[1] Wa khalaas, Ishaakh naada Yaakhuub wa baarakah wa wassaah wa gaal leyah : «Ma taakhud mara min banaat al-Kanʼaaniyiin
[2] laakin gumm amchi Faddaan Araam bakaan Batuwiil abu ammak. Wa aakhud mara min hinaak, min banaat Laabaan akhu ammak.
[3] Wa khalli Allah al-Gaadir yibaarikak wa talda iyaal wa yabgo katiiriin achaan inta tabga jidd hana umam katiiriin.
[4] Wa khalli al-Rabb yantiik inta wa zurriiytak al-maʼaak al-baraka al-antaaha le Ibraahiim. Wa intu tawrusu al-balad al-hu antaaha le Ibraahiim wa inta saakin foogha misil ajnabi.»
[5] Wa khalaas, Ishaakh rassal Yaakhuub wa hu macha Faddaan Araam, bakaan Laabaan wileed Batuwiil al-Araami. Wa Laabaan hu akhu Rifga amm Yaakhuub wa Isuu.
[6] Wa Isuu irif kadar abuuh Ishaakh baarak Yaakhuub wa rassalah macha Faddaan Araam achaan yaakhud mara min hinaak. Wa irif kadar wakit abuuh baarakah, wassaah wa gaal leyah : «Ma taakhud mara min banaat al-Kanʼaaniyiin.»
[7] Wa Yaakhuub simiʼ kalaam ammah wa abuuh wa gamma macha Faddaan Araam.
[8] Wa fi l-bakaan da bas, Isuu irif kadar abuuh Ishaakh ma yidoor banaat al-Kanʼaaniyiin.
[9] Wa khalaas, hu gamma macha le Ismaaʼiil wileed Ibraahiim. Wa akhad bineeytah Mahla akhut Nabayuut. Wa hu akhadaaha min foog le awiinah al-aakhariin.
[10] Wa Yaakhuub gamma min Biir Sabʼa wa maachi le balad Haaraan.
[11] Wa wassal fi bakaan waahid wa dawwar yunuum foogah achaan al-harraay wagaʼat. Wa chaal hajar alwassadah wa naam fi l-bakaan da.
[12] Wa hu riʼi. Wa fi l-ruʼya di hu chaaf tallaaʼa khattooha fi l-ard wa raasha fi l-sama. Wa malaaʼikat Allah yatlaʼo wa yanzulu beeha.
[13] Wa Allah waagif jambah wa gaal leyah : «Ana Allah Ilaah abuuk Ibraahiim wa Ilaah Ishaakh. Al-ard al-inta raagid foogha di, nantiiha leek wa le zurriiytak.
[14] Wa zurriiytak tabga katiire misil turaab al-ard wa tiziid min al-sabaah le l-kharib wa min al-munchaakh le l-wati. Wa kulla gabaayil al-ard yalgo baraka beek inta wa be zurriiytak.
[15] Chiif ! Niʼakkid leek ! Ana zaati gaaʼid maʼaak. Nahfadak fi ayyi bakaan al-tamchi foogah wa nigabbilak fi l-balad di. Ana ma nikhalliik wa lahaddi nitimm kulla l-cheyy al-gultah leek.»
[16] Wa Yaakhuub gamma min noomah wa gaal : «Akiid ! Allah gaaʼid fi l-bakaan da wa ana ma iriftah.»
[17] Wa khoof chadiid dakhal leyah wa gaal : «Al-bakaan da bikhawwif ! Akiid hu da beet al-Rabb ! Wa l-bakaan da baab al-sama !»
[18] Wa be fajur badri, Yaakhuub gamma chaal al-hajar al-hu alwassadah, khazzaah wa sabba foogah dihin achaan yabga alaama yizzakkar beeha al-bakaan da.
[19] Wa samma al-bakaan da Beet Iil (maʼanaatah beet Allah). Wa laakin zamaan, al-hille di usumha Luuz.
[20] Wa baʼad da, Yaakhuub sawwa nazir wa gaal : «Kan al-Rabb gaaʼid maʼaayi wa hafadni fi makhatari al-ana maachi foogah wa antaani akil wa lubaas
[21] wa kan gabbalaani fi beet abuuyi be sihha wa salaama, khalaas Allah hu bas yabga Ilaahi.
[22] Wa l-hajar al-khazzeetah leek, ya Rabbi, yabga beetak. Wa nantiik al-uchur min kulla cheyy al-tantiini.»