[1] وَ اللّٰهْ حَجَّى لِمُوسَى وَ قَالْ:
[2] «شِيلْ لِبَنِي إِسْرَائِيلْ تَارْهُمْ فِي الْمِدْيَانِيِّينْ وَ بَعَدْ دَا، تُمُوتْ وَ تَلْحَقْ أَبَّهَاتَكْ.»
[3] وَ مُوسَى قَالْ لِلشَّعَبْ: «خَلِّي رُجَالْ وَاحِدِينْ مِنْكُو يِشِيلُوا سِلَاحْهُمْ لِيِحَارُبُوا الْمِدْيَانِيِّينْ وَ يِشِيلُوا فِيهُمْ تَارْ بِأُسُمْ اللّٰهْ.
[4] وَ شِيلُوا 1 000 رَاجِلْ مِنْ أَيِّ قَبِيلَةْ مِنْ قَبَايِلْ بَنِي إِسْرَائِيلْ وَ رَسُّلُوهُمْ لِلْحَرِبْ دَا.»
[5] وَ مِنْ آلَافْ بَنِي إِسْرَائِيلْ شَالَوْا مِنْ أَيِّ قَبِيلَةْ 1 000 رَاجِلْ وَ عَدَدْهُمْ بِقِي 12 000 رُجَالْ مُسَلَّحِينْ لِلْحَرِبْ.
[6] وَ مُوسَى شَالْ مِنْ أَيِّ قَبِيلَةْ 1 000 رَاجِلْ وَ رَسَّلَاهُمْ لِلْحَرِبْ. وَ رَاجِلْ الدِّينْ فِينْحَاسْ وِلَيْد أَلِعَازَرْ كُلَ مَشَى مَعَاهُمْ. وَ هُو عِنْدَهْ كُلَّ الْمُعِدَّاتْ الْمُخَصَّصِينْ وَ الْبُرُنْجِي الْيَنْطُوا بَيَّهْ إِشَارَاتْ فِي الْحَرِبْ.
[7] وَ هُمَّنْ مَشَوْا وَ حَارَبَوْا بَلَدْ مِدْيَانْ مِثِلْ اللّٰهْ أَمَرْ بَيَّهْ مُوسَى وَ كَتَلَوْا كُلَّ الرُّجَالْ.
[8] وَ مَعَ الرُّجَالْ دَوْل هُمَّنْ كَتَلَوْا مُلُوكْ مِدْيَانْ الْخَمْسَةْ، أَوِيَا وَ رَاقِمْ وَ صُورْ وَ حُورْ وَ رَابِعْ. وَ بَلْعَامْ وِلَيْد بَعُورْ كُلَ كَتَلَوْه مَعَاهُمْ.
[9] بَنِي إِسْرَائِيلْ كَرَبَوْا عَوِينْ الْمِدْيَانِيِّينْ وَ عِيَالْهُمْ مَسَاجِينْ وَ نَهَبَوْا كُلَّ بَهَايِمْهُمْ وَ خُمَامْهُمْ وَ مَالْهُمْ.
[10] وَ حَرَّقَوْا كُلَّ الْمُدُنْ وَ الْفُرْقَانْ هَنَا الْمِدْيَانِيِّينْ.
[11] وَ هُمَّنْ جَابَوْا مَعَاهُمْ كُلَّ الْغَنِيمَةْ هَنَا الْخُمَامْ النَّهَبَوْه وَ الْبَهَايِمْ وَ الْكَسِيبَةْ هَنَا النَّاسْ الْكَرَبَوْهُمْ.
[12] وَ جَابَوْا الْمَسَاجِينْ وَ الْخُمَامْ النَّهَبَوْه فِي الْحَرِبْ وَ الْغَنِيمَةْ لِمُوسَى وَ لِرَاجِلْ الدِّينْ أَلِعَازَرْ وَ لِمُجْتَمَعْ بَنِي إِسْرَائِيلْ الْقَاعِدِينْ فِي الْفَرِيقْ فِي كَدَادَةْ مُوَابْ فِي خَشُمْ بَحَرْ الْأُرْدُنْ مُقَابِلْ أَرِيحَا.
