[1] وَ اللّٰهْ حَجَّى لِمُوسَى وَ هَارُونْ وَ قَالْ:
[2] «مِنْ ذُرِّيَّةْ لَاوِي، أَحْسِبْ ذُرِّيَّةْ قَهَاتْ حَسَبْ خُشُومْ بُيُوتْهُمْ وَ عَايِلَاتْهُمْ.
[3] وَ سَجِّلْ كُلَّ الرُّجَالْ الْعُمُرْهُمْ مِنْ 30 لِـ 50 سَنَةْ لِيَخْدُمُوا فِي خَيْمَةْ الْإِجْتِمَاعْ.
[4] «دَاهُو خِدْمَةْ ذُرِّيَّةْ قَهَاتْ فِي خَيْمَةْ الْإِجْتِمَاعْ. هُمَّنْ مَسْؤُولِينْ فِي الْبَكَانْ الْمُقَدَّسْ مَرَّةْ وَاحِدْ.
[5] وَ وَكِتْ يِدَوْرُوا يِسِيرُوا، هَارُونْ وَ أَوْلَادَهْ يِفَرْتُقُوا السِّتَارْ الْيِدَارِقْ الصَّنْدُوقْ الْفَوْقَهْ لِيحَانْ الْمُعَاهَدَةْ وَ يِغَطُّوهْ بَيَّهْ.
[6] وَ يِلِفُّوهْ بِفَرْوَةْ عِجِلْ الْبَحَرْ. وَ بَعَدْ دَا، كُلَّ كَيْ يِلِفُّوهْ بِقُمَاشْ ظَهْرِي وَ يِدِسُّوا لَيَّهْ عِصَيَّهْ الْيِشِيلُوهْ بَيْهُمْ.
[7] «وَ الطَّرَبَيْزَةْ هَنَا الْخُبْزَةْ الْمُقَدَّسَةْ، يَفُرْشُوا فَوْقهَا قُمَاشْ ظَهْرِي. وَ بِفَوْق لِلطَّرَبَيْزَةْ دِي، يُخُطُّوا الصُّفَرْ وَ الْغَرَارِيفْ وَ الْكِيسَانْ وَ الْأَبَارِيقْ الْيِقَدُّمُوهْ فَوْقهُمْ هَدِيَّةْ الشَّرَابْ. وَ الْخُبْزَةْ الدَّايْمَةْ كُلَ تُكُونْ قَاعِدَةْ فَوْق الطَّرَبَيْزَةْ دِي.
[8] وَ يِغَطُّوا الطَّرَبَيْزَةْ وَ كُلَّ الْخُمَامْ الْفَوْقهَا بِقُمَاشْ أَحْمَرْ. وَ بَعَدْ دَا، يِلِفُّوهَا بِفَرْوَةْ عِجِلْ الْبَحَرْ وَ يِدِسُّوا لَيْهَا عِصَيّهَا الْيِشِيلُوهَا بَيْهُمْ.
[9] «وَ يِشِيلُوا غِطَاءْ مِنْ قُمَاشْ ظَهْرِي وَ يِغَطُّوا بَيَّهْ الْفَانُوسْ وَ طِيَيْسَاتْ لِلنَّارْ الْمُرَصَّصْ فَوْقَهْ وَ كَلَالِيبَهْ وَ طَفَّايَاتَهْ وَ كُلَّ مَوَاعِينْ الدِّهِنْ الْيِسْتَعْمَلَوْهُمْ فِي خِدْمَةْ الْفَانُوسْ.
[10] وَ الْفَانُوسْ وَ كُلَّ مُعِدَّاتَهْ يِلِفُّوهْ بِفَرْوَةْ عِجِلْ الْبَحَرْ وَ بَعَدْ دَا، يُخُطُّوهْ فِي الشَّيّءْ الْيَنْقُلُوهْ بَيَّهْ.
[11] «وَ يِغَطُّوا مُخْبَرْ الْبَخُورْ هَنَا الدَّهَبْ بِقُمَاشْ ظَهْرِي وَ يِلِفُّوهْ بِفَرْوَةْ عِجِلْ الْبَحَرْ وَ بَعَدْ دَا، يِدِسُّوا لَيَّهْ عِصَيَّهْ الْيِشِيلُوهْ بَيْهُمْ.
