[1] يَا أَخْوَانِي النِّحِبُّكُو، أَنَا نَقْرَمْ لَيْكُو وَ نَفْرَحْ بَيْكُو وَ فِي شَانْكُو إِنْتُو نَرْفَعْ رَاسِي فَوْق. يَا الْمَحْبُوبِينْ، أَقْعُدُوا ثَابْتِينْ فَوْق رَبِّنَا عِيسَى.
[2] يَا أَخُتْنَا أَفُودِيَّةْ، يَا أَخُتْنَا سِنْتِخَةْ، نَطْلُبْ مِنْكَنْ أَشَانْ إِنْتَنْ تِصَّالَحَنْ أَمْبَيْنَاتْكَنْ وَ تِتَابِعَنْ رَبِّنَا سَوَا بِفِكِرْ وَاحِدْ.
[3] وَ إِنْتَ يَا رَفِيقِي الْأَمِينْ، نَطْلُبْ مِنَّكْ إِنْتَ تِسَاعِدْ الْعَوِينْ دَيْل. سَاعِدْهِنْ أَشَانْ هِنَّ خَدَمَنْ مَعَايِ فِي شَانْ بِشَارَةْ الْمَسِيحْ. هِنَّ جَاهَدَنْ سَوَا مَعَ أَخُونَا كِلَيْمَانْ وَ الْآخَرِينْ الْيَخْدُمُوا مَعَايِ. النَّاسْ دَوْل، اللّٰهْ أَنْطَاهُمْ الْحَيَاةْ الْأَبَدِيَّةْ وَ سَجَّلْ أَسَامَيْهُمْ فِي كِتَابَهْ.
[4] أَفْرَحَوْا بِرَبِّنَا عِيسَى دَايْماً وَ بَتَّانْ نُقُولْ لَيْكُو أَفْرَحَوْا.
[5] خَلِّي رُوحْكُو تَبْقَى طَوِيلَةْ قِدَّامْ كُلَّ نَادُمْ. رَبِّنَا عِيسَى قَرِيبْ.
[6] مَا تِهِمُّوا لِأَيِّ شَيْء لَاكِنْ فِي كُلِّ حَالْ أَشْكُرُوا اللّٰهْ وَ قَدُّمُوا لَيَّهْ طَلَبْكُو بِصَلَاةْ وَ دُعَاءْ.
[7] وَ اللّٰهْ يَنْطِيكُو سَلَامَهْ الْقَوِي الْفَايِتْ كُلَّ شَيْء الْيَفْهَمَوْه النَّاسْ. وَ سَلَامْ اللّٰهْ يَحْفَضْ قُلُوبْكُو وَ أَفْكَارْكُو وَ تَقْعُدُوا ثَابْتِينْ فِي عِيسَى الْمَسِيحْ.
[8] يَا أَخْوَانِي، دِيهِي آخِرْ وَصِيَّةْ النَّنْطِيهَا لَيْكُو، فَكُّرُوا فِي أَيِّ شَيْء الصَّحِيحْ وَ أَيِّ شَيْء الشَّرِيفْ وَ أَيِّ شَيْء الْعَادِلْ وَ أَيِّ شَيْء الطَّاهِرْ وَ أَيِّ شَيْء الْجَمِيلْ وَ أَيِّ شَيْء الْكَرِيمْ وَ أَيِّ شَيْء الْأَفْضَلْ وَ أَيِّ شَيْء الْوَاجِبْ لَيَّهْ الشُّكُرْ. وَ كُلَّ شَيْء الْمِثِلْ دَا بَسْ، خُطُّوا أَفْكَارْكُو فَوْقَهْ ثَابْتِينْ.
[9] وَ طَبُّقُوا دَايْماً كُلَّ شَيْء الْعَلَّمْتُوهْ مِنِّي وَ لِقِيتُوهْ مِنِّي، كَانْ مِنْ كَلَامِي السِّمِعْتُوهْ وَلَّا مِنْ حَالِي الشِّفْتُوهَا. وَ اللّٰهْ رَبّ السَّلَامْ يُكُونْ مَعَاكُو.
[10] أَنَا فَرْحَانْ بِلْحَيْن وَ قَاعِدْ نَشْكُرْ رَبِّنَا كَدَرْ فِي الْأَخِيرْ شِلْتُوا نِيَّةْ أَشَانْ تِسَاعُدُونِي بَتَّانْ. بِالصَّحِيحْ، أَوَّلْ كُلَ عِنْدُكُو نِيَّةْ لَاكِنْ مَا عِنْدُكُو فُرْصَةْ.
[11] وَ أَنَا مَا قَاعِدْ نَشْكِي لَيْكُو مِنْ الْمَسْكَنَةْ أَشَانْ أَنَا عَلَّمْت كِكَّيْف نِعِيشْ فِي أَيِّ حَالْ.
