[1] Wa baʼad da, jo khabbaro Yuusuf wa gaalo leyah abuuh mardaan bilheen. Wa khalaas, hu gamma macha leyah maʼa iyaalah al-itneen Manassa wa Afraayim.
[2] Wakit khabbaro Yaakhuub wa gaalo wileedah Yuusuf ja yuzuurah da, hu asar galbah wa gamma gaʼad be heelah.
[3] Wa gaal le Yuusuf : «Zamaan, Allah al-Gaadir baan leyi fi hillit Luuz fi balad Kanʼaan wa baarakaani.
[4] Wa gaal leyi : ‹Daahu ana nisawwiik talda iyaal wa tabgo katiiriin achaan inta tabga jidd hana aayila kabiire. Wa baʼadak, nanti balad Kanʼaan le zurriiytak misil warasa ila l-abad.›
[5] Wa min al-yoom, iyaalak Afraayim wa Manassa, al-wildoohum leek fi Masir gubbaal ana ma naji leek, humman yabgo iyaali. Wa yabgo misil iyaali Raʼuubiin wa Chimʼuun.
[6] Wa laakin iyaal al-wildoohum leek baʼadhum, yabgo iyaalak inta. Wa humman yalgo warasathum min turaab akhwaanhum Afraayim wa Manassa.
[7] «Wa wakit ana mugabbil min Faddaan Araam, ammak Raahiil maatat fi iideeni fi derib balad Kanʼaan gariib le hillit Afraata. Wa fi l-bakaan da, ana dafantaha fi derib hillit Afraata al-binaaduuha al-yoom Beet Laham.»
[8] Wa fi l-bakaan da bas, Yaakhuub chaaf iyaal Yuusuf wa gaal : «Dool yaatumman ?»
[9] Wa Yuusuf gaal leyah : «Dool iyaali, al-Rabb antaahum leyi fi Masir.» Wa Yaakhuub gaal : «Jiibhum leyi gariib achaan nibaarikhum.»
[10] Wa Yaakhuub choofah diʼif min al-kubur ma yagdar yichiif adiil. Wa Yuusuf jaab iyaalah gariib le abuuh wa Yaakhuub gamma hadanaahum wa habbaahum wa gaal le Yuusuf :
[11] «Awwal ana hasabt battaan ke ma nichiif wijhak. Wa khalaas be izin al-Rabb, ana chiftak wa chift iyaalak kula !»
[12] Wa khalaas, Yuusuf rafaʼ iyaalah min rijileen abuuh wa sajad giddaamah.
[13] Wa gamma chaal iyaalah al-itneen. Le Afraayim karabah be iidah al-zeene wa le Manassa karabah be iidah al-isra. Wa Afraayim gaaʼid le Yaakhuub be iidah al-isra wa Manassa gaaʼid leyah be iidah al-zeene. Wa Yuusuf jaabaahum gariib le jidduhum.
[14] Wa Yaakhuub khaalaf iideenah wa khatta iidah al-zeene fi raas Afraayim al-sakhayyar wa khatta iidah al-isra fi raas Manassa al-kabiir. Wa hu sawwa al-cheyy da be raayah.
[15] Wa baarak Yuusuf wa gaal : «Ya Rabb, Ilaah abbahaati Ibraahiim wa Ishaakh al-taabaʼo derbak ! Ya Rabb, inta raaʼiiyi fi kulla muddit hayaati lahaddi l-yoom !
[16] Ya Allah al-najjeetni min kulla cheyy fasil ! Natlub minnak tibaarik al-iyaal dool achaan beehum humman, usmi yagood daayman misil usum abbahaati // Ibraahiim wa Ishaakh. Wa khalli iyaalhum yiziidu wa yabgo katiiriin fi kulla l-ard.»
[17] Wa laakin Yuusuf ma bigi leyah halu wakit chaaf abuuh khatta iidah al-zeene fi raas Afraayim. Wa hu gamma karab iid abuuh le yihawwilha min raas Afraayim wa yukhuttaha fi raas Manassa.
[18] Wa Yuusuf gaal le abuuh : «Ya abuuyi, ma misil da ! Achaan Manassa bas al-bikir ! Khutt iidak al-zeene fi raasah !»
[19] Wa abuuh aba wa gaal : «Ana naʼarfah, ya wileedi, ana naʼarfah. Hu kula yabga kabiir wa iyaalah kula yabgo gabiila kabiire. Wa laakin Afraayim akhuuh al-sakhayyar yabga kabiir minnah wa zurriiytah tabga umma kabiire min ummat Manassa.»
[20] Wa fi l-yoom da, Yaakhuub baarakaahum wa gaal : «Bani Israaʼiil yibaaruku be usumku wa yuguulu ambeenaathum : ‹Allah yibaarikak misil Afraayim wa Manassa !›» Wa be misil da, Yaakhuub gaddam Afraayim fi Manassa.
[21] Wa gaal le Yuusuf : «Gariib ana numuut laakin al-Rabb yukuun maʼaaku wa yigabbilku fi balad abbahaatku.
[22] Wa ana nantiik turaab ziyaada min hana akhwaanak. Nantiik turaab Chakiim al-ana chiltah min al-Amuuriyiin be seefi wa nubbaali.»