[12] وَ يِشِيلُوا كُلَّ مُعِدَّاتْ الْعِبَادَةْ الْيَخْدُمُوا بَيْهُمْ فِي الْبَكَانْ الْمُقَدَّسْ وَ يِغَطُّوهُمْ بِقُمَاشْ ظَهْرِي وَ يِلِفُّوهُمْ بِفَرْوَةْ عِجِلْ الْبَحَرْ وَ بَعَدْ دَا، يُخُطُّوهُمْ فِي الشَّيّءْ الْيَنْقُلُوهُمْ بَيَّهْ.
[13] «وَ يُخُمُّوا الرُّمَادْ مِنْ الْمَدْبَحْ وَ يَفُرْشُوا فَوْقَهْ قُمَاشْ قَرَضِي.
[14] وَ يِشِيلُوا كُلَّ الْمُعِدَّاتْ الْيَخْدُمُوا بَيْهُمْ وَ يُخُطُّوهُمْ فَوْقَهْ مِثِلْ خَمَّامَاتْ النَّارْ وَ الْحَدَايِدْ الْيِسِلُّوا بَيْهُمْ اللَّحَمْ وَ الْفَيْلَاتْ وَ الْكِيسَانْ. وَ الْمَدْبَحْ وَ كُلَّ مُعِدَّاتَهْ يِلِفُّوهْ بِفَرْوَةْ عِجِلْ الْبَحَرْ وَ بَعَدْ دَا، يِدِسُّوا لَيَّهْ عِصَيَّهْ الْيِشِيلُوهْ بَيْهُمْ.
[15] «وَ وَكِتْ هَارُونْ وَ أَوْلَادَهْ يِكَمُّلُوا مِنْ ضَمْضِمِينْ الْبَكَانْ الْمُقَدَّسْ وَ كُلَّ الْمُعِدَّاتْ الْمُخَصَّصِينْ. وَ وَكِتْ يُقُمُّوا مِنْ الْمُعَسْكَرْ ذُرِّيَّةْ قَهَاتْ يَجُوا يِشِيلُوا الْخُمَامْ دَوْل. لَاكِنْ مَا يِلَمُّسُوا مِنْهُمْ شَيّءْ أَشَانْ دَا يِجِيبْ لَيْهُمْ الْمَوْت. وَ دَا بَسْ الْكَلَّفَوْا بَيَّهْ ذُرِّيَّةْ قَهَاتْ مِنْ خَيْمَةْ الْإِجْتِمَاعْ.
[16] وَ أَلِعَازَرْ وِلَيْد هَارُونْ رَاجِلْ الدِّينْ مُكَلَّفْ بِدِهِنْ الْفَانُوسْ وَ الْبَخُورْ الْمُعَطَّرْ وَ الْهَدِيَّةْ الدَّايْمَةْ وَ دِهِنْ الْمَسَحَانْ. وَ هُو عِنْدَهْ مَسْؤُولِيَّةْ فِي كُلَّ خَيْمَةْ الْعِبَادَةْ وَ فِي كُلَّ شَيّءْ الْقَاعِدْ فِي لُبَّهَا وَ فِي الْبَكَانْ الْمُقَدَّسْ وَ كُلَّ مُعِدَّاتَهْ.»
[17] وَ بَتَّانْ اللّٰهْ حَجَّى لِمُوسَى وَ هَارُونْ وَ قَالْ:
[18] «مَا تِخَلُّوا خُشُومْ بُيُوتْ قَهَاتْ يِنْقَطْعُوا مِنْ أُسْط اللَّاوِيِّينْ.
[19] وَ خَلِّي هَارُونْ وَ أَوْلَادَهْ يَدْخُلُوا وَ يِكَلُّفُوا أَيِّ وَاحِدْ مِنْ ذُرِّيَّةْ قَهَاتْ بِخِدِمْتَهْ وَ بِحِمْلَهْ الْيَنْقُلَهْ. وَ بَيْدَا، هُمَّنْ مَا يُمُوتُوا وَكِتْ يَنْقُلُوا الْمُعِدَّاتْ الْمُقَدَّسِينْ مَرَّةْ وَاحِدْ.
[20] وَ مَا وَاجِبْ يَدْخُلُوا يِشِيفُوا الْمُعِدَّاتْ الْمُقَدَّسِينْ حَتَّى لِمُدَّةْ قِصَيْرَةْ كُلَ أَشَانْ دَا يِجِيبْ لَيْهُمْ الْمَوْت.»
[21] وَ اللّٰهْ حَجَّى لِمُوسَى وَ قَالْ:
[22] «أَحْسِبْ ذُرِّيَّةْ قِرْشُونْ حَسَبْ عَايِلَاتْهُمْ وَ خُشُومْ بُيُوتْهُمْ.
