[1] وَ دَاهُو اللّٰهْ قَالْ: «شِيفُوا، أَنَا نِقَوِّمْ عَدُو مِثِلْ رِيحْ مُدَمِّرَةْ ضِدّ بَابِلْ وَ ضِدّ قُلُوبْ عُدْوَانِي.
[2] وَ نِرَسِّلْ ضِدّ بَابِلْ أَجَانِبْ يِغَرْبُلُوهَا. فِي يَوْم فَسَالِتْهَا، يَجُوا لَيْهَا مِنْ كُلِّ جِيهَةْ وَ يِدَمُّرُوا أَرْضَهَا.»
[3] أَضُرْبُوا أَيِّ وَاحِدْ مِنْ الْعَدُو الْعِنْدَهْ نُشَّابْ وَ لَابِسْ دِرْعَهْ. مَا تِخَلُّوا الْعَسْكَرْ الشَّبَابْ وَ لَاكِنْ دَمُّرُوا كُلَّ عَسْكَرْ بَابِلْ.
[4] خَلِّي يَقَعَوْا مُطَعَّنِينْ فِي الشَّوَارِعْ وَ يِدَفُّقُوا مَيْتِينْ فِي بَلَدْ بَابِلْ.
[5] أَشَانْ اللّٰهْ الْإِلٰـهْ الْقَادِرْ كَانْ مَعَ بَنِي إِسْرَائِيلْ وَ بَنِي يَهُوذَا حَتَّى كَنْ هُمَّنْ مَلَوْا بَلَدْهُمْ بِشَرّ ضِدّ قُدُّوسْ إِسْرَائِيلْ كُلَ.
[6] عَرُّدُوا مِنْ بَلَدْ بَابِلْ وَ خَلِّي أَيِّ وَاحِدْ يِنَجِّي نَفْسَهْ. مَا تُمُوتُوا بِسَبَبْ ذَنِبْهَا أَشَانْ دَا وَكِتْ اللّٰهْ يِشِيلْ تَارَهْ وَ يِجَازِيهَا حَسَبْ الْوَاجِبْ لَيْهَا.
[7] بَابِلْ أَوَّلْ هِي مِثِلْ كَاسْ هَنَا دَهَبْ فِي إِيدْ اللّٰهْ، هِي سَكَّرَتْ كُلَّ الْأَرْض. وَ الْأُمَمْ شِرْبَوْا مِنْ خَمَرْهَا وَ فِي شَانْ دَا بَسْ، رُوسَيْهُمْ وَدَّرَوْا.
[8] وَ بِغَفْلَةْ، بَابِلْ وَقَعَتْ وَ أَلْكَسَّرَتْ. أَبْكُوا لَيْهَا وَ فَتُّشُوا دَوَاءْ وَ أَمْسَحَوْه فِي عُوَارْهَا، // أَكُونْ تِلْعَالَجْ.
[9] «أَنِحْنَ دَوَّرْنَا نِعَالُجُوا بَابِلْ وَ لَاكِنْ هِي مَا أَدَّاوَتْ لَيْنَا. يَلَّا نِخَلُّوهَا! أَيِّ وَاحِدْ يَمْشِي لِبَلَدَهْ أَشَانْ عِقَابْهَا لِحِقْ لَحَدِّي السَّمَاءْ وَ أَنْرَفَعْ لَحَدِّي السَّحَابْ.
[10] اللّٰهْ بَيَّنْ عَدَالِتْنَا وَ خَلَاصْ، تَعَالُوا نِقَبُّلُوا. نِخَبُّرُوا فِي جَبَلْ صَهْيُون بِخَيْر اللّٰهْ إِلٰـهْنَا.»
[11] طَرُّقُوا نَشَاشِيبْكُو وَ أَمْلَوْا كَلَوْتَاتْكُو. اللّٰهْ حَرَّشْ مُلُوكْ مَادِي ضِدّ بَابِلْ أَشَانْ هُو قَرَّرْ يِدَمِّرْ بَابِلْ. يِشِيلْ فَوْقهَا التَّارْ وَ دَا تَارْ بَيْتَهْ الْمُقَدَّسْ الدَّمَّرَوْه.
