[1] وَ خَلَاصْ يَا أَخْوَانِي، أَفْرَحَوْا بِرَبِّنَا عِيسَى. مَا قَاسِي لَيِّ نَكْتِبْ لَيْكُو نَفْس الشَّيْء الْأَوَّلْ أَوْرَيْتكُو بَيَّهْ وَ نِكَرِّرَهْ بَتَّانْ أَشَانْ تَقْعُدُوا فِي الْأَمَانْ.
[2] أَوْعُوا بَالْكُو مِنْ النَّاسْ الْبُقُولُوا كَدَرْ الْمَا يَهُودْ كُلَابْ. بِالصَّحِيحْ هُمَّنْ بَسْ الْكُلَابْ. أَوْعُوا بَالْكُو مِنْهُمْ، هُمَّنْ يِسَوُّوا الشَّرّ. يَفْرَحَوْا مِنْ قَطِّعِينْ جِلِدْ النَّاسْ وَ نُقُولْ لَيْكُو بَتَّانْ أَوْعُوا بَالْكُو مِنْهُمْ.
[3] بُقُولُوا هُمَّنْ الْمُطَهَّرِينْ لَاكِنْ أَنِحْنَ بَسْ النَّاسْ الْمُطَهَّرِينْ بِالصَّحِيحْ، أَنِحْنَ النَّعَبُدُوا اللّٰهْ بِقُدْرَةْ الرُّوحْ الْقُدُّوسْ وَ نِفَاشُرُوا بِالْمَسِيحْ عِيسَى وَ أَبَداً مَا نُخُطُّوا عَشَمْنَا فِي جِلِدْنَا.
[4] وَ حَسَبْ كَلَامْهُمْ، أَنَا عِنْدِي حَقّ نُخُطّ عَشَمِي فِي جِلْدِي. أَيِّ نَادُمْ الْيُقُولْ هُو عِنْدَهْ حَقّ يُخُطّ عَشَمَهْ فِي جِلْدَهْ، أَنَا عِنْدِي حَقّ بِزِيَادَةْ مِنَّهْ.
[5] أَنَا طَهَّرَوْنِي فِي الْيَوْم التَّامِنْ مِنْ وَالُودْتِي. وَ أَنَا مَوْلُودْ مِنْ بَنِي إِسْرَائِيلْ وَ مِنْ قَبِيلَةْ بَنْيَامِينْ. أَنَا عِبْرَانِي مِيَةْ فِي الْمِيَةْ. وَ فِي الشَّيْء الْبُخُصّ طَبِّقِينْ شُرُوطْ التَّوْرَاةْ، أَنَا مِنْ الْفَرِيسِيَّةْ.
[6] وَ أَنَا بِقِيتْ مُنْكَرِبْ بِلْحَيْن فِي دِينِي لَحَدِّي حَاوَلْت نِدَمِّرْ أُمَّةْ الْمَسِيحْ. وَ حَسَبْ كَلَامْهُمْ فِي شُرُوطْ التَّوْرَاةْ، أَنَا بِقِيتْ نَادُمْ صَالِحْ وَ مَا عِنْدِي عَيْب.
[7] لَاكِنْ كُلَّ شَيْء الْأَوَّلْ جَعَلْتَهْ هُو عِنْدَهْ فَايْدَةْ دَا، أَنَا خَلَّيْتَهْ مِنِّي وَ جَعَلْتَهْ مِثِلْ شَيْء سَاكِتْ فِي شَانْ الْمَسِيحْ.
[8] أَيْوَى، وَ زِيَادَةْ مِنْ دَا، عِرْفَةْ الْمَسِيحْ عِيسَى رَبِّي بِقَتْ لَيِّ أَخَيْر مِنْ كُلَّ شَيْء وَ نَجْعَلْ كُلَّ شَيْء آخَرْ سَاكِتْ. فِي شَانْ الْمَسِيحْ، أَنَا خَلَّيْت كُلَّ شَيْء الْعِنْدِي. وَ كُلَّ شَيْء الْأَوَّلْ عِنْدَهْ لَيِّ فَايْدَةْ، جَعَلْتَهْ مِثِلْ وَسَخْ أَشَانْ نَلْقَى الْفَايْدَةْ الْكَبِيرَةْ وَ هِي الْعَلَاقَةْ مَعَ الْمَسِيحْ.
[9] وَ نِدَوْر عَلَاقِتِي مَعَايَهْ تَبْقَى كَامِلَةْ. وَ بِمِثِلْ دَا، مَا نَجْعَلْ نَفْسِي صَالِحْ بِطَبِّقِينْ شُرُوطْ التَّوْرَاةْ لَاكِنْ نَبْقَى صَالِحْ بِإِيمَانِي بِالْمَسِيحْ أَشَانْ الدَّرِبْ الْاللّٰهْ يِسَوِّي بَيَّهْ النَّاسْ صَالِحِينْ، هُو دَرِبْ الْإِيمَانْ.