[23] وَ سَجِّلْ كُلَّ الرُّجَالْ الْعُمُرْهُمْ مِنْ 30 لِـ 50 سَنَةْ لِيُقُمُّوا وَ يَخْدُمُوا فِي خَيْمَةْ الْإِجْتِمَاعْ.
[24] «دَاهُو خِدْمَةْ خُشُومْ بُيُوتْ قِرْشُونْ. هُمَّنْ يَخْدُمُوا وَ يَنْقُلُوا.
[25] يَنْقُلُوا سَتَايِرْ خَيْمَةْ الْعِبَادَةْ وَ خَيْمَةْ الْإِجْتِمَاعْ وَ الْغِطَاءْ الْبِفَوْق لَيْهَا وَ الْغِطَاءْ الْمِنْ فَرْوَةْ عِجِلْ الْبَحَرْ وَ سِتَارْ هَنَا مَدَخَلْ خَيْمَةْ الْإِجْتِمَاعْ.
[26] وَ بَتَّانْ يَنْقُلُوا سَتَايِرْ الْفَضَايْ الْمُحَوِّقَةْ خَيْمَةْ الْعِبَادَةْ وَ الْمَدْبَحْ وَ السِّتَارْ هَنَا خَشُمْ بَابْ الْفَضَايْ وَ الْحُبَالْ وَ كُلَّ الْمُعِدَّاتْ الْوَاجِبْ لَيْهُمْ لِيِسَوُّوا خِدْمِتْهُمْ.
[27] «وَ بِأَمُرْ مِنْ هَارُونْ وَ أَوْلَادَهْ، ذُرِّيَّةْ قِرْشُونْ يِسَوُّوا كُلَّ خِدْمِتْهُمْ هَنَا النَّقِلِينْ. وَ هُمَّنْ بَسْ الْيِكَلُّفُوا ذُرِّيَّةْ قِرْشُونْ بِالْخُمَامْ الْيَحْفَضَوْه وَ الْيَنْقُلُوهْ.
[28] وَ دِي خِدْمَةْ خُشُومْ بُيُوتْ قِرْشُونْ هُمَّنْ يَخْدُمُوا وَ يَحْفَضَوْا خَيْمَةْ الْإِجْتِمَاعْ تِحِتْ مُرَاقَبَةْ إِتَمَارْ وِلَيْد هَارُونْ رَاجِلْ الدِّينْ.»
[29] وَ بَتَّانْ اللّٰهْ قَالْ لِمُوسَى: «أَحْسِبْ ذُرِّيَّةْ مَرَارِي حَسَبْ خُشُومْ بُيُوتْهُمْ وَ عَايِلَاتْهُمْ.
[30] وَ سَجِّلْ كُلَّ الرُّجَالْ الْعُمُرْهُمْ مِنْ 30 لِـ 50 سَنَةْ لِيَخْدُمُوا فِي خَيْمَةْ الْإِجْتِمَاعْ.
[31] دَاهُو كُلَّ خِدْمِتْهُمْ فِي خَيْمَةْ الْإِجْتِمَاعْ وَ الْمُعِدَّاتْ الْيَحْفَضَوْهُمْ وَ يَنْقُلُوهُمْ. هُمَّنْ يَنْقُلُوا خَشَبْ الْخَيْمَةْ وَ مَرَادِيسْهَا وَ عَمَدْهَا وَ أَسَاسْهَا
[32] وَ الْعَمَدْ الْمُحَوِّقِينْ بَيْهُمْ الْفَضَايْ وَ الْأَسَاسْ وَ الْوُتَادْ وَ الْحُبَالْ وَ كُلَّ الْمُعِدَّاتْ الْوَاجِبْ لَيْهُمْ لِيِسَوُّوا خِدْمِتْهُمْ. أَيِّ وَاحِدْ يِنَادُوهْ بِأُسْمَهْ وَ يِكَلُّفُوهْ بِالْمُعِدَّاتْ الْيَحْفَضْهُمْ وَ الْيَنْقُلْهُمْ.
[33] وَ دِي خِدْمَةْ خُشُومْ بُيُوتْ مَرَارِي فِي خَيْمَةْ الْإِجْتِمَاعْ تِحِتْ مُرَاقَبَةْ إِتَمَارْ وِلَيْد هَارُونْ رَاجِلْ الدِّينْ.»