[12] نَعَرِفْ كِكَّيْف نِعِيشْ فِي الْمَسْكَنَةْ وَ فِي الغِنَاءْ. أَنَا أَلْعَلَّمْت كِكَّيْف نَبْقَى رَضْيَانْ فِي كُلِّ بَكَانْ وَ فِي كُلِّ حَالْ، كَانْ أَنَا شَبْعَانْ وَلَّا جِيعَانْ وَ كَانْ عِنْدِي كَتِيرْ وَلَّا شِيَّةْ.
[13] وَ نَقْدَرْ نِسَوِّي أَيِّ شَيْء بِالْمَسِيحْ الْيَنْطِينِي قُدْرَةْ.
[14] لَاكِنْ الشَّيْء السَّوَّيْتُوهْ لَيِّ سَمَحْ بِلْحَيْن. إِنْتُو شَارَكْتُوا مَعَايِ فِي تَعَبِي.
[15] يَا أَخْوَانِي الْفِلِبِّيِينْ، إِنْتُو تَعَرْفُوا كَدَرْ أَوَّلْ مَرَّةْ جِيتْ بَلَّغْت بِشَارَةْ الْمَسِيحْ لَيْكُو وَ فُتّ قِدَّامْ مِنْ بَلَدْ مَقِدُونِيَةْ، إِنْتُو وِحَيْدكُو بِقِيتُوا مُشَارِكِينْ مَعَايِ. مَا فِي جَمَاعَةْ آخَرَةْ الْأَوَّلْ أَنْطَيْتهُمْ كَلَامْ اللّٰهْ وَ بَعَدَيْن هُمَّنْ أَنْطَوْنِي مُسَاعَدَةْ.
[16] وَكِتْ أَنَا لِسَّاعْ مَا خَلَّيْت مَقِدُنْيَةْ وَ قَاعِدْ فِي حِلَّةْ تَسَلُونِيكِي، إِنْتُو رَسَّلْتُوا لَيِّ مُسَاعَدَةْ أَكْتَرْ مِنْ مَرَّةْ.
[17] قُلْت الْكَلَامْ دَا، مَا أَشَانْ نِدَوْر مِنْكُو مُسَاعَدَةْ بَتَّانْ لَاكِنْ أَشَانْ نَعَرِفْ كَدَرْ أَيِّ شَيْء التَّنْطُوهْ فِي شَانْ رَبِّنَا، هُو يَقْبَلَهْ وَ يُخُطَّهْ فِي خَزِينَةْ الْحَسَنَاتْ وَ يِبَارِكُّو بِسَبَبَهْ. وَ أَنَا خَطَّيْت بَالِي فِي الْفَايْدَةْ الْإِنْتُو تَلْقَوْهَا مِنْ اللّٰهْ.
[18] وَ كُلَّ شَيْء الْأَنَا نِدَوْرَهْ، لِقِيتَهْ خَلَاصْ وَ زِيَادَةْ مِنْ النِّدَوْرَهْ. أَخُوكُو أَبْفَرِيدْ جَابْ لَيِّ الْمُسَاعَدَةْ الرَّسَّلْتُوهَا وَ خَلَاصْ أَنَا مَبْسُوطْ بِلْحَيْن. وَ الْعَطِيَّةْ دِي سَمْحَةْ مِثِلْ الضَّحِيَّةْ الْأَوَّلْ النَّاسْ يَنْطُوهَا لِلّٰهْ وَ اللّٰهْ يُقُولْ فَوْقهَا هِي مَقْبُولَةْ وَ عِنْدَهَا رِيحَةْ حَلْوَةْ وَ هُو يَرْضَى بَيْهَا.
[19] وَ نَعَرِفْ كَدَرْ كُلَّ شَيْء التِّحْتَاجُوا لَيَّهْ، اللّٰهْ يَرْزُقْكُو بَيَّهْ وَ يَنْطِيكُو مِنْ مَالَهْ الْمَجِيدْ بِالْمَسِيحْ عِيسَى.
[20] وَ خَلِّي اللّٰهْ أَبُونَا يِمَجُّدُوهْ دَايْماً وَ إِلَى الْأَبَدْ. آمِينْ.
[21] سَلُّمُوا كُلِّ نَادُمْ الْبِقِي صَالِحْ فِي الْمَسِيحْ عِيسَى. وَ الْأَخْوَانْ الْقَاعِدِينْ مَعَايِ يِسَلُّمُوكُو.
[22] كُلَّ الصَّالِحِينْ الْقَاعِدِينْ هِنِي يِسَلُّمُوكُو وَ خَاصَّةً النَّاسْ الْمِنْ بَيْت السُّلْطَانْ.
[23] نِعْمَةْ رَبِّنَا عِيسَى الْمَسِيحْ عَلَيْكُمْ.