[1] Kola atin ichoow Kiriisto a wohoo kalday gone, wahaas uur ma atin miigoochaan a? 'Dooninti us atin 'doono ka la, usu menya uur atin khoboocho? Atin ichoow Rubeyti Munyee la kulankoo kalday ma isikhabtaan a? Kiriisto 'doonintiis ichoow uurnugleeliis a atin tuse menya?
[2] Maantaka taba isdaaginti atin isdaagtaan ichoow 'dooninti atin is'doontaan ichoow maloo kaldaye atin khabtaan ichoow uuroo kaldaye atin isikhabtaan ka, hamaadeey tuum buuhicha.
[3] 'Doo'di wihi awtiissa on yowti ommos immarah serey isgeecho iitaahana, i'daasenyi 'doo'di isnuglaacho ateeha, 'doo'di addan saggi us atin ikakhummanyahe iekkaacha.
[4] Wihi wihiine kalday on aw iikhabina, wihi 'doo'di addan laka aw ikhaba.
[5] Taba gi'de mali Yeesso Kiriisto khabe khaba.
[6] Us sagag dakkhan ka i'di Waakhe eheete, eheetteey laka us wihi usu mu'dane Waakh ekkatiis kayeelo ma kadagin.
[7] I'daasenyi weynaan tuumman a kasootabe. Saggoh u? I'di bow'da yitahye, saggi weeli enenyet idesse, 'doo'di usu arge la, weeli enenyet on arge.
[8] Usu a isnuglaache. Saggoh u? Ayti Waakhe raahe, ichoowka omoote ititahye, omoottaas, a ti usu massalaaba lakakaahe.
[9] Maantaka Waakh Kiriisto inti weynaan tuumman ka kussane gesse, toro la magahi magahenye tuumman kussan laka siiche,
[10] 'dee magah Yeesso ka, wihi serey kijiro tuumman ichoow wihi harra sarche kijiro tuumman ichoow wihi harra goya kijiro tuumman, jilbo il a kagu'ddaane,
[11] toro la icho tuumman saggi Yeesso Kiriisto Kamur iyahe 'dow ka a cheekaane, 'dee Waakkhi Aabbaheene lasaa'da.
[12] Aalasseeyki an weyti 'doono, atin waansiheey kol tuumman a raahteen. Geeddi an atin leejire kalday on menye, toolla an atin ileejirin weyti raahtaan. Maantaka, hamar ichoow roorroti atin Waakh karoortaan ka, orey isohda ribnaanki Waakh atin ribo jirotiin goyaka hol kadowa.
[13] A mehe Waakhe malassiin woya 'dee wihi usu kahamaadicho 'doontaane, toro la yeelin tabuu'diin.
[14] Taba wihi atin yeessaan tuumman ka, 'doo'di iriir leh ommos 'doo'di nyunnyuwo iitaahana.
[15] I'da ka nyaakhuti Waakhe wohoo rucchul laka liikacheekanne toro la eloo rucchul laka ikhabine tateehiin. Atin 'doo'di i'deenye khollokkhane toro 'doo'di addan baabiicho goycho ka, a i'di yiyyihimohi harrata ka mug'di goya kabildiikho,
[16] geeddi atin yeedi jiroti rummaat laka'helo 'doo'd icheektaan. Ibeenki Kiriisto soonokhti ani a atin keeylajo, hili geeddi an abuu'd tuumman an haaggiche uus ki ilmarhaatteet eheynan.
[17] Chirri liiyagiis laka, diiggeey a i'di sadakhati soorriyotiin lakakhube, an weyti atin leehamaada, toro la hamaadeey atin leegisma. A mehe hiliin a i'di soorriyoti atin Waakh ibihissaane, kakhuufnaanki atin Waakh kakhuuftaan kayamiit.
[18] Maantaka taba atin laka hamaada, toro la weyti ileehamaada.
[19] Chirri Yeessohi Kamure 'doono, wihi an khajjeelo a Timootihi maanassa dow an atin isooergo, 'dee chirri an woriin abde ka uur imiigoocha.
[20] Inta ka etoo addane i'diisenye rumanka aw atin ikhabo ma khabo.
[21] A mehe 'doo'di addan tuumman, wahanyeyyo Yeesso Kiriisto menye ebba wihiissa on yowta.
[22] I'daasenyi Timooti saggi us rumanka indigir ikhabe us enenyet tuumman ituse a garattaan. Ani ichoow Timooti i'di ooyo ichoow inankiissa Wori Haaggan isileecheekne.
[23] Maantaka, uus an wihi liiyeelo abdi, anihi usu atin isooergo khajjeela.
[24] An Kamur a kakhuufaa, dowwanoha ka a atin soo'daara.
[25] I'daasenyi toolla wihi addane an gooche, a anihi Ebaabara atin isoolaabo. Ullaka a et Kiriisto toro la a ileehila a i'doo us diho ikaleejire. Ulla a ergattitiinti wihi an maan dakkhan 'doono ka igargaaro.
[26] Ulla atin tuumman a atin imoona toro la jeenteti atin khannaatiis idaagteen u, weyti mali uskul gele.
[27] Us rumanka weyti khannaneete, ichoowka umaatan leheet. I'daasenyi Waakh usu uur a isoonugleeste. Usu kalday on menye, Waakh ani laka uur a isoonugleeste, oytinti an khabo kakhayin jeyche.
[28] Maantaka an weyti usu atin isooergin 'doona, 'dee maanti atin usu toro agartaan hamaaddaane, oytinteey laka nuglaatta.
[29] I'di eti Kamur rummeestuu, taba hamaadi buure ka usú martiisda, 'doo'di i'diise laka inkaanyita.
[30] I'di tahe jeenteti us Kiriisto hil ikahaaggicho on u, a umaatan leheet. Ulla jirotiis adahe gate, 'dee gargaari atin ani igargaarin iubaa'dan igargaare.