[1] Khadaaba eti atin isoochiiro a ani, Baawulohi Waakh saggi us i'doono on u ergaano Yeesso Kiriisto ikayeesse. Timootihi koo Kiriistee laka a iskhabna.
[2] 'Doo'di an isoochiiro la, a atinhi munyeenye, Kiriisto rummeysatteene lakakhuufo, ilkerengeetti Kolossaay taalliine, atin ichoow Kiriisto ba wohoo kalday tahiin. Waakkhi Aabbaheene ba atin imaala nebey atin kakaala.
[3] Nah kol tuumman chirri nah Waakh atin isoowahno, Waakkhi Aabba Yeesso Kiriistohi Kamureene kala'd a ilaabna.
[4] Wihi nah Waakh kala'd ikalaabno la, a jeenteti nah saggi atin Yeesso Kiriisto ikakhuuftaan idaagne toro la saggi atin 'doo'di Waakh tuumman i'doontaan nah idaagne.
[5] Wihi atin i'da kayeesseen la, a jeenteti atin saggi Waakh goobiis ka haaggi nool atin iabbire, atin ikhajjeessaan. Haagga Waakh la orey on daagteen, maanti atin Wori Haaggane rummaat daagteen.
[6] Wora Haaggan a atin iyimiyye, 'doo'di ittaawenye harra tuumman laka a kataa'ha toro gurnaan dela. Waha la a wihi goytiin ka laka yitah, uus maanti kolooraat atin Wora rummaat daagteene, toro haaggi Waakhe buure runtiis tuum abatteen.
[7] Wora rummaat eti atin abche, a Ebaabarahi nah weyti 'doonno ilbooy ka nah walhicho. Us a eti meesseenyo ka hil Kiriisto ka lakakhuufo.
[8] Toro la us saggi atin Rubeyti Munyee ka 'doo'di Waakh tuumman i'doontaan a cheeke.
[9] Jeentetaas u, uus nah woriin 'helle, koloo kalday laka Waakkhi nah atin isoowahno ma 'diin. Wihi nah Waakh daahno la, a usuhi tuum khara ichoow abannaanki Rubeyti Munyee kayamiit tuumman ka wihi us 'doono atin ibuuhicho.
[10] Waakhe atin iwahna, 'dee jiroti Kamur inkaanyitto toro kahamaadisso jirtaan. I'da ka sagag tuumman ka enenyet haag a iyeessaane, abannaanki atin Waakh abattaan la a kakhayma.
[11] Toro la Waakh ba miigtiisti miig tuumman kussan ka atin miigoocha, 'dee walahbaaw atin isoobahe ka 'doo'di samacchaare tateehiine, garrahsattaan. Toro la hamaadi buure ka,
[12] Waakkhi Aabbaheene kala'd ilaabtaan. A mehe us atin 'doo'di Waakhe goobi Waakhe ababo dalho leedalhin yabuu'd a atin kayeele.
[13] I'di tahe us miigti mug'di a inno kasoofure, dakhi weeliiski us 'doono goya inno keene.
[14] Weeliis diiggiis ka a inno gatte inno soofure, uskeeleen tuumman inno ikakute.
[15] Kiriisto a fooli Waakkhi liiargin, a huraati wihi lasoouume tuumman iween.
[16] I'di tahe usu on ka Waakh walah dakkhan a soouume. Wihi serey kajiro ichoow wihi harra kajiro ichoow wihi laargo ichoow wihi liiargine i'di maanta komborohi antoot ommos wihi miig khabo ommos wihi anto leh ommos wihi walah tuumman dakhti tuumman usu soouume. Kiriisto ka walah tuumman a lasoouume, toro la usu liisoouume.
[17] Us geeddi walah tuumman liisoouumin laka a jire. Usu walah tuumman iskakhuccha.
[18] Toro la usu matakki sartiisenye, sartiis la a ururiissa. Us a uumaccho ichoow eti oraate 'doo'di tuume goyaka omoot kasookahe. I'da ka usu on walah tuumman iween.
[19] I'di tahe wihi Waakh kahamaadiche, a buuhiiski tuum weeliis goya fiddiyo,
[20] toro Kiriisto ka walah tuumman ankiis a keene. Diig Kiriistoki massalaaba kakhubte ka, Waakh walah tuumman a ineybe, wihi serey kijiro ommos wihi harra kajiro eheetteey ka ba.
[21] Atin goorat 'hor Waakh foga ileejirteene, maliin ka chiiytiissa eheet jeenteti atin uskeel iyeesseen u.
[22] I'daasenyi omootti sar Kiriisto tumuy ka, Waakh ankiissa atin keene, atin munyaache ortiis ka 'doo'di eloo rucchul laka ikhabine wohoo rucchul laka liikacheekan atin kayeele.
[23] I'daasenyi, taba wori rummaat kakhuufa, i'di wihi isesseehin u jurkhicha. Khajjeeli Wori Waakhe Haaggan akaguurina. Wora atin daagteen a ki 'doo'di harra tuumman liicheeke. Anna a Baawulo, a falfati Wora Haaggan cheekto.
[24] Toolla sinayyohi an iroonotiin u 'helo ka a hamaada, toro sarteey ka wihi sinayyo Kiriisto kaankhan indigirti sartiis u a buuhicha. Sarta la a urur Kiriisto.
[25] Hili Waakh indigirtiin u dahanteey soogesse ichoow urura an ifalo a israahaan. Hila la a ki an tuum Yeedi Waakh cheeko.
[26] Waha la uu' lasoobahe ichoow kholoyyo tuumman ka a wihi dagsane, i'daasenyi toolla 'doo'di Waakh a liisoobabbakkaahiche.
[27] Wihi Waakh 'doo'diiskaas igooche, a waha goorat haaggane dagsane yaafohi Ya'huud ieheynan liisoobabbakkaahicho 'doo'diis abti. Waha la a Kiriistohi atin ichoow usu ba wohoo kalday tahiine, 'dee weynaanti Kamure inno khajjeello isleegisanno.
[28] Nah wori Kiriisto miinsane cheekna, ebba la kharateenyo tuumman ka tootoonna, walah abinna, 'dee ichohi icho ichoow Kiriisto wohoo kalday yitahye ii'dowe Waakh ikeenna.
[29] Jeenteti waha u la, miigti Kiriisto isiicho ka an weyti hol dowa. Miigtiis la weyti imiigoossa.