[13] وَ خَلَاصْ مُوسَى وَ رَاجِلْ الدِّينْ أَلِعَازَرْ وَ كُلَّ شُيُوخْ الْمُجْتَمَعْ مَرَقَوْا لِيِلَاقُوهُمْ بَرَّا مِنْ الْفَرِيقْ.
[14] وَ مُوسَى زِعِلْ فِي قُيَّادْ الدَّيْش وَكِتْ قَبَّلَوْا مِنْ الْحَرِبْ. وَ هُمَّنْ قُيَّادْ الْآلَافْ وَ قُيَّادْ الْمِيَاتْ مِنْ الْعَسْكَرْ.
[15] وَ قَالْ: «مَالَا إِنْتُو خَلَّيْتُوا الْعَوِينْ دَوْل حَيِّينْ؟
[16] دَوْل بَسْ مَا الْعَوِينْ الْأَوَّلْ بَلْعَامْ قَالْ لَيْهُمْ خَلِّي يِلِزُّوا بَنِي إِسْرَائِيلْ يَعَصَوْا اللّٰهْ؟ وَ هِنَّ بَسْ مَا جَابَنْ مُشْكِلَةْ فَعُورْ لَحَدِّي الْوَبَاءْ نَزَلْ فِي شَعَبْ اللّٰهْ؟
[17] وَ هَسَّعْ دَا، أَكْتُلُوا كُلَّ الدُّكُورْ مِنْ الْعِيَالْ وَ كُلِّ مَرَةْ الدَّاخْلَةْ بَيْت.
[18] وَ لَاكِنْ الْبَنَاتْ الْعُدْرِيَّاتْ الْيَوْم وَاحِدْ مَا شَافَنْ رَاجِلْ، مَا تَكْتُلُوهِنْ، خَلُّوهِنْ لَيْكُو.
[19] «وَ كَنْ لَيْكُو إِنْتُو، أَقْعُدُوا بَرَّا مِنْ الْفَرِيقْ لَحَدِّي سَبْعَةْ يَوْم. وَ أَيِّ نَادُمْ مِنْكُو الْكَتَلْ نَادُمْ أَوْ لِمِسْ جَنَازَةْ كُلَ، وَاجِبْ يِطَهِّرْ نَفْسَهْ فِي الْيَوْم التَّالِتْ وَ الْيَوْم السَّابِعْ. أَطَّهَّرَوْا إِنْتُو ذَاتْكُو وَ كُلَّ مَسْجُونَاتْكُو.
[20] طَهُّرُوا كُلَّ شَيّءْ الْمِنْ قُمَاشْ وَ كُلَّ شَيّءْ الْمِنْ فَرْوَةْ وَ كُلَّ شَيّءْ الْمِنْ صُوفْ الْعِنْزَيْ وَ كُلَّ شَيّءْ الْمِنْ حَطَبْ.»
[21] وَ رَاجِلْ الدِّينْ أَلِعَازَرْ قَالْ لِلْعَسْكَرْ الْجَوْا مِنْ الْحَرِبْ: «دَاهُو شُرُوطْ التَّوْرَاةْ الْاللّٰهْ أَمَرْ بَيْهُمْ مُوسَى.
[22] الدَّهَبْ وَ الْفُضَّةْ وَ النَّحَاسْ وَ الْحَدِيدْ وَ التُّوتَى وَ الْحَدِيدْ الْأَزْرَقْ
[23] وَ أَيِّ شَيّءْ الْيَحْمَلْ النَّارْ، دِسُّوهْ فِي النَّارْ لِيَبْقَى طَاهِرْ. وَ بَعَدْ دَا، تِطَهُّرُوهْ بِأَلْمِي التَّطْهِيرْ كُلَ. وَ أَيِّ شَيّءْ الْمَا يَحْمَلْ النَّارْ، دِسُّوهْ فِي أَلْمِي التَّطْهِيرْ دَا.
