[1] وَ فِي كَدَادَةْ مُوَابْ فِي خَشُمْ بَحَرْ الْأُرْدُنْ مُقَابِلْ أَرِيحَا، اللّٰهْ كَلَّمْ لِمُوسَى وَ قَالْ:
[2] «آمُرْ بَنِي إِسْرَائِيلْ يَنْطُوا مِنْ وَرَثَتْهُمْ حِلَّالْ لِلَّاوِيِّينْ يَسْكُنُوا فَوْقهُمْ وَ يَنْطُوهُمْ أَرْض هَنَا سَرْحَةْ لِبَهَايِمْهُمْ حَوَالَيْ الْحِلَّالْ دَوْل.
[3] وَ الْحِلَّالْ دَوْل يَبْقَوْا هِنَيْهُمْ حَلَالْهُمْ لِيَسْكُنُوا فَوْقهُمْ وَ أَرْض السَّرْحَةْ الْحَوَالَيْهُمْ لِبَهَايِمْهُمْ وَ خُمَامْهُمْ وَ كُلَّ حَيْوَانَاتْهُمْ.
[4] وَ أَرْض السَّرْحَةْ التَّنْطُوهَا لِلَّاوِيِّينْ تَبْقَى نُصّ كِيلَوْمِتِرْ بَرَّا مِنْ الدُّرْدُرْ هَنَا الْحِلَّةْ فِي كُلِّ جِيهَةْ.
[5] وَ الْأَرْض دِي تُكُونْ مُرَبَّعَةْ. طُولْهَا عَلَيْ جِيهَةْ الصَّبَاحْ كِيلَوْمِتِرْ وَاحِدْ وَ عَلَيْ جِيهَةْ الْوَطِي كِيلَوْمِتِرْ وَاحِدْ وَ عَلَيْ جِيهَةْ الْغَرِبْ كِيلَوْمِتِرْ وَاحِدْ وَ عَلَيْ جِيهَةْ الْمُنْشَاقْ كِيلَوْمِتِرْ وَاحِدْ وَ الْحِلَّةْ كَمَانْ، تَبْقَى أُسُطْ. وَ دِي تَبْقَى أَرْض هَنَا سَرْحَةْ حَوَالَيْ أَيِّ حِلَّةْ التَّنْطُوهَا لَيْهُمْ.
[6] «وَ تَنْطُوا لِلَّاوِيِّينْ سِتَّةْ مُدُنْ هَنَا لُجُوءْ أَشَانْ كَنْ نَادُمْ كَتَلْ نَادُمْ بَلَا رَايْه يَقْدَرْ يَجْرِي يَقْعُدْ فَوْقهُمْ. وَ تِزِيدُوا فِي الْمُدُنْ السِّتَّةْ دَوْل 42 حِلَّالْ آخَرِينْ.
[7] وَ الْحِلَّالْ التَّنْطُوهُمْ لِلَّاوِيِّينْ عَدَدْهُمْ يَبْقَى 48 حِلَّةْ وَ أَيِّ وَاحِدَةْ عِنْدَهَا أَرْض هَنَا سَرْحَةْ حَوَالَيْهَا.
[8] وَ الْحِلَّالْ التِّشِيلُوهُمْ مِنْ بَنِي إِسْرَائِيلْ، شِيلُوهُمْ حَسَبْ الْوَرَثَةْ هَنَا أَيِّ قَبِيلَةْ. مِنْ الْقَبِيلَةْ اللِّقَتْ كَتِيرْ، تِشِيلُوا كَتِيرْ. وَ مِنْ الْقَبِيلَةْ اللِّقَتْ شِيَّةْ، تِشِيلُوا شِيَّةْ. أَيِّ قَبِيلَةْ حَسَبْ وَرَثَتْهَا تَنْطِي حِلَّالْ لِلَّاوِيِّينْ.»
[9] وَ اللّٰهْ حَجَّى لِمُوسَى وَ قَالْ:
[10] «قُولْ لِبَنِي إِسْرَائِيلْ: ‹كَنْ قَطَعْتُوا بَحَرْ الْأُرْدُنْ لِتَدْخُلُوا فِي بَلَدْ كَنْعَانْ،
[11] أَعَزُلُوا لَيْكُو مُدُنْ هَنَا لُجُوءْ أَشَانْ كَنْ نَادُمْ كَتَلْ نَادُمْ بَلَا رَايْه يَقْدَرْ يَجْرِي يَقْعُدْ فَوْقهُمْ.
