[1] Wa baʼad da, Allah baan le Ibraahiim gariib le l-chadar al-kubaar hana Mamra. Wa fi l-wakit daak, al-harraay haamiye wa Ibraahiim gaaʼid fi khachum baab kheemtah.
[2] Wakit rafaʼ raasah, chaaf talaata rujaal waagfiin gariib leyah. Wa gamma ajala min baab kheemtah jara laagaahum wa sajad giddaamhum wa gaal leehum :
[3] «Marhab beeku, kan tardo beyi, ma tufuutu. Alfaddalo fi beet abduku.
[4] Khalli nijiib leeku almi achaan tikhassulu rijleeku wa tinjammo fi dull al-chadara di.
[5] Wa nijiib leeku khubza taakulu wa tachbaʼo wa baʼad da kamaan, tamchu. Achaan jiitu leyi ana abduku.» Wa humman raddo leyah : «Tamaam ! Sawwi misil gultah.»
[6] Khalaas, Ibraahiim macha ajala le Saara fi l-kheema wa gaal leeha : «Gummi ajala, chiili 10 kooro hana dagiig al-sameh. Ajjiniih wa sawwi leena khubza.»
[7] Wa baʼad da, Ibraahiim macha ajala fi l-zariibe wa azal ijil rakhas wa samiin wa antaah le abdah achaan yijahhizah leehum ajala.
[8] Wakit al-laham nijid khalaas, Ibraahiim chaal al-laham wa zibde wa laban wa gaddamah le diifaanah. Wa wakit gaaʼidiin yaakulu, Ibraahiim waagif jambuhum fi gaʼar al-chadara.
[9] Wa baʼad da, saʼalooh le Ibraahiim : «Ween martak Saara ?» Wa hu radda leehum wa gaal : «Hi gaaʼide fi l-kheema.»
[10] Wa waahid minhum gaal : «Akiid ana nigabbil leek fi l-sana al-jaaye fi nafs al-wakit wa naji nalga martak Saara wildat leek wileed.» Wa Saara gaaʼide waraayah fi khachum baab al-kheema wa hi gaaʼide tasmaʼ fi kalaamhum.
[11] Wa laakin Ibraahiim bigi chaayib khalaas wa Saara kula bigat ajuuz. Wa hi ma tagdar talda.
[12] Wa min simʼat al-kalaam da, gammat dihkat wa gaalat fi galibha : «Ana bigiit ajuuz wa siidi kula bigi chaayib, hal battaan indi chahwa walla ?»
[13] Wa Allah gaal le Ibraahiim : «Maala Saara dihkat wa gaalat : ‹Ana al-bigiit ajuuz misil ke, battaan nagdar nalda walla ?›
[14] Fi cheyy gaasi leyi ana Allah walla ? Fi l-sana al-jaaye, fi l-wakit al-muhaddad, ana naji wa nalga martak Saara wildat leek wileed.»
[15] Laakin Saara khaalatat wa gaalat : «Ana ma dihikt» achaan hi khaafat. Wa hu gaal : «La ! Inti dihikti !»
[16] Khalaas al-rujaal dool gammo wa wajjaho ale Saduum wa Ibraahiim gamma yiʼaddiihum.
[17] Wa Allah gaal : «Hal nilabbid le Ibraahiim al-cheyy al-nidoor nisawwiih walla ?
[18] Akiid, Ibraahiim yabga jidd hana umma kabiire wa chadiide wa nibaarik kulla umam al-ard be sabab Ibraahiim.
[19] Ana azaltah le yiwassi iyaalah wa zurriiytah le yitaabuʼu derib Allah wa yisawwu al-hagg wa l-adaala. Wa be misil da, ana Allah nihaggig al-cheyy al-gult nisawwiih le Ibraahiim.»
[20] Wa Allah gaal le Ibraahiim : «Al-chakwa al-simiʼtaha fi naas Amuura wa Saduum fasle bilheen wa zunuubhum bigo katiiriin.
[21] Nidalli wa nichiif kan amalhum sawa sawa maʼa l-chakwa al-ana simiʼtaha fooghum. Wa kan al-chakwa ma sahiih kula, naʼarfah.»
[22] Wa itneen min al-rujaal dool gammo wa macho ale Saduum wa Ibraahiim gaaʼid waagif giddaam Allah.
[23] Wa Ibraahiim garrab le Allah wa gaal : «Ya Rabbi, hal tidammir naas al-fasliin maʼa l-saalihiin sawa walla ?
[24] Akuun fi 50 naas saalihiin gaaʼidiin fi Saduum. Hal tidammir al-hille di walla ? Hal ma tisaamihha fi chaan al-naas al-khamsiin al-saalihiin dool walla ?
[25] Abadan ma tagdar tisawwiih, ya Rabb ! Inta ma tidammir al-adiiliin maʼa l-fasliin ! Achaan al-naas al-adiiliin ma misil al-naas al-fasliin ! Hal al-haakim hana kulla l-ard ma yisawwi al-adaala walla ?»
[26] Wa Allah gaal : «Tamaam ! Kan ana ligiit fi Saduum 50 naas saalihiin, nisaamih kulla naas al-hille di fi chaan al-khamsiin dool.»
[27] Wa Ibraahiim radda leyah wa gaal : «Saamihni, ya Rabb, ana min al-turaab wa l-rumaad, gidirt hajjeet leek.
[28] Akuun talga 45 naas saalihiin. Hal tidammir al-hille di achaan al-khamsa naas al-gassaro min al-khamsiin walla ?» Wa Allah gaal : «Ana ma nidammirha hatta kan ligiit foogha 45 naas saalihiin kula.»
[29] Wa Ibraahiim gaal battaan : «Akuun fiiha 40 bas naas saalihiin !» Wa Allah gaal : «Tamaam ! Ma nidammirha hatta kan ligiit foogha 40 naas saalihiin kula.»
[30] Wa Ibraahiim gaal : «Ya Rabb, ma tazʼal kan ana nihajji leek battaan. Akuun fiiha 30 bas naas saalihiin !» Wa Allah gaal : «Ana ma nidammirha hatta kan ligiit foogha 30 naas saalihiin kula.»
[31] Wa laakin Ibraahiim gaal battaan : «Ya Rabb, saamihni. Kalaami bigi leek katiir. Akuun fiiha 20 bas naas saalihiin !» Wa Allah gaal : «Ana ma nidammirha hatta kan ligiit foogha 20 naas saalihiin kula.»
[32] Wa Ibraahiim gaal battaan : «Ya Rabb, ma tazʼal, khalli nihajji leek aakhir marra. Akuun fiiha 10 naas saalihiin !» Wa Allah gaal : «Ana ma nidammirha hatta kan ligiit foogha 10 naas saalihiin kula.»
[33] Wakit Allah kammal kalaamah maʼa Ibraahiim, hu khallaah. Wa Ibraahiim gabbal beetah.