[1] وَ اللّٰهْ حَجَّى لِمُوسَى وَ هَارُونْ وَ قَالْ:
[2] «أَيِّ نَادُمْ مِنْ بَنِي إِسْرَائِيلْ يَنْزِلْ مَعَ مَجْمُوعَةْ عَايِلْتَهْ تِحِتْ رَايِتْهَا الْعَسْكَرِيَّةْ. وَ يُخُطُّوا مُعَسْكَرْهُمْ حَوَالَيْ خَيْمَةْ الْإِجْتِمَاعْ وَ مُوَجِّهِينْ عَلَيْهَا.
[3] «وَ مِنْ جِيهَةْ الصَّبَاحْ، يَبْنُوا مُعَسْكَرْ يَهُوذَا تِحِتْ رَايَاتْهُمْ حَسَبْ مَجْمُوعَاتْهُمْ الْعَسْكَرِيَّةْ. وَ شَيْخهُمْ نَحْشُونْ وِلَيْد عَمِنَدَابْ.
[4] وَ عَدَدْ عَسْكَرَهْ 74 600 رَاجِلْ.
[5] وَ جَنْبَهْ تَنْزِلْ قَبِيلَةْ يَسَّاكَرْ وَ شَيْخهَا نَتَنِيلْ وِلَيْد صُوعَرْ.
[6] وَ عَدَدْ عَسْكَرَهْ 54 400 رَاجِلْ.
[7] وَ بَتَّانْ تَنْزِلْ مَعَايَهْ قَبِيلَةْ زَبُلُونْ وَ شَيْخهَا أَلِيَابْ وِلَيْد حِيلُونْ.
[8] وَ عَدَدْ عَسْكَرَهْ 57 400 رَاجِلْ.
[9] وَ الْمَجْمُوعَاتْ الْعَسْكَرِيَّةْ الْيِكَوُّنُوا مُعَسْكَرْ يَهُوذَا عَدَدْهُمْ كُلُّهُمْ كَيْ 186 400 رَاجِلْ. وَ هُمَّنْ يَمْشُوا أَوَّلْ نَاسْ.
[10] «وَ مِنْ جِيهَةْ الْوَطِي، يُخُطُّوا مُعَسْكَرْ رَأُوبِينْ تِحِتْ رَايَاتْهُمْ حَسَبْ مَجْمُوعَاتْهُمْ الْعَسْكَرِيَّةْ. وَ شَيْخهُمْ أَلِصُورْ وِلَيْد شَدَيُورْ.
[11] وَ عَدَدْ عَسْكَرَهْ 46 500 رَاجِلْ.
[12] وَ جَنْبَهْ تَنْزِلْ قَبِيلَةْ شِمْعُونْ وَ شَيْخهَا شَلُمِيِيلْ وِلَيْد صُرِشَدَايْ.
[13] وَ عَدَدْ عَسْكَرَهْ 59 300 رَاجِلْ.
[14] وَ بَتَّانْ تَنْزِلْ مَعَايَهْ قَبِيلَةْ قَادْ وَ شَيْخهَا أَلِيَاسَفْ وِلَيْد دَعُوِيلْ.
[15] وَ عَدَدْ عَسْكَرَهْ 45 650 رَاجِلْ.
[16] وَ الْمَجْمُوعَاتْ الْعَسْكَرِيَّةْ الْيِكَوُّنُوا مُعَسْكَرْ رَأُوبِينْ عَدَدْهُمْ كُلُّهُمْ كَيْ 151 450 رَاجِلْ. وَ هُمَّنْ يَمْشُوا تَانِي نَاسْ.
[17] «وَ بَعَدْ دَا، تَمْشِي خَيْمَةْ الْإِجْتِمَاعْ مَعَ مُعَسْكَرْ اللَّاوِيِّينْ فِي أُسْط الْمُعَسْكَرَاتْ. وَ أَيِّ مُعَسْكَرْ يِسِيرْ تِحِتْ رَايْتَهْ حَسَبْ النِّظَامْ النَّزَلْ فَوْقَهْ.
