[1] Wa baʼad da, Allah naadaah le Ibraahiim le yijarribah wa gaal leyah : «Ya Ibraahiim !» Wa Ibraahiim gaal : «Naʼam.»
[2] Wa l-Rabb gaal leyah : «Gumm, chiil wileedak Ishaakh al-wahiid al-tiriidah bilheen. Waddiih fi balad Muriiya fi raas al-hajar al-niwassifah leek. Wa gaddimah leyi dahiiye muharraga.»
[3] Wa khalaas be fajur badri, Ibraahiim gamma wa chaggag hatab hana l-dahiiye. Hu chaal humaarah wa naaseen min khaddaamiinah wa wileedah Ishaakh. Wa macho ale l-bakaan al-wassafah leyah al-Rabb.
[4] Wa fi l-yoom al-taalit, Ibraahiim rafaʼ raasah wa chaaf min baʼiid al-bakaan da.
[5] Wa khalaas, gaal le khaddaamiinah : «Agoodu hini maʼa l-humaar. Ana wa l-wileed namchu foog hinaak naʼabudu al-Rabb wa nigabbulu leeku.»
[6] Wa Ibraahiim chaal hatab al-dahiiye wa antaah le wileedah Ishaakh yichiilah. Wa hu chaal fi iidah naar wa sakkiin. Wa macho tineenithum sawa.
[7] Khalaas Ishaakh gaal le abuuh : «Ya abuuyi.» Wa abuuh gaal : «Naʼam, ya wileedi.» Wa Ishaakh gaal : «Daahu al-naar wa l-hatab. Wa ween khanamaayit al-dahiiye ?»
[8] Wa Ibraahiim gaal : «Al-Rabb bas yarzukhna be khanamaayit al-dahiiye, ya wileedi.» Wa humman al-itneen macho sawa.
[9] Wa wakit wassalo fi l-bakaan al-wassafah leyah al-Rabb, Ibraahiim bana madbah wa sabba foogah hatab wa rabbat wileedah Ishaakh wa khattaah fi raas al-hatab da.
[10] Wa khalaas, Ibraahiim chaal al-sakkiin fi iidah le yadbah wileedah.
[11] Tawwaali malak Allah naadaah le Ibraahiim min al-sama wa gaal : «Ya Ibraahiim ! Ya Ibraahiim !» Wa Ibraahiim gaal : «Naʼam.»
[12] Wa l-malak gaal leyah : «Ma tukhutt iidak foog al-wileed ! Wa ma tisawwi leyah cheyy ! Achaan hassaʼ da ana naʼarif kadar inta khaayif minni ana al-Rabb. Wa ma abeet leyi wileedak al-wahiid.»
[13] Wa Ibraahiim rafaʼ raasah wa chaaf kabich fi gaʼar chideere wa guruunah chaabkaat fi l-chideere di. Wa chaalah wa gaddamah dahiiye muharraga fi badal wileedah.
[14] Wa samma al-bakaan da Yahwah Yirʼah (maʼanaatah Allah yarzukh). Achaan da bas, lahaddi l-yoom yuguulu : «Fi hajar Allah, al-Rabb yarzukh.»
[15] Wa malak Allah naadaah battaan le Ibraahiim min al-sama
[16] wa gaal leyah : «Daahu kalaam Allah : ‹Achaan inta sawweet misil da ma abeet leyi le wileedak al-wahiid, ana Allah nahlif leek be usmi.
[17] Akiid ana nibaarikak wa nikattir zurriiytak misil nujuum al-sama wa misil ramla hana khachum al-bahar. Wa zurriiytak tichiil ard udwaanha.
[18] Wa beehum humman nibaarik kulla umam al-ard achaan inta taabaʼt kalaami.›»
[19] Wa Ibraahiim gabbal macha ligaahum le khaddaamiinah wa gammo macho sawa fi Biir Sabʼa. Wa Ibraahiim sakan fi Biir Sabʼa.
[20] Wa baʼad da, khabbaro Ibraahiim kadar Milka marit akhuuh Naahuur jaabat leyah awlaad.
[21] Wa humman Uus al-bikir wa akhuuh Buuz wa Khamuwiil abu Araam
[22] wa Kaasad wa Hazu wa Fildaach wa Yidlaaf wa Batuwiil.
[23] Wa Batuwiil wilid Rifga. Wa dool awlaad al-tamaane al-Milka wildathum le Naahuur akhu Ibraahiim.
[24] Wa Naahuur indah iyaal aakhariin kula al-wildathum leyah sirriiytah al-usumha Rawuuma. Wa humman Taabah wa Gaaham wa Taahach wa Maʼaaka.