[34] وَ مُوسَى وَ هَارُونْ وَ شُيُوخْ الْمُجْتَمَعْ حَسَبَوْا ذُرِّيَّةْ قَهَاتْ حَسَبْ خُشُومْ بُيُوتْهُمْ وَ عَايِلَاتْهُمْ.
[35] وَ سَجَّلَوْا كُلَّ الرُّجَالْ الْعُمُرْهُمْ مِنْ 30 لِـ 50 سَنَةْ الْيَقْدَرَوْا يَخْدُمُوا فِي خَيْمَةْ الْإِجْتِمَاعْ.
[36] وَ فِي خُشُومْ الْبُيُوتْ دَوْل عَدَدْ الرُّجَالْ بِقِي 2 750 رَاجِلْ.
[37] وَ دَا عَدَدْ الرُّجَالْ مِنْ خُشُومْ بُيُوتْ قَهَاتْ الْقَاعِدِينْ يَخْدُمُوا فِي خَيْمَةْ الْإِجْتِمَاعْ. وَ خَلَاصْ مُوسَى وَ هَارُونْ حَسَبَوْهُمْ حَسَبْ كَلَامْ اللّٰهْ لِمُوسَى.
[38] وَ حَسَبَوْا ذُرِّيَّةْ قِرْشُونْ حَسَبْ خُشُومْ بُيُوتْهُمْ وَ عَايِلَاتْهُمْ.
[39] وَ سَجَّلَوْا كُلَّ الرُّجَالْ الْعُمُرْهُمْ مِنْ 30 لِـ 50 سَنَةْ الْيَقْدَرَوْا يَخْدُمُوا فِي خَيْمَةْ الْإِجْتِمَاعْ.
[40] وَ فِي خُشُومْ الْبُيُوتْ وَ الْعَايِلَاتْ دَوْل عَدَدْ الرُّجَالْ بِقِي 2 630 رَاجِلْ.
[41] وَ دَا عَدَدْ الرُّجَالْ مِنْ خُشُومْ بُيُوتْ قِرْشُونْ الْقَاعِدِينْ يَخْدُمُوا فِي خَيْمَةْ الْإِجْتِمَاعْ. وَ خَلَاصْ مُوسَى وَ هَارُونْ حَسَبَوْهُمْ حَسَبْ كَلَامْ اللّٰهْ.
[42] وَ حَسَبَوْا ذُرِّيَّةْ مَرَارِي حَسَبْ خُشُومْ بُيُوتْهُمْ وَ عَايِلَاتْهُمْ.
[43] وَ سَجَّلَوْا كُلَّ الرُّجَالْ الْعُمُرْهُمْ مِنْ 30 لِـ 50 سَنَةْ الْيَقْدَرَوْا يَخْدُمُوا فِي خَيْمَةْ الْإِجْتِمَاعْ.
[44] وَ فِي خُشُومْ الْبُيُوتْ دَوْل عَدَدْ الرُّجَالْ بِقِي 3 200.
[45] وَ دَا عَدَدْ الرُّجَالْ مِنْ خُشُومْ بُيُوتْ مَرَارِي. وَ خَلَاصْ مُوسَى وَ هَارُونْ حَسَبَوْهُمْ حَسَبْ كَلَامْ اللّٰهْ لِمُوسَى.
[46] وَ خَلَاصْ مُوسَى وَ هَارُونْ وَ شُيُوخْ بَنِي إِسْرَائِيلْ حَسَبَوْا كُلَّ اللَّاوِيِّينْ حَسَبْ خُشُومْ بُيُوتْهُمْ وَ عَايِلَاتْهُمْ.
[47] وَ سَجَّلَوْا كُلَّ الرُّجَالْ الْعُمُرْهُمْ مِنْ 30 لِـ 50 سَنَةْ الْيَقْدَرَوْا يَخْدُمُوا فِي خَيْمَةْ الْإِجْتِمَاعْ وَ يَنْقُلُوهَا.
[48] وَ الرُّجَالْ دَوْل عَدَدْهُمْ بِالْجُمْلَةْ بِقِي 8 580.
[49] وَ حَسَبْ أَمُرْ اللّٰهْ، مُوسَى حَسَبَاهُمْ وَ أَنْطَى لِأَيِّ رَاجِلْ خِدِمْتَهْ وَ حِمْلَهْ الْيَنْقُلَهْ وَ مَسْؤُولِيّتَهْ مِثِلْ اللّٰهْ أَمَرَهْ بَيَّهْ.