[10] وَ نِجَاهِدْ أَشَانْ نَعَرِفْ الْمَسِيحْ تَمَامْ وَ نِعِيشْ بِقُدْرَةْ بُعَاثَهْ وَ نِشَارِكْ مَعَايَهْ فِي تَعَبَهْ. وَ نِدَوْر نَبْقَى مِثِلْ هُو بِقِي فِي مَوْتَهْ
[11] وَ خَلَاصْ بِأَيِّ دَلِيلْ، نَلْحَقْ فِي الْأَخِيرْ بُعَاثْ الْمَيْتِينْ.
[12] وَ مَا نُقُولْ تَمَّيْت مَقْصُودِي خَلَاصْ وَ بِقِيتْ نَادُمْ تَمَامْ. لَاكِنْ أَنَا نِجَاهِدْ لِنَمْلُكَهْ أَشَانْ الْمَسِيحْ عِيسَى مَلَّكَانِي لِنَمْلُكْ الْمَقْصُودْ دَا.
[13] يَا أَخْوَانِي، أَبَداً مَا نُخُطّ فِي فِكْرِي كَدَرْ أَنَا مَلَكْت الْمَقْصُودْ خَلَاصْ. لَاكِنْ نِسَوِّي شَيْء وَاحِدْ بَسْ، نَنْسَى الْوَرَاءْ وَ نِفَكِّرْ فِي الْقِدَّامْ.
[14] وَ نِجَاهِدْ أَشَانْ نِتَمِّمْ الْمَقْصُودْ وَ نَلْقَى الْجَائِزَةْ وَ هِي الْبَرَكَةْ الْاللّٰهْ يِدَوْر يَنْطِيهَا لِلنَّاسْ النَّادَاهُمْ فِي مَجْدَهْ بِالْمَسِيحْ عِيسَى.
[15] وَ خَلَاصْ، خَلِّي كُلِّنَا الْبِقِينَا قَوِيِّينْ فِي الْإِيمَانْ نِتَابُعُوا نَفْس الْفِكِرْ. وَ كَانْ فِكِرْكُو شِقْ مِنْ الْفِكِرْ دَا فِي أَيِّ شَيْء، دَا كُلَ اللّٰهْ يِوَصِّفَهْ لَيْكُو.
[16] خَلِّي أَيِّ وَاحِدْ يِعِيشْ حَسَبْ عِرْفَةْ الْمَسِيحْ الْهُو لِقِيهَا و مَا يَفْشُلْ مِنْهَا.
[17] يَا أَخْوَانِي، خَلِّي كُلُّكُو تِتَابُعُوا مَثَلِي وَ شِيفُوا عَدِيلْ النَّاسْ الْعَايْشِينْ مِثِلْنَا وَ فَكُّرُوا فِي حَالْهُمْ.
[18] وَ قُلْت الْكَلَامْ دَا، أَشَانْ فِي نَاسْ كَتِيرِينْ الْمَا يِدَوْرُوا كَلَامْ هَنَا صَلِيبْ الْمَسِيحْ مِثِلْ أَوْرَيْتكُو بَيَّهْ عِدَّةْ مَرَّاتْ وَ بَتَّانْ نِأَوْرِيكُو بِحِزِنْ شَدِيدْ وَ دُمُوعْ.
[19] وَ فِي الْأَخِيرْ يَمْشُوا فِي الْهَلَاكْ. شَهْوَاتْهُمْ بِقَوْا لَيْهُمْ رَبُّهُمْ وَ أَشَانْ دَا، يِتَابُعُوا شَهْوَاتْهُمْ بَسْ. الشَّيْء الْيِعَيِّبْهُمْ، دَا بَسْ الْيِفَاشُرُوا بَيَّهْ. وَ عُقُولْهُمْ ثَابْتِينْ فَوْق خُمَامْ الدُّنْيَا بَسْ.
[20] لَاكِنْ جِنْسِيِّتْنَا أَنِحْنَ، هِي الْجِنْسِيَّةْ السَّمَاوِيَّةْ. وَ أَنِحْنَ نَرْجَوْا مُنَجِّينَا الْيَجِي مِنْ السَّمَاءْ وَ خَاطِّينْ بَالْنَا فِي جَيْتَهْ وَ هُو رَبِّنَا عِيسَى الْمَسِيحْ.
[21] وَ بِقُدُرْتَهْ الْعَظِيمَةْ الْيُخُطّ بَيْهَا كُلَّ شَيْء تِحِتْ حُكْمَهْ، هُو يَجِي يِغَيِّرْ جِسِمْنَا الضَّعِيفْ وَ يَجْعَلَهْ مِثِلْ جِسْمَهْ الْمَجِيدْ.