[1] وَ يَوْم وَاحِدْ، بَنِي إِسْرَائِيلْ قَمَّوْا يَشْكُوا بِزَعَلْ لِلّٰهْ. وَ وَكِتْ هُو سِمِعْ شَكْوَاهُمْ، غِضِبْ غَضَبْ شَدِيدْ وَ نَزَّلْ فَوْقهُمْ نَارْ وَ النَّارْ دِي حَرَقَتْ طَرَفْ فَرِيقْهُمْ.
[2] وَ بَنِي إِسْرَائِيلْ كَوْرَكَوْا لِمُوسَى وَ هُو شَحَدْ اللّٰهْ وَ النَّارْ دِي مَاتَتْ.
[3] وَ خَلَاصْ، هُمَّنْ سَمَّوْا الْبَكَانْ دَا تَبْعِيرَةْ (مَعَنَاتَهْ بَكَانْ الْحَرِيقَةْ) أَشَانْ نَارْ اللّٰهْ نَزَلَتْ فَوْقهُمْ وَ حَرَقَتْ مِنْ الْفَرِيقْ.
[4] وَ يَوْم آخَرْ، الْأَجَانِبْ الْقَاعِدِينْ مَعَ بَنِي إِسْرَائِيلْ قِرْمَوْا وَ دَوَّرَوْا لَيْهُمْ لَحَمْ. وَ بَنِي إِسْرَائِيلْ ذَاتْهُمْ قَمَّوْا يَبْكُوا وَ يُقُولُوا: «الْجَحَمْ كَتَلْنَا. نِدَوْرُوا لَحَمْ نَاكُلُوا!
[5] الْيَوْم أَنِحْنَ أَلْفَكَّرْنَا الْحُوتْ الْقَاعِدِينْ نَاكُلُوهْ فِي مَصِرْ سَاكِتْ بَلَا قُرُسْ وَ الْفَقُّوسْ وَ الشَّمَّامْ وَ الْبَصَلْ الْأَخْضَرْ وَ التُّومْ وَ الْبَصَلْ.
[6] وَ هَسَّعْ دَا، نِيِّتْنَا قَفَلَتْ مِنْ الْأَكِلْ أَشَانْ أَكِلْ آخَرْ بِنْشَافْ كَيْ مَا فِيهْ، إِلَّا الْمَنَّةْ دِي.»
[7] وَ الْمَنَّةْ هِي مِثِلْ الْكُسُّبَرَّةْ وَ تِنْشَافْ مِثِلْ الصَّمُغْ.
[8] وَ بَنِي إِسْرَائِيلْ يَمْشُوا يُخُمُّوهَا وَ يَرْحَكَوْهَا فِي الْمُرْحَاكَةْ أَوْ يُدُقُّوهَا فِي الْفُنْدُقْ. وَ يِرَكُّبُوهَا فِي الْبُرَامْ وَ يِسَلُّلُوهَا كِسَارْ كُلَ. وَ طُعْمِتْهَا مِثِلْ الْكَعَكْ السَّوَّوْه بِدِهِنْ.
[9] وَ بِاللَّيْل وَكِتْ الْكَرَنْج يَنْزِلْ فِي الْفَرِيقْ، الْمَنَّةْ كُلَ تَنْزِلْ مَعَايَهْ.
[10] وَ مُوسَى سِمِعْ كُلَّ خُشُومْ بُيُوتْ بَنِي إِسْرَائِيلْ قَاعِدِينْ يَبْكُوا، أَيِّ وَاحِدْ فِي خَشُمْ بَابْ خَيْمِتَهْ. وَ اللّٰهْ غِضِبْ غَضَبْ شَدِيدْ وَ أَشَانْ دَا، مُوسَى كُلَ زِعِلْ.
[11] وَ قَالْ لِلّٰهْ: «مَالَا سَوَّيْت شَيّءْ فَسِلْ مِثِلْ دَا لَيِّ أَنَا عَبْدَكْ؟ وَ مَالَا مَا رِضِيتْ لَيِّ؟ وَ مَالَا تُخُطّ مَسْؤُولِيَّةْ كُلَّ الشَّعَبْ دَا فِي رَاسِي أَنَا؟
[12] كُلَّ النَّاسْ دَوْل، أَنَا بَسْ وِلِدْتُهُمْ وَلَّا؟ وَ مَالَا تَامُرْنِي وَ تُقُولْ لَيِّ: ‹أَحْضِنْهُمْ فِي صَدْرَكْ مِثِلْ الْأَمّ تَحْضِنْ صَغِيرْهَا، لَحَدِّي تِوَدِّيهُمْ فِي الْأَرْض الْأَنَا وَاعَدْت بَيْهَا جُدُودْهُمْ.›
[13] وَ مِنْ وَيْن أَنَا نَلْقَى لَحَمْ نَنْطِيهْ لِكُلَّ الشَّعَبْ دَا؟ أَشَانْ هُمَّنْ قَاعِدِينْ يَبْكُوا وَ يُقُولُوا لَيِّ: ‹أَنْطِينَا لَحَمْ نَاكُلُوا!›
[14] أَنَا وِحَيْدِي مَا نَقْدَرْ نِشِيلْ مَسْؤُولِيِّتْهُمْ أَشَانْ هُمَّنْ تُقَالْ لَيِّ.
