[1] Maantaka 'doo'd Kiriistokaaw, aalasseeyki an weyti 'doono, atinhi an weyti atin 'doono toro imoono, atinhi ikahamaadissaane toro la kala'ddi hileeye, wihi tuummane an atin isoocheeke ka, taba jiroti atin Kamur ijirtaan ka mujjum tolossada.
[2] Ewoodiya ichoow Siintik, atinhi atin ichoow Kamur wohoo kalday tahiin, a atin hawwaasda taba isdaaga.
[3] Atihi wahalheeyenye lakaakhuufo, deyyehota weyti hol ileedowte, Wori Haaggan ileecheekte a kidaahe gargaar. Toro la Kileement ichoow 'doo'di addane tuummane Wori Haaggan ileecheeke, magahenyeticho buuggi 'doo'di jiroti jirtuu imassan 'helo lakachiire laka gargaar.
[4] Taba gi'de, jeenteti atin ichoow Kamur ba wohoo kalday itahiin u, weyti hamaada. Toro la a adeehe, hamaada.
[5] Enenyet tuumman saggi atin 'doo'di samacchaare itahiin a abti. Kamur la dowwanoha ka a yamiite oganaawa.
[6] Wohoo rucchul ka laka awa'dwaa'dina. Weysi ka ichoow hawwaassihi atin Waakh hawwaassattaan ichoow kala'ddi atin laabtaan ka, Waakh walah dakkhan daaha.
[7] Waakh la nebeytiiisti mali weeli enenyet tuumman kutto a atin kakaala. Atin ichoow Yeesso Kiriisto a wohoo kalday gone, nebeyta la uurassiin ichoow malassiin a toorribta.
[8] 'Doo'd Kiriistokaaw, wihi 'da'ddaboote an atin iadeeh, taba wihi rummaate toro la enenyet inkaanyito ichoow wihi fissan ichoow wihi mi'dabe ichoow wihi enenyet 'doono ichoow wihi haag khabo ichoow wihi weyti deefo ichoow wihi lasaa'do kamalda.
[9] Taba wihi an atin abche, atin la ikakhaatatteen ichoow wihi an atin icheeke ichoow wihi an yeele atin agarteen mujjum raaha. Waakkhi nebey leh la a atin leejira.
[10] Ani la jeenteti atin uuri goorat atin ikakhabteen toolla toro isookhabatteen u weyti Kamur ka hamaada. Rumanka atin kol dakkhan uur a ikakhabteene, i'daasenyi jiti atin uuraas atin ikhabtaan itussaan a waayteen.
[11] Anna jeenteti wohoo ikaankhanyahiin mee sagga ikaayyeedo. A mehe jiroteey ka, walahbaaw isoobaho ka, saggi liikadargo a abde.
[12] Walahwaayyo wihiche a garda, kamurroon laka wihiis a garda. Walahbaaw isoobaho ka, uuri buuho ommos uuri marah eheetteey ka ba wihi buure khabin ommos wihi rucchul khabin eheetteey ka ba, saggi liikadargo a abde.
[13] Kiriistohi miig isiicho ka, a geeddi an walah tuumman yeelo.
[14] I'daasenyi, atin weyti haaggisseen maanti atin sinati an kajire ka igargaarteen.
[15] Atinha 'doo'd Kiriistoki ilkerengeetti Fiiliffee a garattaanee, ibeenneti kolooraate atin Wori Haaggan daagteen, maanti an boroofenhi Makedooniya kakahe, atin kaldaye ururre Kiriisto tuumman goyaka chilimme ileegisanteen.
[16] Maanti an ilkerengeetti 'Dessaloonika jire laka, kolassi ittaawenye gargaar isooeregteen.
[17] An siinti chilimme mee atin kayowdi, wihi buurenye Waakh berri atin ikakhayo yowda.
[18] A mehe wihi atin isooeregteen tuumman a 'hele. Geeddi an jiroteey ka 'doono laka 'dirihicheeda 'hele. Toolla Ebaabara siimohi atin ani isooeregteen tuumman ikeene la, wihi an 'doono tuumman a khaba. Waha a i'di soorriyoti uyuugenye Waakh liibahcho, toro Waakh kahamaado.
[19] Waakkheey la kamurroonki weene Yeesso Kiriisto laka'helo ka, wihi buurenye atin jirotiin ka 'doontaan tuumman a atin siicha.
[20] Waakkheenki Aabbaheene jirtuu tuummamba a lakoolicho. Aamiin.
[21] 'Doo'di Waakhe icho ichoow Yeesso Kiriisto wohoo kalday yahiin tuumman bariitoteey eleelicha. 'Doo'di Kiriisto rummeeste inta ka ileejiro laka a atin soobariitiche.
[22] 'Doo'di Waakhe inta kajiro tuumman a atin soobariitiche. Kach ka la 'doo'di min Kaaysar hil kahaaggicho a atin soobariitiche.
[23] Yeesso Kiriistohi Kamure ba rubeyohiin imaala.