[12] أَرْفَعَوْا رَايَةْ الْهُجُومْ // ضِدّ دُرْدُرْ بَابِلْ وَ شَدُّدُوا الْمُرَاقَبَةْ. خُطُّوا حُرَّاسْ وَ خُطُّوا نَاسْ لِيَرْبُطُوا كَمِينْ. أَشَانْ الشَّيّءْ الْقَرَّرَهْ اللّٰهْ، هُو يِسَوِّيهْ وَ دَا قَرَارَهْ ضِدّ سُكَّانْ بَابِلْ.
[13] إِنْتِ يَا بَابِلْ الْجَنْب الْبُحُورْ، غُنَاكِ كَتِيرَةْ. نِهَايِتْكِ جَاتْ حَسَبْ طَمَعْكِ.
[14] اللّٰهْ الْقَادِرْ حَلَفْ بِنَفْسَهْ وَ قَالْ: «أَنَا نَمْلَاكِ بِرُجَالْ كَتِيرِينْ // مِثِلْ الْجَرَادْ وَ يِكَوْرُكُوا فِي لُبِّكِ // كُرَوْرَاكْ النَّصُرْ.»
[15] اللّٰهْ خَلَقْ الْأَرْض بِقُدُرْتَهْ وَ ثَبَّتْ الْعَالَمْ بِحِكْمَتَهْ وَ فَلَّ السَّمَاوَاتْ بِعِلْمَهْ.
[16] وَ وَكِتْ يَامُرْ، الْأَلْمِي يِلِمّ بَكَانْ وَاحِدْ فِي السَّمَاءْ وَ السَّحَابْ يَطْلَعْ مِنْ آخِرْ الْأَرْض وَ الْبَرَّاقَةْ تَشْلَعْ وَ الْمَطَرْ يَنْزِلْ وَ مَخَازِنْ الرِّيحْ يِنْفَتْحُوا.
[17] وَ أَيِّ نَادُمْ مُغَفَّلْ مَا عِنْدَهْ مَعْرَفَةْ. وَ أَيِّ صَيَّاغِي هَنَا صَنَمْ، الْعَيْب يَكُرْبَهْ أَشَانْ تِمْثَالَهْ دَا غَشّ، مَا عِنْدَهْ رُوحْ.
[18] الْأَصْنَامْ زَايْلِينْ وَ هُمَّنْ عَمَلْ الْيِجِيبْ الشَّمَاتَةْ. وَ وَكِتْ الْعِقَابْ يَجِي، هُمَّنْ يِدَّمَّرَوْا.
[19] وَ إِلٰـهْ يَعْقُوبْ مَا مِثِلْهُمْ أَشَانْ هُو بَسْ خَلَقْ كُلَّ شَيّءْ. هُو عَزَلْ قَبِيلَةْ وَاحِدَةْ لِيَبْقَوْا شَعَبَهْ الْمِثِلْ وَرَثَتَهْ وَ أُسْمَهْ اللّٰهْ الْقَادِرْ.
[20] وَ اللّٰهْ قَالْ: «إِنْتِ، يَا بَابِلْ! بِقِيتِ لَيِّ مِثِلْ عَصَاتِي النِّحَارِبْ بَيْهَا. بَيْكِ إِنْتِ، أَنَا ضَرَبْت الْأُمَمْ وَ خَرَبْت الْمَمَالِكْ.
[21] وَ بَيْكِ إِنْتِ، أَنَا ضَرَبْت الْخَيْل وَ رُكَّابْهُمْ وَ عَرَبَاتْ الْحَرِبْ وَ سِيَادْهُمْ.
[22] وَ بَيْكِ إِنْتِ، أَنَا ضَرَبْت الرُّجَالْ وَ الْعَوِينْ وَ الْكُبَارْ وَ الدُّقَاقْ وَ الصُّبْيَانْ وَ الْبَنَاتْ.