[12] وَ الْمُدُنْ دَوْل يَبْقَوْا لَيْكُو مُدُنْ هَنَا لُجُوءْ وَ يِنَجُّوا الْكَاتِلْ مِنْ سِيدْ التَّارْ. أَشَانْ الْكَاتِلْ مَا وَاجِبْ يَكْتُلُوهْ قُبَّالْ مَا يَقِيفْ قِدَّامْ مُجْتَمَعْ بَنِي إِسْرَائِيلْ لِيِحَاكُمُوهْ.
[13] وَ الْمُدُنْ السِّتَّةْ دَوْل يَبْقَوْا لَيْكُو مُدُنْ هَنَا لُجُوءْ.
[14] وَ مُدُنْ اللُّجُوءْ دَوْل، تَلَاتَةْ مِنْهُمْ يُكُونُوا صَبَاحْ لِبَحَرْ الْأُرْدُنْ وَ تَلَاتَةْ فِي بَلَدْ كَنْعَانْ.
[15] وَ الْمُدُنْ السِّتَّةْ دَوْل يَبْقَوْا بَكَانْ هَنَا لُجُوءْ لِبَنِي إِسْرَائِيلْ وَ لِلْأَجْنَبِي الْقَاعِدْ مَعَاهُمْ وَ لِلضَّيْف الْخَاطِرْ. أَيِّ وَاحِدْ كَنْ كَتَلْ نَادُمْ بَلَا رَايْه يَقْدَرْ يَجْرِي يَقْعُدْ فِي مَدِينَةْ وَاحِدَةْ مِنْهُمْ.
[16] «‹وَ لَاكِنْ كَنْ نَادُمْ ضَرَبْ نَادُمْ بِسِلَاحْ هَنَا حَدِيدْ وَ كَتَلَهْ، النَّادُمْ دَا بِقِي كَاتِلْ دِمَّةْ وَ فِي شَانْ دَا، وَاجِبْ يَكْتُلُوهْ.
[17] وَ كَنْ نَادُمْ ضَرَبْ نَادُمْ بِحَجَرْ الْيَقْدَرْ يَكْتُلْ وَ كَتَلَهْ، النَّادُمْ دَا بِقِي كَاتِلْ دِمَّةْ وَ فِي شَانْ دَا، وَاجِبْ يَكْتُلُوهْ.
[18] أَوْ كَنْ نَادُمْ ضَرَبْ نَادُمْ بِعُودْ الْيَقْدَرْ يَكْتُلْ وَ كَتَلَهْ، النَّادُمْ دَا بِقِي كَاتِلْ دِمَّةْ وَ فِي شَانْ دَا، وَاجِبْ يَكْتُلُوهْ.
[19] وَ سِيدْ التَّارْ هُو يَكْتُلْ كَاتِلْ الدِّمَّةْ وَ يِشِيلْ فَوْقَهْ التَّارْ كَنْ لَاقَاهْ.
[20] وَ كَنْ نَادُمْ لَزَّ نَادُمْ أَشَانْ هُو عِنْدَهْ مَعَايَهْ مُشْكِلَةْ أَوْ زَرَقَهْ بِنِيّتَهْ بَسْ وَ كَتَلَهْ
[21] أَوْ ضَرَبَهْ بِإِيدَهْ فِي دُوَاسْ وَ كَتَلَهْ، النَّادُمْ الضَّرَبْ دَا يَكْتُلُوهْ أَشَانْ هُو بِقِي كَاتِلْ دِمَّةْ. وَ سِيدْ التَّارْ هُو يَكْتُلْ كَاتِلْ الدِّمَّةْ وَ يِشِيلْ فَوْقَهْ التَّارْ كَنْ لَاقَاهْ.
[22] «‹وَ لَاكِنْ أَكُونْ نَادُمْ كَتَلْ نَادُمْ بَلَا رَايْه. لَزَّاهْ وَ مَا عِنْدَهْ مَعَايَهْ أَيِّ مُشْكِلَةْ أَوْ زَرَقَهْ بِأَيِّ شَيّءْ بَلَا نِيّتَهْ
[23] أَوْ مَا شَافَهْ وَ ضَرَبَهْ بِحَجَرْ الْيَقْدَرْ يَكْتُلْ وَ كَتَلَهْ. وَ وَكِتْ زَرَقْ الْحَجَرْ دَا، هُو مَا عِنْدَهْ مَعَايَهْ عَدَاوَةْ وَ لَا يِدَوْر يِسَوِّي لَيَّهْ شَيّءْ فَسِلْ.