[24] وَ تِغَسُّلُوا خُلْقَانْكُو فِي الْيَوْم السَّابِعْ وَ خَلَاصْ تَبْقَوْا طَاهِرِينْ. وَ بَعَدْ دَا، تَدْخُلُوا فِي الْفَرِيقْ.»
[25] وَ اللّٰهْ قَالْ لِمُوسَى:
[26] «إِنْتَ وَ رَاجِلْ الدِّينْ أَلِعَازَرْ وَ كُبَارَاتْ الْعَايِلَاتْ هَنَا مُجْتَمَعْ بَنِي إِسْرَائِيلْ أَحْسُبُوا كُلَّ الْغَنِيمَةْ النَّهَبَوْهَا فِي الْحَرِبْ وَ النَّاسْ وَ الْبَهَايِمْ الْكَرَبَوْهُمْ.
[27] وَ قَسِّمْ الْخُمَامْ النَّهَبَوْه دَا أَمْبَيْن الْعَسْكَرْ الْمَشَوْا فِي الْحَرِبْ وَ كُلَّ مُجْتَمَعْ بَنِي إِسْرَائِيلْ.
[28] وَ شِيلْ زَكَاةْ اللّٰهْ مِنْ قِسِمْ هَنَا الْعَسْكَرْ الْمَشَوْا فِي الْحَرِبْ. وَاحِدْ فِي الْخُمْسُمِيَةْ مِنْ النَّاسْ وَ وَاحِدْ فِي الْخُمْسُمِيَةْ مِنْ الْبَقَرْ وَ الْحَمِيرْ وَ الْغَنَمْ.
[29] وَ شِيلْ الزَّكَاةْ دِي مِنْ قِسِمْ الْعَسْكَرْ وَ أَنْطِيهَا لِرَاجِلْ الدِّينْ أَلِعَازَرْ هَدِيَّةْ لِلّٰهْ.
[30] وَ مِنْ قِسِمْ شَعَبْ بَنِي إِسْرَائِيلْ كَمَانْ، شِيلْ وَاحِدْ فِي الْخَمْسِينْ مِنْ النَّاسْ وَ الْبَقَرْ وَ الْحَمِيرْ وَ الْغَنَمْ وَ كُلَّ الْبَهَايِمْ. وَ أَنْطِيهْ لِلَّاوِيِّينْ الْقَاعِدِينْ يَحْفَضَوْا خَيْمَةْ اللّٰهْ.»
[31] وَ مُوسَى وَ رَاجِلْ الدِّينْ أَلِعَازَرْ سَوَّوْا كُلَّ شَيّءْ مِثِلْ اللّٰهْ أَمَرْ بَيَّهْ مُوسَى.
[32] وَ مِنْ الْكَسِيبَةْ وَ الْغَنِيمَةْ النَّهَبَوْهَا الْعَسْكَرْ فَضَّلْ 675 000 غَنَمْ
[33] وَ 72 000 بَقَرْ
[34] وَ 61 000 حَمِيرْ.
[35] وَ الْبَنَاتْ الْعُدْرِيَّاتْ الْيَوْم وَاحِدْ مَا شَافَنْ رَاجِلْ كَمَانْ عَدَدْهِنْ 32 000.
[36] وَ الْقِسِمْ الْأَنْطَوْه لِلْعَسْكَرْ الْمَشَوْا فِي الْحَرِبْ، هُو 337 500 غَنَمْ
[37] وَ مِنْهُمْ 675 غَنَمْ زَكَاةْ لِلّٰهْ.
[38] وَ الْبَقَرْ عَدَدْهُمْ 36 000 وَ مِنْهُمْ 72 دَوْل زَكَاةْ لِلّٰهْ.
[39] وَ الْحَمِيرْ كَمَانْ عَدَدْهُمْ 30 500 وَ مِنْهُمْ 61 دَوْل زَكَاةْ لِلّٰهْ.