[23] وَ بَيْكِ إِنْتِ، أَنَا ضَرَبْت الرُّعْيَانْ وَ غَنَمْهُمْ وَ الْحَرَّاتِينْ وَ تِيرَانْهُمْ وَ الْحُكَّامْ وَ مَسَائِيلْهُمْ.»
[24] «وَ لَاكِنْ هَسَّعْ، شِيفُوا يَا بَنِي إِسْرَائِيلْ! أَنَا نِجَازِي بَابِلْ وَ كُلَّ سُكَّانْهَا حَسَبْ كُلَّ الْفَسَالَةْ السَّوَّوْهَا فِي صَهْيُون. وَ دَا كَلَامْ اللّٰهْ.
[25] وَ أَكِيدْ أَنَا نُقُمّ ضِدِّكِ إِنْتِ، يَا بَابِلْ الْمِثِلْ جَبَلْ الْخَرَابْ، إِنْتِ الْخَرَبْتِ كُلَّ الْأَرْض. أَنَا نِمِدّ إِيدِي لِنَضْرُبْكِ وَ نِدَرْدِقْكِ مِنْ رُوسَيْ الْجِبَالْ وَ نَحْرِقْكِ بِنَارْ. وَ دَا كَلَامْ اللّٰهْ.
[26] وَ بَتَّانْ مَا يَمُرْقُوا مِنْكِ وَ لَا حَجَرْ زَاوِيَةْ وَ لَا حَجَرْ أَسَاسْ أَشَانْ تُكُونِي خَرَابْ إِلَى الْأَبَدْ.» وَ دَا كَلَامْ اللّٰهْ.
[27] أَرْفَعَوْا رَايَةْ الْهُجُومْ فِي الْبَلَدْ وَ أَضُرْبُوا الْبُوقْ فِي أُسْط الْأُمَمْ. خَصُّصُوا أُمَمْ ضِدّ بَابِلْ وَ حَرُّشُوا ضِدَّهَا مَمَالِكْ أَرَرَاطْ وَ مِنِّي وَ أَشْكَنَازْ. كَلُّفُوا قَايِدْ ضِدَّهَا وَ قَوُّمُوا ضِدَّهَا خَيْل // مِثِلْ الْجَرَادْ السَّايِرْ.
[28] وَ خَصُّصُوا الْأُمَمْ ضِدّ بَابِلْ وَ رَسُّلُوا ضِدَّهَا مُلُوكْ مَادِي وَ حُكَّامْهُمْ // وَ كُلَّ مَسَائِيلْهُمْ وَ كُلَّ الْبُلْدَانْ الْهُمَّنْ يَحْكُمُوهُمْ.
[29] الْأَرْض أَنْهَزَّتْ وَ رَجَفَتْ وَكِتْ قَرَارْ اللّٰهْ ضِدّ بَابِلْ أَلْحَقَّقْ. وَ بَلَدْ بَابِلْ تَخْرَبْ وَ تَبْقَى فَاضِيَةْ مِنْ سُكَّانْهَا.
[30] وَ الْعَسْكَرْ الْفُرَّاسْ هَنَا بَابِلْ أَبَوْا مَا يِحَارُبُوا وَ أَلَّبَّدَوْا فِي بَكَانَاتْهُمْ الْقَوِيِّينْ. وَ فَحَالِيِّتْهُمْ كُلَ وَدَّرَتْ وَ هُمَّنْ بِقَوْا مِثِلْ عَوِينْ. وَ بُيُوتْ بَابِلْ أَنْتَشَّوْا وَ بِيبَانْهَا أَلْكَسَّرَوْا.
[31] وَ يَجْرِي مُرْسَالْ بَعَدْ مُرْسَالْ وَ رَسُولْ وَرَاءْ رَسُولْ لِيِخَبُّرُوا مَلِكْ بَابِلْ كَدَرْ مَدِينْتَهْ شَالَوْهَا مِنْ طَرَفْهَا لِطَرَفْهَا.
[32] وَ أَيِّ مَعَدّ، الْعَدُو سَدَّاهْ وَ تِبِنْ الرُّهُودْ تَشَّوْه وَ الرُّجَالْ الْمُحَارِبِينْ أَنْبَهَتَوْا.