[18] «وَ مِنْ جِيهَةْ الْغَرِبْ، يُخُطُّوا مُعَسْكَرْ أَفْرَايِمْ تِحِتْ رَايَاتْهُمْ حَسَبْ مَجْمُوعَاتْهُمْ الْعَسْكَرِيَّةْ. وَ شَيْخهُمْ أَلِشَمَعْ وِلَيْد عَمِهُودْ.
[19] وَ عَدَدْ عَسْكَرَهْ 40 500 رَاجِلْ.
[20] وَ جَنْبَهْ تَنْزِلْ قَبِيلَةْ مَنَسَّى وَ شَيْخهَا قَمَلِيِيلْ وِلَيْد فَدَهْصُورْ.
[21] وَ عَدَدْ عَسْكَرَهْ 32 200 رَاجِلْ.
[22] وَ بَتَّانْ تَنْزِلْ مَعَايَهْ قَبِيلَةْ بَنْيَامِينْ وَ شَيْخهَا أَبِدَانْ وِلَيْد قِدْعُونِي.
[23] وَ عَدَدْ عَسْكَرَهْ 35 400 رَاجِلْ.
[24] وَ الْمَجْمُوعَاتْ الْعَسْكَرِيَّةْ الْيِكَوُّنُوا مُعَسْكَرْ أَفْرَايِمْ عَدَدْهُمْ كُلُّهُمْ كَيْ 108 100 رَاجِلْ. وَ هُمَّنْ يَمْشُوا تَالِتْ نَاسْ.
[25] «وَ مِنْ جِيهَةْ الْمُنْشَاقْ، يُخُطُّوا مُعَسْكَرْ دَانْ تِحِتْ رَايَاتْهُمْ حَسَبْ مَجْمُوعَاتْهُمْ الْعَسْكَرِيَّةْ. وَ شَيْخهُمْ أَخِعَازَرْ وِلَيْد عَمِشَدَايْ.
[26] وَ عَدَدْ عَسْكَرَهْ 62 700 رَاجِلْ.
[27] وَ جَنْبَهْ تَنْزِلْ قَبِيلَةْ أَشِيرْ وَ شَيْخهَا فَقْعِيِيلْ وِلَيْد عُكْرَنْ.
[28] وَ عَدَدْ عَسْكَرَهْ 41 500 رَاجِلْ.
[29] وَ بَتَّانْ تَنْزِلْ مَعَايَهْ قَبِيلَةْ نَفْتَالِي وَ شَيْخهَا أَخِيرَعْ وِلَيْد عِنَانْ.
[30] وَ عَدَدْ عَسْكَرَهْ 53 400 رَاجِلْ.
[31] وَ الْمَجْمُوعَاتْ الْعَسْكَرِيَّةْ الْيِكَوُّنُوا مُعَسْكَرْ دَانْ عَدَدْهُمْ كُلُّهُمْ كَيْ 157 600 رَاجِلْ. وَ هُمَّنْ يَمْشُوا وَرَاءْ تِحِتْ رَايِتْهُمْ.»
[32] وَ خَلَاصْ بَنِي إِسْرَائِيلْ حَسَبَوْهُمْ حَسَبْ عَايِلَاتْهُمْ وَ مَجْمُوعَاتْهُمْ الْعَسْكَرِيَّةْ وَ عَدَدْهُمْ بِقِي 603 550 رَاجِلْ.
[33] وَ لَاكِنْ اللَّاوِيِّينْ مَا حَسَبَوْهُمْ مَعَ عَسْكَرْ بَنِي إِسْرَائِيلْ. وَ دَا، مِثِلْ اللّٰهْ أَمَرْ بَيَّهْ مُوسَى.
[34] وَ خَلَاصْ بَنِي إِسْرَائِيلْ سَوَّوْا كُلَ شَيّءْ مِثِلْ اللّٰهْ أَمَرْ بَيَّهْ مُوسَى. وَ يَنْزُلُوا تِحِتْ رَايَاتْهُمْ وَ يِسِيرُوا حَسَبْ خُشُومْ بُيُوتْهُمْ وَ عَايِلَاتْهُمْ.