[24] خَلَاصْ، مُجْتَمَعْ بَنِي إِسْرَائِيلْ يَحْكُمُوا بَيْن كَاتِلْ الدِّمَّةْ وَ سِيدْ التَّارْ حَسَبْ الشُّرُوطْ دَوْل.
[25] وَ بَيْدَا، مُجْتَمَعْ بَنِي إِسْرَائِيلْ يِنَجُّوا كَاتِلْ الدِّمَّةْ مِنْ سِيدْ التَّارْ وَ يِقَبُّلُوهْ فِي مَدِينَةْ اللُّجُوءْ الْهُو جَرَى قَعَدْ فَوْقهَا. وَ هُو يَقْعُدْ هِنَاكْ لَحَدِّي مَوْت كَبِيرْ رُجَالْ الدِّينْ الْمَسَحَوْه بِالدِّهِنْ الْمُقَدَّسْ وَ دَرَّجَوْه.
[26] وَ لَاكِنْ كَنْ الْكَاتِلْ مَرَقْ بَرَّا مِنْ حُدُودْ مَدِينَةْ اللُّجُوءْ الْهُو جَرَى وَ قَعَدْ فَوْقهَا
[27] وَ سِيدْ التَّارْ لِقِيهْ بَرَّا مِنْ مَدِينَةْ اللُّجُوءْ وَ كَتَلَهْ، سِيدْ التَّارْ دَا، مَا يَجْعَلَوْه كَاتِلْ دِمَّةْ.
[28] وَاجِبْ لِلْكَاتِلْ يَقْعُدْ فِي مَدِينَةْ اللُّجُوءْ لَحَدِّي مَوْت كَبِيرْ رُجَالْ الدِّينْ. وَ بَعَدْ مَوْت كَبِيرْ رُجَالْ الدِّينْ دَا، الْكَاتِلْ يَقْدَرْ يِقَبِّلْ فِي أَرْض وَرَثَتَهْ.
[29] «‹وَ دَا يَبْقَى لَيْكُو قَانُونْ هَنَا شَرِيعَةْ لِكُلَّ ذُرِّيَّاتْكُو فِي أَيِّ بَكَانْ التَّسْكُنُوا فَوْقَهْ.
[30] «‹فِي كُلَّ وَكِتْ، كَاتِلْ الدِّمَّةْ بِرَايْه مَا يَكْتُلُوهْ إِلَّا بِشَهَادَةْ هَنَا نَاسْ وَاحِدِينْ أَشَانْ بِشَهَادَةْ هَنَا نَادُمْ وَاحِدْ مَا يَقْدَرَوْا يَحْكُمُوا لِنَادُمْ بِالْمَوْت.
[31] مَا تَرْضَوْا لِيَفْدَوْا رُوحْ كَاتِلْ الدِّمَّةْ بِقُرُسْ الْوَاجِبْ لَيَّهْ الْمَوْت. هُو وَاجِبْ يُمُوتْ.
[32] وَ مَا تَرْضَوْا لِيِكَفُّوا قُرُسْ أَشَانْ يِخَلُّوا كَاتِلْ الدِّمَّةْ يَمْرُقْ يُفُوتْ مِنْ مَدِينَةْ اللُّجُوءْ وَ يِقَبِّلْ فِي أَرْضَهْ قُبَّالْ مَوْت رَاجِلْ الدِّينْ.
[33] مَا تِنَجُّسُوا أَرْضُكُو السَّاكْنِينْ فَوْقهَا أَشَانْ دَمّ الْمَكْتُولْ يِنَجِّسْ الْأَرْض وَ مَا تِطَّهَّرْ إِلَّا بِدَمّ هَنَا كَاتِلْ الدِّمَّةْ.
[34] مَا تِنَجُّسُوا الْأَرْض الْإِنْتُو سَاكْنِينْ فَوْقهَا وَ أَنَا ذَاتِي قَاعِدْ فِي أُسُطْهَا. أَشَانْ أَنَا اللّٰهْ سَاكِنْ فِي أُسُطْ بَنِي إِسْرَائِيلْ.›»