[33] وَ دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: «بَابِلْ الْمِثِلْ بِنَيَّةْ تَبْقَى يَابْسَةْ كَرّ مِثِلْ نَقَعَةْ الْمَدَقّ الْجَهَّزَوْهَا. وَ بَعَدْ شِيَّةْ، وَكْت الْقَطِعْ يَجِي.»
[34] «نَبُوخَدْنَصَرْ مَلِكْ بَابِلْ بَرْجَلَانَا وَ أَكَلَانَا وَ هُو سَوَّانَا مِثِلْ مَاعُونْ فَاضِي. وَ زَرَطَانَا مِثِلْ الْغُولْ وَ مَلَا بَطْنَهْ بِمُخِّنَا وَ طَرَدَانَا.
[35] وَ خَلِّي الْعُنُفْ السَّوَّوْه لَيْنَا يُكُونْ فِي بَابِلْ!» وَ دَا كَلَامْ سُكَّانْ صَهْيُون. «وَ خَلِّي دِمِّتْنَا تَقَعْ فِي رَاسْ سُكَّانْ بَابِلْ!» وَ دَا كَلَامْ نَاسْ مَدِينَةْ الْقُدُسْ.
[36] وَ فِي شَانْ دَا، دَاهُو اللّٰهْ قَالْ: «أَنَا نِدَافِعْ لَيْكُو مِثِلْ مُحَامِي وَ نِشِيلْ لَيْكُو التَّارْ. وَ نِيَبِّسْ بَحَرْ بَابِلْ وَ نِجَفِّفْ عُيُونْ أَلْمِيهَا.
[37] وَ بَابِلْ تَبْقَى كَوْم هَنَا تُرَابْ وَ مَرْقَدْ هَنَا بَعَاشِيمْ وَ بَكَانْ خَرَابْ وَ بَهِيتَةْ وَ تَبْقَى فَاضِيَةْ مِنْ سُكَّانْهَا.
[38] وَ نَاسْ بَابِلْ يِكِرُّوا مِثِلْ الدِّيدَانْ الصُّبْيَانْ وَ يَهَرْجُوا مِثِلْ عِيَالْ الدُّودْ.
[39] وَ وَكِتْ جِحْمَوْا، أَنَا نِجَهِّزْ لَيْهُمْ عَازُومَةْ وَ نِسَكِّرْهُمْ لَحَدِّي يَفْرَحَوْا. وَ لَاكِنْ يُنُومُوا نَوْم إِلَى الْأَبَدْ وَ بَتَّانْ مَا يُقُمُّوا. وَ دَا كَلَامْ اللّٰهْ.
[40] وَ أَنَا نِوَدِّيهُمْ مِثِلْ الْخُرْفَانْ لِلْجُزُرْ وَ مِثِلْ الْكُبَاشْ وَ التُّيُوسْ.»
[41] شِيفُوا! بَابِلْ أَنْشَالَتْ وَ الْمَعْرُوفَةْ فِي كُلَّ الْأَرْض أَنْهَزَمَتْ! عَجَبْ، بَابِلْ خِرْبَتْ فِي أُسْط الْأُمَمْ!
[42] الْبَحَرْ شَالْ بَابِلْ وَ بِمَوْجَهْ الْكَتِيرْ، غَطَّاهَا.
[43] مُدُنْهَا خِرْبَوْا وَ هِي بِقَتْ أَرْض جَفَافْ وَ كَدَادَةْ. وَ دِي الْبَلَدْ الْمَا فِي نَادُمْ يَسْكُنْ فَوْقهَا وَ لَا إِنْسَانْ يِعَدِّي بَيْهَا.
[44] وَ اللّٰهْ قَالْ: «أَنَا نُقُمّ ضِدّ صَنَمْ بِيلْ فِي بَابِلْ وَ نَمْرُقْ اللُّقْمَةْ مِنْ خَشْمَهْ. وَ بَتَّانْ الْأُمَمْ مَا يَمْشُوا لَيَّهْ وَ دُرْدُرْ بَابِلْ يَقَعْ.