[15] يَا رَبّ، كَنْ دِي بَسْ مُعَامَلَتَكْ لَيِّ، أَكْتُلْنِي هَسَّعْ. وَ كَنْ أَنَا نَلْقَى مِنَّكْ رِضَى، بَتَّانْ مَا نِشِيفْ بَلَاءْ مِثِلْ دَا.»
[16] وَ اللّٰهْ رَدَّ لِمُوسَى وَ قَالْ: «جِيبْ لَيِّ 70 رَاجِلْ مِنْ شُيُوخْ بَنِي إِسْرَائِيلْ الْإِنْتَ تَعَرِفْهُمْ كَدَرْ هُمَّنْ شُيُوخْ وَ مُكَلَّفِينْ مِنْ بَنِي إِسْرَائِيلْ. شِيلْهُمْ وَ جِيبْهُمْ قِدَّامْ خَيْمَةْ الْإِجْتِمَاعْ وَ هِنَاكْ هُمَّنْ يَقِيفُوا مَعَاكْ.
[17] وَ فِي الْبَكَانْ دَا، أَنَا نَنْزِلْ وَ نِكَلِّمْ مَعَاكْ وَ نِشِيلْ مِنْ الرُّوحْ الْقَاعِدْ فَوْقَكْ وَ نُخُطَّهْ فَوْقهُمْ. وَ بَيْدَا، هُمَّنْ يِشِيلُوا مَعَاكْ مَسْؤُولِيَّةْ الشَّعَبْ وَ بَتَّانْ إِنْتَ مَا تِشِيلْهَا وِحَيْدَكْ.
[18] وَ قُولْ لِلشَّعَبْ: ‹خَصُّصُوا نُفُوسْكُو وَ أَمْبَاكِرْ تَاكُلُوا لَحَمْ أَشَانْ اللّٰهْ سِمِعْ بَكِيكُو وَكِتْ قُلْتُوا: ”الْجَحَمْ كَتَلْنَا نِدَوْرُوا لَحَمْ نَاكُلُوا! أَيْوَى، أَخَيْر لَيْنَا كَنْ قَعَدْنَا فِي مَصِرْ.“ وَ فِي شَانْ دَا، اللّٰهْ يَنْطِيكُو لَحَمْ وَ إِنْتُو تَاكُلُوهْ.
[19] وَ اللَّحَمْ دَا، مَا تَاكُلُوهْ لِمُدَّةْ يَوْم أَوْ يَوْمَيْن أَوْ خَمْسَةْ أَوْ عَشَرَةْ أَوْ 20 يَوْم.
[20] لَاكِنْ تَاكُلُوهْ لِمُدَّةْ شَهَرْ تَمَامْ لَحَدِّي يَمْرُقْ لَيْكُو مِنْ مَنَاخِرْكُو وَ يِطِيرْ لَيْكُو. وَ دَا أَشَانْ أَبَيْتُوا اللّٰهْ الْقَاعِدْ فِي أُسُطْكُو وَ بَكَيْتُوا قِدَّامَهْ وَ قُلْتُوا: ”مَالَا مَرَقْنَا مِنْ مَصِرْ؟“›»
[21] وَ مُوسَى رَدَّ لِلّٰهْ وَ قَالْ: «الشَّعَبْ الْأَنَا قَاعِدْ فِي أُسُطْهُمْ عَدَدْ الْعَسْكَرْ 600 000. وَ بَيْدَا كُلَ، إِنْتَ قُلْت تَنْطِيهُمْ لَحَمْ يَاكُلُوا لِمُدَّةْ شَهَرْ كَامِلْ!
[22] وَ لَاكِنْ كَنْ نَدْبَحَوْا كُلَّ الْغَنَمْ وَ الْبَقَرْ كُلَ يِتِمُّوا لَيْهُمْ وَلَّا؟ وَ كَنْ نَكُرْبُوا كُلَّ حُوتْ الْبَحَرْ كُلَ يِتِمّ لَيْهُمْ وَلَّا؟»
[23] وَ اللّٰهْ قَالْ لِمُوسَى: «إِيدِي أَنَا اللّٰهْ قِصَيْرَةْ وَلَّا؟ وَ هَسَّعْ تِشِيفْ كَنْ كَلَامِي يِلْحَقَّقْ لَيْك وَلَّا لَا.»
