-derib al-usmah Derib al-Malik lahaddi nagtaʼo ardak.»
[23] Wa laakin al-malik Siihuun aba ma yanti izin le Bani Israaʼiil yuchuggu ardah. Hu lamma deechah wa marag laaga Bani Israaʼiil fi l-sahara. Wa hu ja fi Yahaas wa haarabaahum le Bani Israaʼiil.
[24] Wa laakin Bani Israaʼiil haarabooh wa katalooh be l-seef wa chaalo ardah min waadi Arnuun lahaddi waadi Yabbuukh. Wa laakin wagafo fi l-huduud al-gawiiye hana Bani Ammuun.
[25] Wa Bani Israaʼiil chaalo kulla mudun al-Amuuriyiin wa sakano fooghum. Humman sakano fi Hachbuun wa kulla l-hillaal al-taabʼiin leeha.
[26] Wa Hachbuun hi madiinat Siihuun malik al-Amuuriyiin al-haarab malik Muwaab al-awwal wa chaal minnah kulla ardah lahaddi waadi Arnuun.
[27] Wa be sabab da, al-khannaayiin gaalo : «Taʼaalu le madiinat al-malik Siihuun nabnu Hachbuun wa nigawwuuha.
[28] Achaan min Hachbuun maragat naar wa min hillit Siihuun maragat ambalbaala wa akalat hillit Aar fi balad Muwaab wa siyaad al-bakaan al-aali jamb waadi Arnuun.
[29] Ya khasaaritki, ya balad Muwaab ! Ya chaʼab al-ilaahku Kamuuch, intu addammartu khalaas. Intu jaʼaltu awlaadku matruudiin min malik al-Amuuriyiin wa hasabtu banaatku masjuunaat fi iideen Siihuun.
[30] Wa laakin hassaʼ aniina Bani Israaʼiil taʼʼanna al-Amuuriyiin be l-huraab wa dammarnaahum min Hachbuun lahaddi Diibuun wa kharabnaahum min Nuufah lahaddi Miidba.»
[31] Wa be misil da, Bani Israaʼiil sakano fi balad al-Amuuriyiin.
[32] Wa Muusa rassal naas le yuruukhu madiinat Yaʼziir. Wa Bani Israaʼiil chaalo kulla l-hillaal al-taabʼiin leeha. Wa nahabo al-Amuuriyiin al-saakniin fooghum.
[33] Wa baʼad da, Bani Israaʼiil chaalo derib aakhar wa macho ale Baachaan. Wa Oog malik Baachaan marag laagaahum hu wa kulla chaʼabah le yihaaribhum fi Idraʼi.
[34] Wa Allah gaal le Muusa : «Ma takhaaf minnah, ana nisallimah leek fi iidak, hu wa kulla chaʼabah wa baladah. Wa inta tisawwi foogah misil inta sawweet foog Siihuun malik al-Amuuriyiin al-hakam fi Hachbuun.»
[35] Wa khalaas Bani Israaʼiil annasaro foog Oog malik Baachaan wa katalooh hu wa iyaalah wa kulla chaʼabah lahaddi naadum waahid kula minhum ma faddal. Wa chaalo baladah.