[45] يَا شَعَبِي! أَمُرْقُوا مِنْ أُسُطْ بَابِلْ وَ خَلِّي أَيِّ وَاحِدْ يِنَجِّي نَفْسَهْ، وَ يِبَعِّدْ مِنْ الْغَضَبْ الْمُحْرِقْ هَنَايِ اللّٰهْ.
[46] وَ خَلِّي عَشَمْكُو مَا يِنْقَطِعْ وَ مَا تَخَافَوْا مِنْ الْخَبَرْ الْقَاعِدِينْ تَسْمَعَوْه فِي الْبَلَدْ. أَشَانْ السَّنَةْ دِي، تَسْمَعَوْا خَبَرْ وَ فِي السَّنَةْ الْبَعَدْهَا كُلَ، // تَسْمَعَوْا خَبَرْ آخَرْ. وَ يُقُولُوا يَجِي عُنُفْ فِي الْبَلَدْ وَ مَلِكْ يُقُمّ ضِدّ مَلِكْ.
[47] وَ فِي شَانْ دَا، يَجِي يَوْم وَاحِدْ الْفَوْقَهْ أَنَا نِعَاقِبْ أَصْنَامْ بَابِلْ. وَ كُلَّ بَلَدْهَا، الْعَيْب يَكْرُبْهَا وَ جَنَازَاتْ مَيْتِينْهَا يَقَعَوْا فِي لُبَّهَا.
[48] السَّمَاءْ وَ الْأَرْض يِزَغْرُطُوا وَ كُلَّ الْفِيهُمْ يِرَقْرِقْ مِنْ الْفَرَحْ فِي شَانْ دَمَارْ بَابِلْ. أَشَانْ مِنْ مُنْشَاقْ الْمُخَرِّبْ يَجِي لَيْهَا.» وَ دَا كَلَامْ اللّٰهْ.
[49] يَا مَيْتِينْ بَنِي إِسْرَائِيلْ! بَابِلْ كُلَ وَاجِبْ تَقَعْ. أَشَانْ بَيْهَا هِي وَقَعَوْا نَاسْ مَيْتِينْ فِي أَيِّ بَكَانْ فِي الْأَرْض.
[50] يَلَّا، إِنْتُو النِّجِيتُوا مِنْ الْمَوْت! عَرُّدُوا! مَا تَقِيفُوا! فِي الْغُرْبَةْ، أَذَّكَّرَوْا اللّٰهْ وَ خُطُّوا مَدِينَةْ الْقُدُسْ فِي قُلُوبْكُو.
[51] وَ بَنِي إِسْرَائِيلْ قَالَوْا: «أَنِحْنَ الْعَيْب كَرَبَانَا وَكِتْ سِمِعْنَا الْمُعْيَارْ وَ الْخَجْلَةْ دَلَّتْ رُوسَيْنَا. أَشَانْ الْأَجَانِبْ دَخَلَوْا فِي الْبَكَانَاتْ هَنَا بَيْت اللّٰهْ.»
[52] وَ دَاهُو كَلَامْ اللّٰهْ: «وَ فِي شَانْ دَا، يَجِي يَوْم وَاحِدْ الْفَوْقَهْ نِعَاقِبْ أَصْنَامْ بَابِلْ وَ فِي كُلَّ بَلَدْهَا الْمَجْرُوحِينْ يَقُنْتُوا.
[53] حَتَّى كَنْ بَابِلْ تَبْقَى عَالِيَةْ // لَحَدِّي السَّمَاءْ وَ تِقَوِّي بَكَانَاتْهَا الْعَالِيِينْ كُلَ، أَنَا نِجِيبْ فَوْقهَا مُخَرِّبِينْ.» وَ دَا كَلَامْ اللّٰهْ.
[54] وَ صِرَاخْ يِنْسَمِعْ مِنْ بَابِلْ وَ دَمَارْ كَبِيرْ يُكُونْ // فِي بَلَدْ الْبَابِلِيِّينْ.