[24] وَ مُوسَى مَرَقْ مِنْ الْخَيْمَةْ وَ مَشَى خَبَّرَاهُمْ لِلشَّعَبْ بِكَلَامْ اللّٰهْ. وَ لَمَّ السَّبْعِينْ رُجَالْ مِنْ شُيُوخْ بَنِي إِسْرَائِيلْ وَ خَطَّاهُمْ حَوَالَيْ الْخَيْمَةْ.
[25] وَ اللّٰهْ نَزَلْ فِي لُبّ السَّحَابَايْ وَ كَلَّمْ لَيَّهْ. وَ شَالْ مِنْ الرُّوحْ الْقَاعِدْ فَوْق مُوسَى وَ خَطَّاهْ فَوْق السَّبْعِينْ شُيُوخْ. وَ وَكِتْ الرُّوحْ قَعَدْ فَوْقهُمْ، طَوَّالِي قَمَّوْا يِتْنَبَّأَوْا وَ بَتَّانْ يَوْم آخَرْ مَا سَوَّوْه.
[26] وَ لَاكِنْ رُجَالْ إِتْنَيْن، الْوَاحِدْ أُسْمَهْ أَلِدَادْ وَ الْآخَرْ أُسْمَهْ مِدَادْ، هُمَّنْ كُلَ مِنْ السَّبْعِينْ كُبَارَاتْ وَ مَا مَشَوْا مَعَ الْآخَرِينْ لِلْخَيْمَةْ. وَ لَاكِنْ هُمَّنْ كُلَ الرُّوحْ نَزَلْ فَوْقهُمْ وَ قَمَّوْا يِتْنَبَّأَوْا فِي الْفَرِيقْ.
[27] وَ وِلَيْد وَاحِدْ جَرَى خَبَّرْ مُوسَى وَ قَالْ: «أَلِدَادْ وَ مِدَادْ قَاعِدِينْ يِتْنَبَّأَوْا فِي الْفَرِيقْ.»
[28] وَ يَشُوعْ وِلَيْد نُونْ مُسَاعِدْ مُوسَى مِنْ شَبَابَهْ، قَالْ: «يَا سَيِّدِي مُوسَى! أَدْحَرْهُمْ.»
[29] وَ مُوسَى قَالْ لَيَّهْ: «إِنْتَ حَسُودْ لَيِّ وَلَّا شُنُو؟ أَيْوَى، خَلِّي اللّٰهْ يِنَزِّلْ رُوحَهْ فِي كُلَّ الشَّعَبْ وَ يِسَوِّيهُمْ كُلُّهُمْ أَنْبِيَاء.»
[30] وَ بَعَدْ دَا، خَلَاصْ مُوسَى وَ كُلَّ شُيُوخْ بَنِي إِسْرَائِيلْ قَبَّلَوْا فِي الْفَرِيقْ.
[31] وَ خَلَاصْ، اللّٰهْ جَابْ رِيحْ مِنْ عَلَيْ الْبَحَرْ وَ جَابَتْ مَعَاهَا طُيُورْ السَّلْوَى وَ صَبَّتْهُمْ فِي الْفَرِيقْ فِي أَيِّ جِيهَةْ لَحَدِّي مَشِي يَوْم. مُنْصَبِّينْ فِي الْأَرْض وَ قَايْمَيْن مِنْهَا لَحَدِّي دُرَاعَيْن.
[32] وَ بَنِي إِسْرَائِيلْ قَمَّوْا يُخُمُّوا السَّلْوَى طُولْ اللَّيْل وَ طُولْ النَّهَارْ لَحَدِّي الْيَوْم التَّانِي. وَ لَمَّوْا السَّلْوَى وَ اللِّقِي شِيَّةْ كُلَ لِقِي 25 شُوَالْ وَ شَرَّوْهَا حَوَالَيْ الْفَرِيقْ لِتِجِفّ.
[33] وَ وَكِتْ قَاعِدِينْ يَاكُلُوا اللَّحَمْ وَ لِسَّاعْ مَا كَمَّلَوْا مِنْ أَكْلَهْ كَيْ بَسْ، اللّٰهْ غِضِبْ غَضَبْ شَدِيدْ وَ ضَرَبَاهُمْ بِوَبَاءْ شَدِيدْ.
[34] وَ سَمَّوْا الْبَكَانْ دَا قِبْرُوتْ هَتَّاوَةْ (مَعَنَاتَهْ قُبُورْ الْقَرَمْ). أَشَانْ دَا بَسْ الْبَكَانْ الدَّفَنَوْا فَوْقَهْ النَّاسْ الْقَرْمَانِينْ لِأَكِلْ اللَّحَمْ.
[35] وَ مِنْ قِبْرُوتْ هَتَّاوَةْ، بَنِي إِسْرَائِيلْ سَارَوْا وَ مَشَوْا لِحَصِرُوتْ وَ قَعَدَوْا هِنَاكْ.