[40] وَ الْبَنَاتْ الْعُدْرِيَّاتْ عَدَدْهِنْ 16 000 وَ مِنْهِنْ 32 دَوْل زَكَاةْ لِلّٰهْ.
[41] وَ مُوسَى أَنْطَى الزَّكَاةْ الْيِقَدُّمُوهَا هَدِيَّةْ لِلّٰهْ لِرَاجِلْ الدِّينْ أَلِعَازَرْ وَ دَا مِثِلْ اللّٰهْ أَمَرَهْ بَيَّهْ.
[42] وَ كَنْ لِقِسِمْ مُجْتَمَعْ بَنِي إِسْرَائِيلْ الْمُوسَى شَالَهْ مِنْ الْعَسْكَرْ الْمَشَوْا فِي الْحَرِبْ دَا،
[43] دَاهُو قِسِمْ بَنِي إِسْرَائِيلْ وَ كُلَّ كَيْ عِنْدَهْ 337 500 غَنَمْ
[44] وَ 36 000 بَقَرْ
[45] وَ 30 500 حَمِيرْ
[46] وَ 16 000 بَنَاتْ عُدْرِيَّاتْ.
[47] وَ مِنْ قِسِمْ بَنِي إِسْرَائِيلْ، مُوسَى شَالْ وَاحِدْ فِي الْخَمْسِينْ مِنْ النَّاسْ وَ الْبَهَايِمْ وَ أَنْطَاهْ لِلَّاوِيِّينْ الْقَاعِدِينْ يَحْفَضَوْا خَيْمَةْ اللّٰهْ. وَ دَا مِثِلْ اللّٰهْ أَمَرْ بَيَّهْ مُوسَى.
[48] وَ قُيَّادْ الدَّيْش الْمَشَوْا فِي الْحَرِبْ جَوْا لِمُوسَى وَ هُمَّنْ قُيَّادْ الْآلَافْ وَ قُيَّادْ الْمِيَاتْ مِنْ الْعَسْكَرْ.
[49] وَ قَالَوْا لَيَّهْ: «أَنِحْنَ عَبِيدَكْ حَسَبْنَا عَسْكَرْنَا وَ نَادُمْ وَاحِدْ كُلَ مِنِّنَا مَا فَقَدْنَاهْ.
[50] وَ أَشَانْ دَا، أَيِّ وَاحِدْ مِنِّنَا يِقَدِّمْ هَدِيَّةْ لِلّٰهْ مِنْ الْأَشْيَاءْ هَنَا الدَّهَبْ اللِّقِينَاهُمْ مِثِلْ السَّلَاسِلْ وَ السُّورَيْ وَ الْخَتَمْ وَ الْخُرُوس وَ الْحَفَايِضْ لِيَبْقَوْا لَيْنَا كَفَّارَةْ قِدَّامْ اللّٰهْ.»
[51] وَ مُوسَى وَ رَاجِلْ الدِّينْ أَلِعَازَرْ شَالَوْا مِنْهُمْ الْأَشْيَاءْ هَنَا الدَّهَبْ الْمَدْقُوقْ.
[52] وَ كُلَّ الدَّهَبْ الْجَابَوْه قُيَّادْ الْآلَافْ وَ قُيَّادْ الْمِيَاتْ هَدِيَّةْ لِلّٰهْ دَا، عَدَدَهْ 193 كِيلَوْ.
[53] وَ الْعَسْكَرْ كَمَانْ أَيِّ وَاحِدْ كَرَبْ الْخُمَامْ النَّهَبَهْ لِنَفْسَهْ.
[54] وَ مُوسَى وَ رَاجِلْ الدِّينْ أَلِعَازَرْ لِقَوْا الدَّهَبْ مِنْ قُيَّادْ الْآلَافْ وَ قُيَّادْ الْمِيَاتْ وَ وَدَّوْه فِي خَيْمَةْ الْإِجْتِمَاعْ وَ بَيْدَا، اللّٰهْ يِفَكِّرْ فِي بَنِي إِسْرَائِيلْ.