[55] أَشَانْ اللّٰهْ يَخْرِبْ بَابِلْ وَ يِسَكِّتْ حَرَكَتْهَا. وَ الْعَدُو يَجِيهَا مِثِلْ الْمَوْج الشَّدِيدْ وَ حَرَكَتَهْ تِنْسَمِعْ.
[56] أَيْوَى! كُلَّ الْمُخَرِّبِينْ جَوْا ضِدّ بَابِلْ. عَسْكَرْهَا الْفُرَّاسْ أَنْكَرَبَوْا وَ نُبَّالْهُمْ أَلْكَسَّرْ. أَشَانْ اللّٰهْ هُو الْإِلٰـهْ الْيِجَازِي وَ يِكَافِي أَيِّ نَادُمْ عَلَيْ حَسَبْ الْوَاجِبْ لَيَّهْ.
[57] «أَنَا نِسَكِّرْ مَسَائِيلْهَا وَ حَكِيمِينْهَا وَ حُكَّامْهَا وَ كُبَارَاتْهَا وَ عَسْكَرْهَا الْفُرَّاسْ. وَ هُمَّنْ يُنُومُوا إِلَى الْأَبَدْ وَ بَتَّانْ مَا يُقُمُّوا.» وَ دَا كَلَامْ الْمَلِكْ وَ هُو اللّٰهْ الْقَادِرْ.
[58] وَ دَاهُو اللّٰهْ الْقَادِرْ قَالْ: «دَرَادِرْ بَابِلْ التُّخَانْ يِلْهَدَّمَوْا. وَ بِيبَانْهَا الطُّوَالْ، النَّارْ تَاكُلْهُمْ. الشُّعُوبْ يِعَيُّوا نُفُوسْهُمْ سَاكِتْ وَ الْأُمَمْ يَتْعَبَوْا لِلتَّاكُلَهْ النَّارْ.»
[59] النَّبِي إِرْمِيَا كَلَّمْ لِسَرَايَا وِلَيْد نَرِيَّا وِلَيْد مَحْسِيَّا وَكِتْ هُو مَاشِي بَابِلْ مَعَ صِدْقِيَّا مَلِكْ يَهُوذَا فِي السَّنَةْ الرَّابْعَةْ هَنَا حُكُمْ صِدْقِيَّا. وَ سَرَايَا دَا، هُو مَسْؤُولْ مِنْ قَصِرْ الْمَلِكْ.
[60] وَ إِرْمِيَا كَتَبْ فِي كِتَابْ مَلْفُوفْ كُلَّ الْفَسَالَةْ التَّجِي لِبَابِلْ وَ دَا كُلَّ الْكَلَامْ الْمَكْتُوبْ الْبُخُصّ بَابِلْ.
[61] وَ إِرْمِيَا قَالْ لِسَرَايَا: «وَكِتْ تِوَصِّلْ فِي بَابِلْ، فَكِّرْ وَ أَقْرِي بِحِسّ عَالِي كُلَّ الْكَلَامْ دَا.
[62] وَ قُولْ: ‹يَا اللّٰهْ! إِنْتَ بَسْ قَرَّرْت وَ قُلْت الْبَكَانْ دَا يِدَّمَّرْ. وَ مَا فِي نَادُمْ يَسْكُنْ فَوْقَهْ وَ لَا إِنْسَانْ وَ لَا بَهَايِمْ. وَ لَاكِنْ هُو يَبْقَى خَرَابْ إِلَى الْأَبَدْ.›
[63] وَكِتْ تِكَمِّلْ مِنْ قِرَايِةْ الْكِتَابْ دَا، أَرْبُطْ فَوْقَهْ حَجَرْ وَ أَرْمِيهْ فِي لُبّ بَحَرْ الْفُرَاتْ.
[64] وَ بَعَدْ دَا، قُولْ: ‹بَابِلْ كُلَ تَغْرَقْ مِثِلْ دَا وَ أَبَداً مَا تُقُمّ بَعَدْ الْفَسَالَةْ النِّجِيبْهَا فَوْقهَا.›» «النَّاسْ يَقَعَوْا.» وَ دَاهُو نِهَايَةْ كَلَامْ إِرْمِيَا.